Amăng sang dŏ anet aneo mơ̆ng 3 adơi amai bơn mô̆ Rahlan H’Kưm plơi Čuêt Ngol, să Čư̆ Ă, plơi prong Plei Ku, tơring čar Gia Lai hmư̆ kơdok kơdor hloh, lơ̆m ƀing amĭ mĕm, ƀing amai kông an gah Khul đah kơmơi mut phung tơhan kông an tơring čar Gia Lai nao čuă laih anun ngui hrŏm hăng adơi đeh, ană bă rông. Amai kơčua mơ̆ng 2 čô adơi dŏ anet anun lĕ amai H’Kưm thun anai 15 thun brơi thâo: amĭ hăng ama 3 adơi amai gơñu rơngiă sui mơ̆ng anai 6 thun laih. Mơ̆ng anun truh ră anai, hơmâo Khul đah kơmơi mut phung tơhan kông an tơring čar djru ba, ngă amĭ mĕm, wai lăng brơi mơ̆ng anih dŏ anŏ ƀong, truh pơ bruă hrăm hră pơar kơ 3 čô adơi amai gơñu. Ƀing gơñu hơmâo adơi amai amĭ mĕm jing tơhan kông an wai lăng, pơtrut pơsur pran jua, djru ba djop mơta; Ƀơi anŏ djă nao eng ao phrâo, djru ba hơdrôm hră hrăm laih anun kơdŭng hră gai čih kơ gơñu. H’Kưm  lăi:

“Rim hrơi, sit hơmâo tơlơi hơgĕt lĕ, gơmơi iâu nao ƀing amai, ƀing amĭ mĕm djru. Ƀing amai ăt pơtrut pơsur pran jua ƀu brơi pơdơi hrăm hră ôh, khom thâo gum pơgôp nao rai khăp pap tơdruă. Kâo ƀuh plai ƀiă mơ̆n tơlơi hning rơngôt, tơnap tap yua hơmâo mơnuih juh alum ba. Kâo ăt gir run khom săng, gưt hiăp kiăng hrăm hră lăp hăng tơlơi djru ba mơ̆ng ƀing adơi amai ngă amĭ mĕm”.

Ƀu kơnong kơ adơi amai bơn Rahlan H’Kưm đôč ôh, ƀơi tơring čar Gia Lai dŏ hơmâo 31 čô čơđai drit druai, lu kơ mơnuih djuai ƀiă dưi hơmâo djop khul đah kơmơi mut phung kông an tơring čar Gia Lai lăng ba, djru brơi. Hăng rơnoh prăk jak iâu pơčruh ƀu kơnong yua kơ ƀing khua mua, tơhan kông an amăng gơnong bruă kông an đôč ôh djru, dŏ jak iâu lu khul mơnuih mơnam, khul đah kơmơi mut phung djop gưl pơčruh hrŏm kiăng hơmâo hmăi rơnoh prăk amăng keh prăk djru rim čô čơđai ană drit druai mơ̆ng 4 truh 5 klăk prăk sa thun. Rơnoh prăk anai djru kơ čơđai muai drit druai hơmâo prăk ƀong huă hăng hrăm hră laih anun blơi gơnam yua kiăng ječ. Thượng tá, Nguyễn Thị Ngọc Thúy-Khul đah kơmơi mut phung kông an tơring čar Gia Lai brơi thâo, lu ană amôn dưi tŭ mă tơlơi djru ba, ngă ană mĕm anai hrăm hră thâo ƀiă soh, đơ đa hrăm thâo biă, yua hrơi mlam  hơmâo gơñu dŏ hrŏm jing ƀing amĭ mĕm pơtô ba, djru pơtrut tui klôn:

“Rơngiao kơ bruă đing nao tơña bla boh tơhnal hrăm hră pơar, tơlơi suaih pral kơ ƀing ană mĕm, sit hơmâo mông wăn lĕ gơmơi nao tơl sang čuă jơmư trư găn, pơgiăng ba gơñu hyu ngui pơrơngiao. Kâo ăt pơgiăng gơñu glăi ngui pơ sang anŏ ta pô pioh gơñu ngui hrŏm hăng ană đah kơmơi kâo. Sit nao pơ sang hră, hơmâo tơlơi hơgĕt lĕ gơñu lăi pơthâo, iâu telephôn pơhmư̆ ƀudah mơ-it tơlơi pơhing brơi kơ amĭ mĕm thâo hăng pơsir, kah pơpha. Anun lĕ sa tơlơi mơak biă mă”.

Ăt hơmâo tơlơi djru ba mơ̆ng djop gưl anom bruă đah kơmơi mut phung mơ̆n, thun 2022, să Phú An, tơring glông Đak Pơ hơmâo anih pơtô kiăng lŏm lui tơlơi ƀu thâo hră pioh kơ ƀing adơi amai djuai ania Bahnar. Yua kơ anun, mơ̆ng blung ƀu hơmâo hlơi thâo hră ôh, truh ră anai lu adơi amai thâo pơđok, thâo čih boh hră, thâo jŭ yap pơkôm prăk kăk sĭ mơdrô gơnam tam. Amai Bùi Thị Minh Dương Khua khul đah kơmơi mut phung să An Phú, tơring glông Đak Pơ brơi thâo, mơ̆ng boh tơhnal anai, lu adơi amai thâo pơđok, bruă pok anih pơtô mơmŏt mlăm kiăng lŏm lui ƀu thâo hră hơmâo pơlar pơ lu anih. Thun anai, khul đah kơmơi mut phung hơdôm să Yang Bắc, Yang Hội ăt hơmâo pok dua boh anih hrăm mơmŏt, pơhưč 160 čô adơi amai mut hrăm:

“Ƀing adơi amai dŏ lu tơlơi sư̆ rơbư̆, nao sang hră aka ƀu khin puăi tlao, ƀu khin pơđok ôh hŭi kơ soh, hŭi kơ nai tlao laih anun lu adơi amai arăng jao ba glăi tơlơi hrăm čih tui pơ sang ăt ƀu čih lơi. Tơña gơñu lăi, djă gai čih tơnap hloh djă gor (gron) wăng ngă hmua. Lơ̆m thâo čih boh hră blung a lĕ, gơñu mơak pran jua pơtrut gơñu hor hloh. Truh ră anai, ƀing adơi amai thâo čih, thâo pơđok laih, dŏ hrŏm pơtô ba hrăm hră hăng ƀing đah kơmơi ngă adơi amai mĕm laih anun hơduah ĕp dơ̆ng amăng internet pioh ngă tui, ba yua amăng bruă ngă hmua pla pơjing kiăng lui rơmŏn kŏn rin”.

Yă Rčom H’Hông, Khua khul đah kơmơi mut phung tơring čar Gia Lai brơi thâo, hrŏm hăng bruă tŭ jum ngă ană mĕm kơ ƀing čơđai, ană arăng drit druai laih anun pok anih pơtô hrăm hră kơ ƀing adơi amai mơnuih djuai ƀiă aka ƀu thâo hră, djop gưl khul đah kơmơi mut phung amăng tơring čar dŏ hơmâo keh prăk hrăm hră brơi kơ ƀing čơđai sang hră ƀun rin hrăm thâo, găn rơgao tơlơi tơnap tap, djru man pơdong sang pơđao khăp pap, djru prăk kơ ƀing adơi amai čan mă kơmlai ƀiă, ƀơk phun pla, djuai mơnong rông. Mơ̆ng anun, hơdôm čô čơđai tơnap hăng ƀing adơi amai ƀun rin dưi djru ba sit nik:

“Thun blan pơ anăp, Khul đah kơmơi mut phung tơring čar Gia Lai ăt pơtrut ngă tui lu hloh boh tơhnal dưi ngă laih, git gai pơčrâo ba djop gưl hrăm tơlơi thâo thăi mơ̆ng lu hơbô̆ hiam klă amăng tơring čar laih anun djop anih ngă tui amăng bruă pơđĭ kyar bơwih ƀong huă sang anŏ. Laih dơ̆ng, pok pơhai hơdră bruă, khul gum hrŏm hăng pơhưč lu mơnuih mut hrŏm ngă ding kơna; apah bơni hmao kru, pơtrut pơsur tañ ƀing ngă bruă hur har, hơmâo hơbô̆ bruă hiam klă pioh pơlar tui amăng djop gưl pơ anăp adih”.

Hăng tơlơi khăp pap mơ̆ng hơdôm bruă mă djơ̆ lăp ƀuh rơđah anun, khul đah kơmơi mut phung djop gưl amăng tơring čar Gia Lai hlăk djru ba kơ čơđai drit druai laih anun ƀing đah kơmơi djuai ania ƀiă plai ƀiă tơlơi hning rơngôt, tơnap tap, laih anun djru hrŏm ƀu ƀiă ôh amăng bruă pơhlôm ba tơlơi hơdip mơda mơnuih ƀôn sang amăng tơring čar.