Lăi pơthâo tơlơi pơhing, video mơ̆ng hơdôm plăng fanpage hmư̆ hing, pơplih ia avatar mă yua ră anai hơdai nao rŭp jŭ kô̆ ƀudah pơplih avatar hăng hơdôm rŭp Khua git gai Ping gah hăng pioh glăi hơdôm tơlơi pơhiăp bă kơ pran jua kiăng khăp – anun lĕ hơdră lu mơnuih ol kơdol pran jua hning rơngôt tơlơi rơngiă mơ̆ng sa čô mơnuih mơbruă mơ̆ng bruă hơkrŭ Việt Nam amăng plăng face book. Ƀing gơmơi rơkâo mă tŭ sa dua tơlơi čih lăi pơthâo anun.

 -Kiăng khăp hăng păp kơ Wa biă, Wa hmâo mă bruă laih truh kơ đut pran yua kơ lŏn ia

  -Ruă pran jua biă ană bă rơgơi mơbruă mơ̆ng Ping gah Cộng sản Việt Nam.

  -Tơlơi kơnang kơ Ping gah yua kơ pran jua klă hiam mơ̆ng wa.

   -Tơlơi thâo lăng hăng hơdip klă mơ̆ng Wa hmâo pơjing laih kơnuih hơdip klă hiam amăng mơta djop mơnuih ƀôn sang.

 -Rơkâo pioh mông ƀơi anăp bơngat jua Khua git gai Ping gah pioh glăi tơlơi đăo kơnang klă hiam hăng pơgi kơdih klă hiam kơ Lŏn ia pơ̆ anăp anai!

-Sit năng ai ñu hăng lu mơnuih, gơñu ƀu sit nik thâo hluh cộng sản hơget ñu. Samơ̆ lăng nao Khua git gai Ping gah dêh čar, gơñu thâo hluh sa čô mơnuih cộng sản, sa kơnuih cộng sản anun hiưm ñu.

Hăng dô̆ hmâo lu bôh pia pơtưh tơbiă rai mơ̆ng pran jua mưn ƀuh ol kơdol. Lu mơnuih ăt hmâo pơdah mơn hơdôm anô̆ hơdor glăi phara lơm dưi bưp Khua git gai Ping gah Nguyễn Phú Trọng. Amăng plăng mơ̆ng pô, Khua anih jưh pơ ala Vũ Quang Minh – Khua anih jưh pơ ala kơ Việt Nam ƀơi dêh čar Đức, Khua hơđăp anih jưh pơ ala kơ Việt Nam ƀơi dêh čar Kur hăng ƀơi dêh čar Anglê, gơgrong rah ƀơi Ireland ruai glăi sa tơlơi hơdor pioh lơm ñu dưi kiăo tui Khua git gai Ping gah Nguyễn Phú Trọng amăng tal nao čuă sit nik mơ̆ng Khua git gai Ping gah dêh čar pơ̆ dêh čar Kur blan 7 thun 2017.

 -Ƀơi Sihanouville, lơm prăp lui anih anom pơphun mông bưp ƀô̆ mơta Khua git gai Ping gah dêh čar hăng adơi ayong adơi amai mă bruă ƀơi Anom bruă anih jưh pơ ala hăng neh wa, Khua git gai Ping gah dêh čar nao tañ biă lơm ƀing adơi amai glăk dô̆ rơmet set. Tô̆ tơnô̆, Khua git gai Ping gah dêh čar mut nao hăng yŏng kơƀang grê hrŏm hăng ƀing gơmơi amăng tơlơi heng hong mơ̆ng abih bang djop mơnuih.

-Ƀing gơmơi ăt pơlăi nao rai mơ̆n lơm hơdor nao tơlơi anun ƀu thâo wor bit ôh, čang rơmang amra hmâo lu tal dưi bưp Ñu gum tơngan yŏng kơƀang grê kơ hơdôm mông bơră ruai pơđao pran jua hăng jê̆ giăm kah hăng sa bôh sang anô̆”.

Bơ̆ hăng pô čih tơlơi pơhing Hoàng Anh Sướng, dua wot bưp Khua git gai Ping gah Nguyễn Phú Trọng jing hơdor na nao, amăng anun hmâo mông mă ia trà tŭ jum Khua git gai Ping gah dêh čar, Khua mir sir dêh čar Khač ơi Tập Cận Bình. Ayong Hoàng Anh Sướng čih:

  “Lơm ơi Tập Cận Bình rai čuă Việt Nam, wa Nguyễn Phú Trọng hmâo jak iâo kâo pơphun mông mă ia trà amăng mơguah lơ 13/11/2017 ƀơi sang dlông Wa Hồ. Anai ăt lĕ tal 2 kâo bưp, ră ruai ƀơi anăp hăng ñu”.

  Ăt kơnuih anun mơn, lăng ƀu kơdrưh ôh, amuñ giăm, mơ-ak ngă kâo mưn ƀuh wa Nguyễn Phú trọng kah hăng sa čô nai hloh kơ sa čô mă bruă kơđi čar. Hăng yua mơ̆ng anun yơh ngă kơ mông bưp kơplah wah dua čô khua dua bôh dêh čar – Khua git gai Ping gah Nguyễn Phú Trọng hăng Khua git gai Ping gah Tập Cận Bình ƀuh jê̆ giăm biă, mơ-ak, pơđao, tâ̆o yâo.

Yua anun, tơdơi anai, lăng ƀuh hơdôm bruă “čuh apui” mơ̆ng wa, kâo ƀu tlaih heng hong. Hmâo amăng lăm lăng ƀuh kơdrưh, muih, rơnang blang kah hăng sa čô nai pơtô čơđai anun lĕ sa tơlơi gơgrong kơjăp, kơtang, khut khăt pơgăn hưp ƀong kông ngăn, pơrai anô̆ sat, anô̆ răm. Mơnuih ƀôn sang kiăng khăp, pơpŭ ñu jing ƀơi hơdôm bruă mă anun.

 Amra ƀu dưi ruai abih ôh hơdôm tơlơi pơmin, tơlơi hơdor glăi hăng pran jua mơ̆ mơnuih ƀôn sang pioh kơ Khua git gai Ping gah Nguyễn Phú Trọng – pô git gai dưi hmâo mơnuih ƀôn sang kiăng khăp, gơyut gơyâo pơpŭ; sa kơnuih prong, lăng “Kơnuih mă bruă lĕ yôm phăn, yôm hloh”, djă pioh hơnong tơlơi pơkă, hơdip pơhlôm ha rơnuk yua kơ lŏn ia, yua kơ mơnuih ƀôn sang

Sa hơtai bôh pơdơi suă jua, ha klăk tơdjoh ia mơta lê̆ trun./.