Tạ Thị Thùy Linh hăng Nguyễn Mai Thảo Anh lĕ dua čô mơnuih ping gah phrâo mut ping gah. Abih dua gơñu lêng kơ čơđai sang hră hrăm thâo soh, hrăm anih 12, hrăm thâo 12 na nao mơtam. 3 thun hrăm gưl klâo ăt hur har ngă bruă tơpuôl, grup tơdăm dra mut phung. Dua gơñu ăt jing kơ-iăng khua anih wai lăng gah bruă hrăm hră, kơ-iăng khua grup tơdăm dra mut phung kơ anih. Thùy Linh lĕ amra mut nao hrăm sang hră tơhan pơlih pơčruih apui ƀong sang, bơ Thảo Anh lĕ mut hrăm sang hră hrăm Tơlơi phiăn dêh čar, sang hră gưl prong Đại học Quốc gia Hà Nội. Tạ Thị Thùy Linh lăi pơthâo pran jua mơak lơ̆m dưi mut ping gah:

“Lơ̆m dưi mut ping gah kâo gir run amăng djop bruă mă. Gir na nao hrăm hră laih anun kiăng hơmâo pran jua pơgôp hrŏm tŭ yua kơ bruă mơnuih mơnam amăng dêh čar”.

Nguyễn Mai Thảo Anh lĕ brơi thâo:

“Amĭ ama kâo hăng ƀing anong wa pơ sang anŏ lĕ mơnuih ping gah laih soh anun kâo đăo kơnang biă mă lơ̆m mut ping gah. Amĭ ama kâo sa črăn djru pơtô hrăm kơ kâo tơlơi thâo hluh. Amĭ ama mơak dong yua hăng djru brơi kâo”.

Nai pơtô Trần Văn Công, Khua git gai khul ping gah 2, anom bruă ping gah sang hră gưl klâo Ƀuôn Đôn brơi thâo: thun hrăm 2020-2021 sang hră gưl klâo Ƀuôn Đôn hơmâo pơmut mơnuih ping gah jing čơđai sang hră blung a. Anai lĕ bruă mă yak nao phrâo hloh mơ̆ng anom bruă ping gah amăng sang hră, yua kơ hlăk anun lu nai pơtô jing ƀing ping gah laih dơ̆ sư̆ rơbư̆ ƀu khin ôh. Tơl amĭ ama čơđai sang hră hai ăt lăi: Mut ping gah tañ đơi pơkă hăng ƀing čơđai sang hră hnơr anai:

“Hăng mơnuih ƀôn sang hur har, kiăng pơtô pơhrăm pioh pơmut ping gah lĕ sa bruă mă yôm biă mă. Yua kơ anun, rơngiao kơ tơlơi pơhing mơ̆ng nai khua anih hrăm, tơlơi pơhing ping gah brơi pơtô pơhrăm kơ ƀing čơđai sang hră, gơmơi ăt tơña na nao sang anŏ čơđai sang hră kiăng pơmut gơñu mut ping gah. Kiăng gơñu laih dưi mut amăng ping gah laih gơñu hơđong pran jua hăng pơsit bruă mă, tơlơi pơmin rơđah rơđong gir run kơtưn hloh amăng tơlơi hơdip mơda gơñu”.

Nai đah kơmơi pơtô tơlơi hrăm văn, Trịnh Thị Dung-nai pơtô sui thun laih anun ngă nai wai lăng anih hrăm 18 thun lăi lĕ: Bruă pơtô hrăm brơi čơđai sang hră hơmâo pran jua khăp kơ lŏn ia hăng thâo hluh tong ten kơ ping gah lĕ tơlơi pơmin hiam bruă hơkrŭ, tơlơi pơmin kơtưn pơhrăm drơi jăn pô lĕ sa bruă mă kiăng biă yơh, boh nik ñu hăng čơđai sang hră hrăm anih 12.

“Jing sa čô mơnuih ping gah krăo lăng hăng lăi pơthâo ding kơna tơdăm dra mut phung amăng anom bruă ping gah, ăt sem lăng tong ten abih bang ƀing čơđai sang hră, ƀing hur har kiăng ĕp tơlơi djơ̆ găl, sa lĕ lơ̆m djru ba ƀing čơđai sang hră kiăng thâo hluh kơ tơlơi pơmin mơ̆ng Ping gah ăt kah hăng pran jua thâo khăp kơ lŏn ia brơi ƀuh, ƀing čơđai kơtưn laih, gir run hloh; dua lĕ kiăng gơñu kjăp hloh amăng lu bruă mă kah hăng amăng tơlơi hơdip mơda hăng hrăm hră pơar”.

Nai pơtô Trần Vĩnh Trung, Kơ-iăng khua git gai ping gah ƀơi sang hră, Kơ-iăng Khua sang hră gưl klâo Ƀuôn Đôn lăi pơtong: bruă pơtô hrăm hăng pơmut čơđai sang hră mut ping gah anom bruă ping gah đing nao biă mă. Anom bruă ping gah ƀu kiăo tui kơ anŏ hơmâo kiăng bơni ôh, ƀu kiăo tui kơ mrô đôč ôh, kiăng pơtong rơđah anŏ tŭ yua amăng bruă mă yôm hloh.

“Anom bruă ping gah krăo lăng na nao abih bang mơnuih ping gah hăng pơmut, ƀing hơmâo mut laih mơ̆ng sang hră gưl prong, glăi pơtô pơ sang hră. Laih sem lăng, ƀuh ƀing gơñu hơmâo tơlơi gir run, kơtưn amăng bruă pơtô hrăm, pơdah  rơđah tơlơi thâo gơñu amăng bruă mă. Ƀing gơñu hur har hăng ba jơlan hlâo, gum hrŏm djop bruă mă pơ sang hră gưl prong, laih anun sa amăng hơdôm asar pơjeh hiam klă amăng bruă mă ƀing tơdăm dra mut phung amăng sang hră gưl prong”.

Tơring glông Ƀuôn Đôn hơmâo 2 boh sang hră gưl klâo. Amăng rơwang bruă anai, hơmâo pơmut 18 čô mơnuih ping gah jing čơđai sang hră. Kơnong thun hrăm 2023-2024 hơmâo 6 čô čơđai sang hră dưi mut ping gah. Ơi Ngô Cự Tâm, Khua anom pơphun bruă mă ping gah tơring glông Ƀuôn Đôn brơi thâo: rim thun anom bruă pơtô hrăm bruă kơđi čar tơring glông hơmâo ngă hrŏm ping gah tal 2 sang hră gưl klâo, pioh anih pơtô hrăm bruă kơđi čar, kiăng čơđai sang hră thâo hluh kơ ping gah ƀơi sang hră. Pơsir ĕp mơnuih pioh pơmut ping gah amăng sang hră gưl klâo mơtam, sit gơñu tơbiă mơ̆ng sang hră, hrăm abih anih 12, nao hrăm gưl prong, ƀudah hrăm bruă gơñu pơtong rơđah tơlơi pơmin bruă mă anŏ kiăng kơtưn gir pơ anăp adih.

“Tơdơi kơ čơđai sang hră gơñu hrăm abih anih 12 glăi pơ plơi pla, anom bruă ping gah tơring glông đing nao pơčrâo bruă, git gai djop anom bruă ping gah, khul ping gah amăng plơi pla ăt djop anom bruă amăng sang bruă djru ba, pơtrut pơsur. Ngă gêh găl brơi kơ ƀing čơđai anun gir run hloh kiăng dŏ kjăp na nao amăng ping gah”.