Pơgôp hiăp ƀơi mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn lăi rơđah, ƀing pơ ala mơnuih ƀôn sang dêh čar tal XV hơmâo jơnum pơčrong sai, bơkơtuai tong ten, jơnum hơmâo lu tơlơi đing nao amăng mơnuih mơnam, dưi hơmâo mơnuih ƀôn sang ruah khua hăng mơnuih ƀôn sang dêh čar pơđing hmư̆. Jơnum pơčrong tal anai lĕ bruă mă djơ̆ găl pioh pơtrut tui krăo lăng dlông hloh mơ̆ng khua mua pơ ala mơnuih ƀôn sang dêh čar, djơ̆ hăng tơlơi dưi, bruă mă mơ̆ng ƀing pơ ala mơnuih ƀôn sang lĕ čih pơkra tơlơi phiăn dêh čar, krăo lăng mơ̆ng dlông hloh hăng pơsit ƀudah pơtrun kơ hơdôm bruă mă yôm amăng dêh čar.

Khua pơala mơnuih ƀôn sang dêh čar lăi pơtong, bruă prăp lui jơnum, khom tong ten, djơ̆ găl hăng tơlơi pơhing hơmâo sit nik mơ̆ng djop sang bruă gah anom bruă khua pơ ala mơnuih ƀôn sang dêh čar; pơdah thâo hnong mă bruă prong, anŏ pơkă rơhaih, lăng nao djop djel, abih bang, amăng anun hơmâo boh yôm phun jơnum prong kiăng jŭ yap, pơčrong sai tong ten, pơtum nao kơ bruă mă phun hloh kiăng pơsir tañ. Jơnum anai khom pơdah thâo rơđah rơđong, hơmâo rơnoh yôm amăng bruă mă krăo lăng, pơhlôm tŭ yua bruă mă sit nik, dưi ngă mơ̆ng djop hơdră anun lĕ pơđĭ kyar bơwih ƀong mơnuih mơnam lŏn ia.