Anun lĕ Siu Sam Ban, hrăm anih 6A2, sang hră gưl dua Nguyễn Du, să Dun, tơring glông Čư̆ Sê. Hlâo kơ anun, lơm 12 mông 30 mơnit lơ 20/5, hơmâo ƀuh adơi Siu Si Ôn (tơkeng thun 2017) hăng adơi Kpuih Nhăn (tơkeng thun 2014) pah hơpat amăng ia ƀơi čroh ia Ia Pêt, anih găn nao pơ să Dun, adơi Siu Sam Ban kơdâo trun mă dua čô anet anun. Tơdơi kơ hmư̆ hing, sang hră gưl 2 Nguyễn Du hơmâo bơni kơ pran jua khin hơtai mơng adơi Siu Sam Ban ƀơi anăp abih bang sang hră laih anun pơtă pơtăn kơ ƀing čơđai ƀu dưi nao mơnơi pơ dơnao ia, ia čroh hnoh hŭi rơhyưt ôh, hŭi blung ia. Anom bruă pơtô hăng pơjuăt tơring glông Čư̆ Sê ăt ngă hrŏm hăng Khul hlăk ai tơring glông nao čuă jơmư, brơi hră bơni kơ adơi Siu Sam Ban yua khin djru ba 2 čô čơđai anet ƀlung ia.