Hrơi anai (25/7), Khul apăn bruă Ping gah Cộng sản Việt Nam, Ƀirô Khua pơ ala mơnuih ƀôn sang dêh čar Việt nam, Khua mir sir, Kơnuk kơna dêh čar Cộng hòa xã hội chủ nghĩa Việt Nam, Jơnum min djop djuai ania mơnuih mơnam Việt Nam hăng sang anŏ pơphun yôm hrơi ngă yang mơyut jôk kơ Khua git gai Ping gah dêh čar, Khua git gai Ping gah ling tơhan ơi Nguyễn Phú Trọng. Hrơi ngă yang mơyut jôk kơ Khua git gai Ping gah dêh čar ơi Nguyễn Phú Trọng pơphun tui hơdră mơyut jôk gưl dêh čar.

Khul mơyut jôk hơmâo 35 čô mơnuih yua Khua mir sir ơi Tô Lâm ngă akŏ. Khul pơphun ngă yang mơyut jôk hơmâo 27 čô mơnuih, yua Ding kơna ding jum kơđi čar, Ding kơna Khul git gai Ping gah ơi Lương Cường ngă akŏ. Mông hơ-ŭ hơdor kơ Khua git gai Ping gah dêh čar ơi Nguyễn Phú Trọng hơmâo pơphun ƀơi Sang mơyut jôk mrô 5 Trần Thánh Tông, ƀôn prong Hà Nội, dong mơng 7 mông mơguah truh pơ 10 mông mơmŏt lơ 25/7/2024 hăng mơng 7 mông mơguah truh 1 mông tlam lơ 26/7/2024.

Hrơi hơ-ŭ hơdor Khua git gai Ping gah dêh čar ơi Nguyễn Phú Trọng hơmâo pơphun amăng hrơi mông anai mơn ƀơi Sang jơnum Thống Nhất, ƀôn prong Hồ Chí Minh hăng ƀơi plơi pla să Đông Hội, tơring glông Đông Anh, ƀôn prong Hà Nội. Tui lăi pơthâo sit nik, Khul pơphun ngă yang mơyut jôk amra ngă gêh gal, prap lui klă hloh kơ mơnuih ƀôn sang dưi nao hơ-ŭ hơdor kơ Khua git gai Ping gah dêh čar ơi Nguyễn Phú Trọng.

Lơm nao mơyut jôk, mơnuih ƀôn sang kiăng djă ba căn cước công dân dưm čip điện tử ƀudah măi telehpôn yua VNeID hơmâo pơmut mrô 2 kiăng pơdah mrô QR. Kông ang ƀôn prong Hà Nội hơmâo prap lui djop gơnam măi mok ƀơi hơdôm anih pơƀuh mrô QR kiăng mơnuih ƀôn sang gêh gal ƀiă lơm mut nao hơ-ŭ hơdor kơ Khua git gai Ping gah dêh čar ơi Nguyễn Phú Trọng. Sang anŏ Khua git gai Ping gah dêh čar ơi Nguyễn Phú Trọng pơpŭ bơni mơnuih ƀôn sang đơ đam dêh čar hăng gơyut gơyâo amăng jar kmar hơmâo mơ-it nao tơlơi tơña bla, hning rơngŏt hrŏm lơm hmư̆ hing Khua git gai Ping gah dêh čar ơi Nguyễn Phú Trọng rơngiă.

Gong phun jua pơhiăp dêh čar Việt Nam (VOV) hơmâo pơdah lăng nao rai ƀơi anăp hrơi ngă yang mơyut jôk Khua git gai Ping gah dêh čar ơi Nguyễn Phú Trọng hăng jơlan hơdră yôm phăn “Khua git gai Ping gah dêh čar ơi Nguyễn Phú Trọng: Mơnuih kơ ană plơi pla-Mơnuih kơ gru grua hing ang” mơng 6 mông 50 mơnit truh 9 mông 15 mơnit mơguah lơ 25/7/2024 amăng plang pôr pơhing VOV1, VOV2, VOV3; glông pơdah rup lăng nao rai ƀơi anăp amăng VTC1, VOVTV; hăng pơdah amăng hră pơhing điện tử VOV, VTC News hăng hơdôm plang pôr pơhing pơkŏn dong.