Nao tơl anom bruă ngă hră pơ-ar tơring čar Dak Lak amăng hơdôm hrơi akŏ thun phrâo tơdơi kơ bơyan ƀong tết tui phiăn juăt Quý Mão, ayong Trần Tuấn Song, dŏ ƀơi să Čư̆ Êbur, plơi prong Buôn Ma Thuột hok mơ-ak yua kơ hơdôm hră pơ-ar ñu kiăng hơmâo ngă tañ hloh hlâo kơ ñu pơwŏt glăi ƀôn prong Hồ Chí Minh mă bruă.

“Anai lĕ hrơi mă bruă blung a tơdơi kơ bơyan ƀong tết, lơ̆m kâo nao ngă hră pơ-ar lý lịch tư pháp. Kâo ƀuh ƀing apăn bruă lêng hmač čơkă mơnuih ƀon sang, hơdôm pok hră pơ-ar hơmâo ngă giong tañ hloh”.

Amăng hrơi mă bruă blung a tơdơi kơ bơyan čơkă thun phrâo, mrô mơnuih nao ngă hră pơ-ar ƀơi anom bruă ngă hră pơ-ar mơnuih ƀon sang tơring čar Dak Lak aka ƀu lu ôh. Samơ̆, abih bang mơnuih apăn bruă, mơnuih mă bruă lêng kơ pot glăi mă bruă hăng pran jua hur har mơ-ak, amra djru brơi klă hloh kơ mơnuih ƀon sang. Yă Đinh Thị Hương, mơnuih mă bruă gah hră pơhlôm nua mơnuih mơnam tơring čar brơi thâo:

“Abih bang adơi ayong mă bruă amăng anom bruă ngă hră pơ-ar tơring čar Dak Lak pot glăi mă bruă hăng djơ̆ hrơi mông, pran jua hur har mơ-ak. Abih bang mơnuih mă bruă ƀơi anom bruă anai laih dong anom bruă hră pơhlôm nua mơnuih mơnam pơdah pran jua hur har mơ-ak, kiăng kơ mơnuih ƀon sang ngă hră tañ, lơ̆m ƀing gơñu glăi hlơi hlơi lêng kơ mơ-ak soh”.

Ƀơi sang măi tuh tia pơkra pơjing Tân An, plơi prong Buôn Ma Thuột, kông ti pơčruih ngăn Ban Mê Green Farm pơphun hrơi mă bruă, pơkra pơjing boh sầu riêng, pơhăng kiăng kơ hơmâo gơnam blung a ba nao sĭ pơ dêh čar Khač, Japan. Yă Nguyễn Thị Thái Thanh, Khua kông ti pơčruih ngăn Ban Mê Green Farm brơi thâo, amăng bơyan ƀong tết laih rơgao, hơdôm bruă sĭ mơdrô, pơlir hơbit hăng anih anom blơi gơnam pơ tač rơngiao hơmâo tŏ tui na nao. Yua anun, kông ti hơmâo na nao hơdôm hră pơkôl blơi gơnam phrâo hăng pơphun hrơi mă bruă phrâo hur har mơ-ak.

“Ră anai, hră pơkôl blơi mut gơnam lu biă mă amăng thun 2023 anai, đĭ 3 wŏt pơhmu hăng thun 2022, hăng hơdôm gơnam anun lĕ boh sầu riêng, boh ƀơr, pơhăng hăng boh kruăi hrĕ. Kiăng kơ pơhlôm brơi djop gơnam ba sĭ mơdrô, ƀing gơmơi pơphun mă bruă mơng lơ 6 hăng gơnam ba sĭ blung a hơmâo boh sầu riêng hăng pơhăng”.

Ƀơi hơdôm đang hmua, amăng hơdôm hrơi laih rơgao, mơnuih ƀon sang tơring čar Dak Lak ăt pot glăi pla pơjing, rông hlô mơnong tơdơi kơ hơdôm hrơi pơdơi ƀong tết tui phiăn juăt. Hlơi hlơi lêng kơ čang rơmang amra pơhrui glăi hơmâo hmăi amăng thun phrâo anai, bơyan pơdai jor kơtor mơboh, nua sĭ hơđong hăng đĭ lu hloh. Ayong Phan Quốc Thế, dŏ ƀơi să Ea Kpam, tơring glông Čư̆ M’gar, tơring čar Dak Lak brơi thâo:

“Tui hăng ƀing mơnuih pla kơphê, akŏ thun phrâo lĕ akŏ bơyan không phang, yua anun kiăng kiăo tui lăng kơphê bluh abih bơnga yơh kiăng kơ pruih ia, trơ̆i than tơdơi kơ bơyan pĕ pơhrui, pruih ia kiăng kơ prap lui bơyan pĕ pơhrui pơ anăp. Tơlơi mơ̆ mơnuih ngă hmua čang rơmang hloh anun lĕ angĭn rơnang hơjan mơ-ak, sĭ hơmâo nua, yua hơdôm thun giăm anai nua trun aset hloh ngă mơnuih ƀon sang bưp tơnap tap”.

Kar kăi tui anun mơn, ƀơi hơdôm boh ƀon lan kual Yŭ kơdư ăt pơphun lu bruă mă mơng akŏ thun phrâo hăng pran jua hur har mơ-ak, gir run thun anai amra pơhrui glăi hơmâo hmăi. Amai Cà Thị Lê dŏ ƀơi ƀản Giảng Lắc, phường Quyết Thắng, plơi prong Sơn La brơi thâo: Hrơi akŏ thun phrâo anai, abih bang mơnuih amăng sang anŏ gum hrŏm buč phun toi hăng tơlơi čang rơmang amra hơmâo sa bơyan angĭn rơnang hơjan mơ-ak, djop bruă lêng kơ gêh gal, sit biă ñu hơmâo lu gơnam sĭ mơdrô kiăng sang anŏ pơhrui glăi lu ƀiă dong.

“Pơphun mă bruă thun phrâo anai, kâo čang rơmang sa bơyan pơdai jor kơtor mơboh, angĭn rơnang hơjan mơ-ak, sang anŏ pơhrui hơmâo hmăi, tơlơi hơdip trơi pơđao”.

Lơ̆m anun ƀơi kông ti pơčruh ngăn pla tơbâo pơkra sik Sơn Lan, pơphun mă bruă hăng pran jua hur har, bruă bơwih ƀong pơphun đơ đam hmua pla tơbâo mơng sang măi hăng hơdôm sang măi akĕ tơbâo. Tui hăng tơlơi pơkă, bơyan thun 2022-2023 anai, kông ti gir run pok prong đang hmua pla tơbâo đĭ 9.500 ektar, tơbâo pla rơbêh 600.000 tơ̆n, dưi pơkra rai 70.000 tơn sik. Ơi Bùi Minh Tuấn, mơnuih mă bruă ƀơi kông ti pơčruh ngăn pla tơbâo pơkra sik Sơn La brơi thâo: Mơng mơguah lơ 3 tết, ñu hrŏm hăng ƀing apăn bruă djru wai lăng đang hmua pla tơbâo mơng kông ti hơmâo nao tơl ƀon lan pơtô pơblang, pơtrut pơsur djop sang anŏ nao koh tơbâo tui hrơi pơkă kiăng pơhlôm brơi 5.000 tơn tơbâo brơi sang măi akĕ pơkra sik amăng ha hrơi, ngă kơ bruă pơkra pơjing mơng hrơi tal 4 tết mơtăm.

“Kiăng kơ pơhlôm djơ̆ hrơi mông pơkra pơjing mơng sang măi, ƀing gơmơi nao pơtrut pơsur neh met wa nao koh tơbâo truh bơyan, hiam hloh hăng črâo brơi adơi ayong pơdŭ pơgiăng lăp djơ̆ tơlơi pơkă amăng tơlơi phiăn”.

Bơ ƀơi hơdôm tơring čar Lào Cai, Yên Bái hơmâo pơphun ngă lơphet “Tết pla kyâo pioh hơdor na nao kơ Wa Hồ” hăng hơdôm bruă pla kyâo mơta mơda hơmâo ngă tui hăng akŏ bruă “Pla 1 klai phun kyâo mơtah rơwang thun 2021-2025” yua Khua dêh čar pơphun ăt hơmâo pok pơhai hơdôm bruă ƀơi 2 boh tơring čar.