
Tơring glông Dak Mil hơmâo đang hmua pla phun boh troh prong hloh amăng tơring čar Dak Nông. Anai ăt lĕ sa amăng 3 boh tơring glông kual kơdư tơring čar Dak Nông, bơdjơ̆ nao kơtang hloh mơng bruă kơƀah ia pruih amăng ƀơi lu kual ngă hmua.
Sang anŏ ơi Nguyễn Công Ngãi, dŏ amăng să Dak Lao, tơring glông Dak Mil hơmâo rơbêh 2 ektar đang pla kơphê pơplah hăng sầu riêng. Ñu brơi thâo, sang anŏ hơmâo pruih ia 2 wŏt samơ̆ aka ƀu giong ôh mơ̆ ia amăng dơnao 40 (plơi Dak Thọ) khŏt laih.
“Thun anai ia tañ khŏt ƀiă, mơnuih ngă hmua gơmơi ƀu thâo ngă hơget dong tah. Ră anai rĭm hrơi hơmâo hơdôm hơpluh măi ƀô̆p ia jum dar dơnao 40, mơ̆ ia pơđoh rai pơ amăng dơnao gơnang nao măi ƀô̆p mơng kông ti dơnao ia Dak Nông. Tơdah ƀing gơñu ƀô̆p ia mut amăng dơnao na nao ăt pơhlôm brơi ia yua giăm 1/5 kiăng pruih brơi phun pla mơng neh met wa”.

Tui Jơnum min mơnuih ƀôn sang tơring glông Dak Mil, pơ-iă hang glăk ngă giăm 5.000 ektar phun pla amăng ƀon lan amra kơƀah ia pruih. Hrŏm hăng anun, giăm 300 boh sang anŏ amra kơƀah ia yua amăng rơnuč bơyan không phang anai.
Ƀơi tơring glông Krông Nô, sa dua kual rôk tui ia krông Dak Sôr glăk kơƀah ia pruih. Tơdah ƀu hơmâo hơjan, phang khŏt amra ngă bơdjơ̆ sat nao giăm 1.000 ektar phun pla.
Tui ơi Võ Văn Minh, kơ-iăng Khua gơnong bruă ngă hmua hăng ayuh hyiăng lŏn mơnai Dak Nông, phang khŏt glăk bơdjơ̆ sa nao hơdôm rơbâo ektar phun pla, lu hloh lĕ phun kơphê, tiu hăng phun boh troh. Mơng tong krah blan 3, gơnong bruă bơdjơ̆ nao hơmâo đoh pơpha ia brơi sa, dua boh ƀôn lan kiăng pruih brơi phun pla. Sit biă ñu, ia hơmâo ƀô̆p mơng dơnao ia Tây hăng sa, dua boh dơnao jum jar amăng tơring glông Dak Mil kiăng pơhrua brơi kual khŏt ia ƀơi tơring glông Dak Mil hăng Krông Nô.
Jơnum min mơnuih ƀôn sang tơring čar Dak Nông hơmâo hră pơ-ar git gai gơnong bruă ngă hmua hăng Jơnum min mơnuih ƀôn sang hơdôm boh tơring glông, plơi prong, kông ti wai lăng hơdôm dơnao ia nao pel ĕp, kiăo tui lăng na nao hăng ngă tui hơdôm hơdră bruă pơhlôm hlâo bơyan phang khŏt. Tơring čar ăt git gai pơtrut tañ pok pơhai 2 akŏ bruă hrưn đĭ tŭ yua amăng bruă yua ia amăng tơring glông Čư̆ Jut hăng Dak Mil (abih tih prăk mă yua rơbêh 500 klai prăk) kiăng pơhlôm brơi hơdôm ring bruă dưi mă yua djơ̆ hrơi, hmao tlôn pơhlôm brơi ia pruih brơi phun pla kơ mơnuih ƀôn sang./.
Viết bình luận