Lơ 14/8/2014, amăng tal nao mă bruă ƀơi ƀôn prong Cần Thơ, Khua git gai Ping gah Nguyễn Phú Trọng hrŏm hăng grŭp hyu mă bruă mơ̆ng dêh čar hmâo pioh laih mông nao čuă, mă bruă hăng Ping gah, Ƀirô pơtrun bruă Quân khu 9. Pơtŏng sit anih gơgrong mơ̆ng Quân Khu lĕ sa anih pơhlôm hlâo bruă mă yôm phăn, Khua git gai Ping gah dêh čar rơkâo amăng rơnuk phrâo hmâo tơlơi pơplih tañ, glêh tơnap, ƀu thâo him lăng hlâo, Quân khu 9 khom gơgrong hlâo dong kiăng thâo tơlơi pơhing, thâo kơjăp tơlơi, ƀu pioh hmâo kah mơ̆ng pơsir, ƀu pioh dô̆ kơtuă, pơhlôm amra kơdŏng blah, djru bruă blah amăng mông hơpă amra truh; pơgang kơjăp kual rơhuông adai, ia rơsĭ bul ia rơsĭ, pô lŏn ia. Ngă tui tơlơi črâo ba mơ̆ng Khua git gai Ping gah Nguyễn Phú Trọng, hơdôm thun rơgao, mơnuih apăn bruă tơhan, ling tơhan Quân khu 9 ngă tui na nao pran jua gum hrŏm hơbit; pok pơhai ha amăng plĕ, ba glăi bôh tơhnal hơdôm jơlan pơsir pơdŏng Ping gah Quân khu kơjăp kơtang gah bruă kơđi čar, tơlơi pơmin, pran jua, pơphun bruă hăng mơnuih apăn bruă.

Hlăk dŏ hơdip hơmâo apăn lu bruă ngă khua mơ̆ng pô, Khua git gai ping gah dêh čar ơi Nguyễn Phú Trọng pioh lu tơlơi khăp prong prin hăng đing nao phara biă mă hăng ƀing khua mua, ling tơhan sơlup mơnuih ƀôn sang Việt Nam hăng ƀing tơhan dŏ mă bruă ƀơi bul pơtâo plao ia rơsĭ Trường Sa hnun mơ̆n. Mông bơ ră ruai plah wah Khua git gai ping gah amăng tal nao mă bruă hăng čuă tơhan sơlup kual 4 lơ 5/5/2016, Khua git gai ping gah tơña bla tơlơi hơdip mơda, bruă mă sang anŏ abih bang khua mua ling tơhan hăng mơnuih ƀôn sang dŏ ƀơi tơring glông Trường Sa; pơtrut pơsur juh alum pran jua brơi thâo gum pơgôp, kơtưn hloh kiăng găn rơgao djop mơta tơlơi tơnap tap kiăng ngă pơgiong bruă ngă mơ̆ ping gah, kơnuk kơna jao. Khua git gai ping gah đăo kơnang kơ tơlơi pơmin pran jua khin hơtai amăng kơđi čar, pran jua blah ngă, amra tŭ añ djop bruă mă tuh drah pơčah asar mơ̆ng ƀing khua mua, ling tơhan sơlup lăi hrŏm, abih bang khua mua, ling tơhan sơlup kual 4 hnun mơ̆n, kiăng ngă giong bruă jao wai pơgang guai dêh čar ngă pô kơ lŏn ia. Thượng tá, ơi Nguyễn Văn Khương, khua apăn bruă kơđi čar bul pơtâo Song Tử Tây hơdor pioh na nao tơlơi pơhiăp hmư̆ hing mơ̆ng Khua git gai ping gah ơi Nguyễn Phú Trọng. “Kơnuih hiam yơh sa tơlơi yôm hloh, hiam hloh".

“Khua git gai ping gah ơi Nguyễn Phú Trọng lĕ mơnuih tơpă ba gru hiam lơ̆m kơnuih klă, kơ tơlơi pơmin pơtô djơ̆, kơđi čar, kơ tơlơi dŏ dong ƀong huă samơ̆ tơlơi mơ̆ kâo djă đôm amăng pran jua hăng hơdor na nao anun lĕ tơlơi đĭ pơhiăp mơ̆ng Khua git gai ping gah ƀơi Mông jơnum đơ đam dêh čar djop anom bruă kơnuk kơna pơgăn ƀong kông ngăn kiăng pok pơhai ngă tui Hră pơtrun 13 mơ̆ng Ping gah lơ 15/9/2021. Anun lĕ : Ană mơnuih hơmâo kơnong sa tơlơi hơdip, hơdip kơnong ha wơ̆t, yua kơ anun ngă hiư̆m pă hơdip mơda brơi tŭ yua klă, anăm lui hơƀlơk glăi, ruă pran jua yua kơ bruă ngă sat klih et sen, hil rơ̆t ƀlah muañ, mlâo khiâo. Prăk lu ngă hơgĕt, djai thâo djă ba mơ̆n. Kơnuih hiam yơh sa tơlơi jă đôm dơlăm yôm pơphăn hloh".

Amăng tal nao čuă, mă bruă ƀơi tơring čar Kon Tum amăng blan 4/2011, Khua git gai Ping gah dêh čar, Khua git gai wai lăng pơ ala mơnuih ƀôn sang dêh čar ta ơi Nguyễn Phú Trọng pioh laih mông nao čuă neh wa djuai ania Bahnar pơ̆ plơi Đăk Mút, să Đăk Mar, tơring glông Đăk Hà. Ƀơi anai Khua git gai Ping gah dêh čar ta hơduah ĕp tơlơi hơdip mơda, hmư̆ lăng tơlơi pơmin, tơlơi čang rơmang hăng pơtă pơtăn mơnuih ƀôn sang ngă tui pran jua gum hrŏm hơbit, pơčeh phrâo amăng bruă bơwih ƀong huă ngă đang hmua. Hơdor tơlơi pơtă mơ̆ng Khua git gai Ping gah dêh čar, 13 thun rơgao, 148 bôh sang anô̆ mơnuih ƀôn sang plơi Đăk Mút hmâo găn rơgao laih lu tơlơi tơnap pioh pơđĭ kyar bơwih ƀong huă, pơplih  tơlơi hơdip mơda hăng pơdŏng truh kih plơi pla phrâo. Ayong A Nguyên, Kơ-iăng Khua git gai Khul hlăk ai să Đăk Mar, ngă rah Khua plơi Đăk Mút, pơtŏng sit:

 “Djă pioh tơlơi Wa Trọng pơtă, drơi pô kâo hmâo pơplih laih tơlơi pơmin, hơdră ngă. Hăng djop hơdră kâo pơjing laih Khul hlăk ai khul đăo pơđĭ kyar bơwih ƀong pioh mơ̆ng anun hlăk ai amra ngă pô drơi pô, ngă pô bơwih ƀong. Ră anai, Khul hmâo laih rơbêh kơ 15 ding kơna tum pơƀut hmâo hlăk ai pioh pơđĭ kyar bơwih ƀong laih anun gum hrŏm amăng bruă Khul, Grŭp”.