Amăng 6 blan akŏ thun, tơlơi pơhing bơwih ƀong huă mơnuih mơnam tơring čar Dak Lak ăt hơđong hăng pơđĭ kyar. Djop tơhnal pơkă lêng kơ đĭ tui soh, pơtum rơnoh prăk mơ-it mơ̆ng mơnuih mơnam, rơnoh gơnam sĭ mơdrô raih daih, rơnoh prăk sĭ mơdrô hăng tač rơngiao, rơnoh prăk pơhrui mơ̆ng bruă tuai čuă ngui lêng kơ đĭ soh pơkă hăng thun hlâo. Lu bruă mă gru grua hiam, pơtom hiăp, tơlơi pơhing djru mơnuih mơnam ăt dưi pơtrut tui, ƀuh rơđah lĕ hơdôm bruă mă bơkơtưn mă bruă čơkă hơdor glăi 120 thun hrơi akŏ pơdong tơring čar.

Ƀơi mông jơnum anai, ƀing khua mua pơ ala mơnuih ƀôn sang tơring čar Dak Lak pơčrong sai, sem lăng, pơsit 21 mơta hră pơtrun, kah hăng: Khul hră pơtrun pơdjơ̆ nao tơlơi bơwih ƀong huă, tuh pơ alin, lŏn tơnah; khul hră pơtrun pơdjơ̆ nao hơdră dêh čar pơkă; khul hră pơtrun pơdjơ̆ nao bruă mơnuih mơnam hăng lu jơlan hơdră djru ba pơkŏn; khul hră pơtrun kơ boh tơhnal krăo lăng ngă tui bruă pơtrun mơ̆ng khua mua pơ ala mơnuih ƀôn sang tơring čar thun 2024 hăng hơdră krăo lăng mơ̆ng mơnuih ƀôn sang tơring čar thun 2025 wơ̆t hăng lu hră pơtrun pơkŏn.