Kah hăng juâ̆t laih, tơring čar Kon Tum tơgŭ mă bruă ha amăng plĕ man pơdong plơi pla phrâo. Bơ ƀơi Dak Lak, khua mua tơring čar akŏ pơjing khul grup hyu čuă jơmư, pơtrut pran jua djop sang bruă bơwih ƀong huă sĭ mơdrô gir run mă bruă kiăng găn rơgao tơlơi lông lăng, mă bruă thun 2023 ba glăi boh tơhnal tŭ yua. Kơnong Jơnum min mơnuih ƀôn sang plơi prong Ƀuôn Hô pơphun mă bruă kiăng anăp nao hơdor glăi tal 15 thun akŏ pơdong glăi plơi prong.

Ƀơi mông jơnum tơgŭ mă bruă man pơdong plơi pla phrâo hăng plơi prong rơgơi akŏ thun phrâo bơyan phang 2023, 10 boh tơring glông, plơi prong ƀơi tơring čar Kon Tum hơmâo pok pơhai lu bruă mă rơđah rơđong man pơdong plơi pla phrâo hăng plơi prong thâo rơgơi, kah hăng: čuk pơkra jơlan man ƀêtông ƀơi plơi pla; ngă giong hăng pơ anăn jơlan ană plơi wai lăng mă mơtah mơda-rơgoh-hiam; jao boh thâo ia rơgơi, anah phun pla kơ mơnuih ƀôn sang....

Sa boh tơring glông tơnap tap hloh ƀơi Kon Tum, ơi Võ Trung Mạnh, Khua Jơnum min mơnuih ƀôn sang tơring glông Tu Mrông brơi thâo, tơring glông gơñu tơgŭ mă bruă ngă tui lu ring bruă, črăn bruă anăp nao kiăng ba glăi boh tŭ yua sit nik kơ mơnuih ƀôn sang hăng plơi pla:

“Tơdơi kơ jơnum jak iâu pơphun bruă mă akŏ thun mơtam Jơnum min mơnuih ƀôn sang tơring glông pok pơhai bruă mă, amăng anun pơtum nao brơi ngă klă Hơdră tơhnal dêh čar pơtrun. Pơphun mông jơnum pơdă sâm Ngọc Linh lir hơbit hăng bruă mă čơkă tuai hyu ngui kiăng ba glăi boh tŭ yua kơ mơnuih ƀôn sang, kơ anom bruă sĭ mơdrô laih anun kơ tơring glông. Pok pơhai ring bruă dăng hrĕ apui lơtrik kiăng bơngač plơi pla, dưi rơnuk rơnua nao rai, tơlơi hơdip thâo rơgơi. Tơgŭ sem lăng, pel ĕp hŭi hơmâo gơnam sĭ mơdrô ngă mă ča, gơnam hla tui anăn, gơnam ƀu tŭ yua pơdjơ̆ nao anăn sâm Ngọc Linh. Pok pơhai lu ring bruă, kơčăo bruă khom ngă tui djơ̆, tŭ yua hiam laih anun rơnuk rơnua”.

Amăng hơdôm hrơi blung a akŏ thun phrâo, khua mua tơring čar, djop anom bruă ƀơi Dak Lak, akŏ pơjing 4 khul grup nao čuă, bưp ƀô̆ mơta pơtrut mơnuih mă bruă, khua mua sang bruă bơwih ƀong huă sĭ mơdrô amăng tơring čar, kiăng găn rơgao tơlơi tơnap tap mă bruă thun 2023, ba glăi boh tŭ yua. Rơđah biă ñu, grup hơmâo nao čuă kông ty mơnuih ƀôn sang ngă khua tơčoh sum ao Lục Thiêm Dak Lak; kông ty sa ding kơna kơphê Ngon; kông ty sa ding kơna sĭ mơdrô hăng tač rơngiao 2/9; sang măi biêr Sài Gòn Dak Lak hăng kông ty pơčruh ngăn ba ia yua Dak Lak.

Ƀơi sang măi pơkra tơpai ƀiêr Sài Gòn Dak Lak, ơi Phạm Ngọc Nghị, Kơ-iăng khua git gai ping gah, Khua Jơnum min mơnuih ƀôn sang tơring čar Dak Lak hrom hăng grup hyu mă bruă hơmâo nao bưp mơnuih mă bruă, bơ ră ruai hăng mơnuih mă bruă, khua mua pơ sang măi. Amăng thun 2022, sang măi hơmâo pơkra rai 100 klăk lit ia tơpai ƀiêr, prăk duh jia kơ kơnuk kơna 900 klai prăk, dưm dưm hăng 10% rơnoh prăk jia amăng tơring čar. Sang măi ăt mă yua giăm 1 klai prăk pioh yua amăng bruă djru mơnuih mơnam tơnap tap amăng tơring čar. 

Pơ ala kơ khua mua tơring čar, ơi Phạm Ngọc Nghị Kơ-iăng Khua git gai ping gah, Khua jơnum min mơnuih ƀôn sang tơring čar Dak Lak hơmâo bơni hăng lăng yôm bruă mă, tơlơi gir run găn rơgao tơnap tap mơ̆ng sang măi tơpai ƀiêr Sài Gòn Dak Lak thun 2022, laih dơ̆ng čang rơmang hăng boh tơhnal tŭ mă laih thun blan rơgao, sang măi ăt gir run hloh amăng bruă mă, ba bruă pơkra pơjing, sĭ mơdrô amăng thun pơ anăp hơmâo boh tơhnal tŭ yua lu hloh.

“Kâo čang rơmang abih bang ƀing adơi ayong mă bruă ba glăi boh tơhnal tŭ yua lu hloh kơ thun 2022, ngă hiư̆m pă mă bruă thâo gum pơgôp, tŭ ư sa pran jua amăng bruă mă, pơčeh phrâo ƀu kơnong pơjing rai ƀiêr Sài Gòn đôč ôh, jing gơnam pơkra mơ̆ng ƀiêr, ƀing ta khom ngă djơ̆ tơhnal pơkă ba sĭ mơdrô hăng jar kmar, hnun kah hăng rơnoh pơhrui lu hloh, pơđĭ kyar hloh. Pơ ala kơ grup hyu mă bruă kâo rơkâo pơpŭ abih bang ƀing adơi ayong mă bruă hăng sang anŏ sa thun phrâo mơak klă rơnuk rơnua hăng kông ty ta jai hrơi pơđĭ kyar hloh hiam klă hloh”.

Čơkă hok mơak hơdor glăi 93 thun akŏ pơjing Ping gah laih anun hơdor glăi tal 15 thun akŏ pơdong glăi plơi prong Ƀuôn Hô, Jơnum min mơnuih ƀôn sang plơi prong Ƀuôn Hô, tơring čar Dak Lak pơphun man pơdong 4 ring bruă phun, pơtum nao kơ bruă čuk pơkra, pơhiam glăi jơlan glông hăng rơnoh prăk tuh pơ alin 37 klai, him lăng ngă giong amăng rơwang klâo blan tal 2 hăng tal 3 thun anai. Hơdôm ring bruă anai, djru hrom ngă hiam glăi jơlan nao rai, lăp hăng anŏ kiăng mơnuih ƀôn sang nao rai mơak. Mơ̆ng anun, man pơdong plơi prong Ƀuôn Hô ngă djơ̆ hơdôm tơhnal pơkă plơi prong hnong mrô III amăng thun 2025 tui huăng hră pơtrun mơ̆ng Jơnum ping gah tơring čar Dak Lak tal XVII pơkă.

Ơi Đặng Gia Duẩn, Khua Jơnum min mơnuih ƀôn sang plơi prong Ƀuôn Hô brơi thâo, hăng bruă pơphun tơgŭ mă bruă mơ̆ng akŏ thun phrâo mơtam, plơi prong mă yua tŭ yua rơnoh prăk kơnuk kơna tuh pơ alin. Laih dơ̆ng, amra pơhưč lu rơnoh prăk tuh pơ alin hơdôm črăn tŏ tui brơi kơ Ƀuôn Hô, kiăng pơjing anih anai anom phun bơwih ƀong huă, gru grua, mơnuih mơnamgah kual gah kơdư tơring čar Dak Lak, gơgrong yôm amăng bruă pơđĭ kyar amăng sa kual anet:

“Hăng sa tơlơi khut khăt prong amăng bruă mă, Ping gah, jơnum min pơ ala mơnuih ƀôn sang, jơnum min mơnuih ƀôn sang plơi prong hlăk gir run rĭm hrơi, laih anun pơphun dơ̆ng mơ̆ng bruă ngă tui ring bruă yôm jơlan glông nao rai phun kiăng hiam klă hloh, hơmâo kyâo tơ-ui mơtah mơda na nao, phrâo hloh, lăp hăng plơi prong phun. Laih dơ̆ng, pơ anăp anai, ƀing gơmơi amra pơsir hơdôm anih dŏ gun kơ bruă pơkă hnong plơi prong kiăng jak iâu lu mơnuih ngă bruă sĭ mơdrô, tuh pơ alin, hơmâo dơ̆ng lu ring bruă, djru plơi prong Ƀuôn Hô jai hrơi pơđĭ kyar phrâo hiam hloh”.