Hơdôm hrơi rơgao, tui tơlơi rơkâo mơ̆ng Khul gơgrong bruă pơgang tơlơi suaih pral mơnuih apăn bruă Ping gah dêh čar, Khua git gai Ping gah dêh čar ta ơi Nuyễn Phú Trọng phrâo git gai bruă mă, pơjrao rah tơlơi ruă, bơwih brơi tơlơi suaih pral. Ding jum kơđi čar, Grŭp ding kơna git gai Ping gah dêh čar, ƀing khua mua git gai phun hăng Khua Grŭp ding kơna git gai Ping gah dêh čar hmâo ƀơi anăp črâo ba hơdôm bôh ƀirô juăt bruă đing nao iâo pơhrui ƀing nai prin tha, ơi ia jrao, mơnuih mă bruă ia jrao, ƀing juăt bruă ia jrao hăng hơdôm tơlơi gal hloh pioh pơjrao brơi, bơwih brơi tơlơi suaih pral kơ Khua git gai Ping gah dêh čar.

Truh ră anai, yua kơ tơlơi kiăng đing nao mông pioh Khua git gai Ping gah dêh čar pơjrao tơlơi ruă klă hăng kiăng pơhlôm bruă git gai hrŏm mơ̆ng Grŭp mă bruă Ping gah dêh čar, Ding jum kơđi čar, Grŭp ding kơna git gai Ping gah dêh čar, hluai tui Tơlơi pơkă mă bruă mơ̆ng Grŭp mă bruă Ping gah dêh čar, Ding jum kơđi čar hăng Grŭp ding kơna git gai Ping gah dêh čar tal 13, ƀơi anăp Ding jum kơđi čar pơpha bruă kơ ơi Tô Lâm, Ding kơna Ding jum kơđi čar, Khua mir sir dêh čar git gai bruă mă mơ̆ng Grŭp mă bruă Ping gah dêh čar, Ding jum kơđi čar, Grŭp ding kơna git gai Ping gah dêh čar tui bruă gơgrong, tơlơi dưi hmâo Ding jum kơđi čar pơkă. Ding jum kơđi čar iâo pơthưr abih bang Ping gah, abih bang mơnuih ƀôn sang hăng abih bang ling tơhan đăo kơnang ha sa amăng tơlơi git gai mơ̆ng Ping gah, wai lăng mơ̆ng Kơnuk kơna, kơtưn gum hrŏm hơbit, pơlir hơbit, gum pran hrŏm, ngă tui lu bôh tơhnal, bruă dưi ngă yôm phăn, pơhlôm abih bang mơ̆ lŏn ia ta dưi ngă, gir run yak rơgao djop tơlơi tơnap, tơlơi lông, ngă giong klă hơdôm bruă ba tơbiă Jơnum Ping gah đơ đam dêh čar tal 13 hmâo ba tơbiă; djă pioh kơjăp hơđong bruă kơđi čar, pơgang kơjăp tơlơi rơngai, dưi pô, pơhlôm đơ đam lŏn ia hăng hơđong plơi pla dêh čar, hơđong, pơhlôm mơnuih mơnam, pơtrut kơtang pơđĭ kyar bơwih ƀong – mơnuih mơnam, bơwih brơi klă tơlơi hơdip mơda pran jua, gơnam tam kơ mơnuih ƀôn sang./.