Hmua pơdai Đất Đỏ ƀơi să Čuôr Knia, tơring glông Buôn Đôn prong rơbêh kơ 250 ektar, ataih mơ̆ng kual mơnuih ƀôn sang dô̆ rơbêh kơ 8 km. Anai lĕ kual ngă đang kơphê, tiu, hmua pơdai mơ̆ng rơbêh kơ 40 bôh sang anô̆ mơnuih ƀôn sang amăng să. Kiăng mut nao amăng kual ngă đang hmua, mơnuih ƀôn sang kơnong kơ hmâo 2 tơlơi ruah mă lĕ dar jơlan să Ea Bar ƀudah găn tơdrông toa čroh ia Nước Trong. Jơlan dar să Ea Bar ataih truh 2 wot, bơ̆ tơdrông toa lĕ ƀu pơhlôm ôh. Anai lĕ tơdrông toa ƀê tông dưi hmâo mơnuih ƀôn sang pơkra mă mơ̆ng thun 2005. Rơhaih 2 met, ƀu hmâo pơgang 2 bơnah, hmâo laih lu anih čơđang, pơčah; tơmeh tơdrông toa lĕ glut trun. Kiăng nao rai jăng jai, mơnuih ƀôn sang yua kyâo prong dlông pơhrua nao jing tơdrông toa. Ơi Nông Ngọc Quyết, sa bôh sang anô̆ mơnuih ƀôn sang ƀơi plơi Ea Kning să Ea Bar, tơring glông Buôn Đôn hmâo 1,5 ektar lon ngă đang hmua ƀơi anai, lăi pơthâo:

“Amăng anai lŏn ngă đang hmua lĕ lu biă, samơ̆ jơlan nao rai tơnap tap, biă ñu găn tơdrông toa. Tơdrông toa anai rô nao rai ƀu pơhlôm ôh”.

Buôn Đôn lĕ sa amăng 2 bôh tơring glông guai dêh čar mơ̆ng tơring čar Dak Lak. Tơlơi hơdip mơda mơ̆ng mơnuih ƀôn sang hluai tui kơ bruă đang hmua. Lu kual ngă đang hmua jơlan nao rai tơnap tap. Tui hăng ơi Bùi Văn Vinh – Khua Anom bơwih ƀong gah anom mă yua tơring glông Buôn Đôn, nao pel ĕp đơ đam tơring glông hmâo 12 bôh tơdrông toa pơdŏng pioh nao rai mơ̆ng mơnuih ƀôn sang. 4 thun hlâo adih, mơ̆ng ngăn rơnoh djru mơ̆ng Anom bruă jơlan nao rai Việt Nam, tơring glông hmâo pơdŏng laih 2 bôh tơdrông toa kơjăp ƀơi hơdôm bôh să Ea Huar hăng Ea Wer, abih bang prăk mă yua 24 klai prăk. 10 bôh tơdrông toa dô̆ glăi khom hmâo năng ai ñu 35 klai prăk pơdŏng lĕ akă pơpha prăk ôh. Ơi Bùi Văn Vinh, brơi thâo:

“Tơring glông hmâo rơkâo laih dêh čar, tơring čar djru rim bôh tơdrông toa năng ai ñu mơ̆ng 300 truh 400 klăk prăk pioh pơkra kơjăp, djru neh wa nao rai ngă đang hmua, pơgiăng gơnam tam gêh gal, čơđai sang hră nao sang hră pơhlôm amăng bơyan hơjan ia ling dăo”.

Hăng anô̆ phara lĕ tơring čar čư̆ siăng, lŏn mơnai prong hăng hmâo lu čroh hnoh, tơring čar Dak Lak khom pơdŏng lu tơdrông toa nao rai. Amăng rơwang 2016-2022, mơ̆ng prăk djru mơ̆ng Anom bruă jơlan nao rai Việt Nam hăng Jơnum min djuai ania, tơring čar hmâo pơdŏng 97 bôh tơdrông toa, hmâo nua 200 klai prăk, ƀơi hơdôm bôh să kual I, II hăng III gah hơdôm tơring glông kual asuek, ataih. Ơi Lê Công Du – Kơ-iăng Khua Gơnong bruă jơlan nao rai dŭ pơgiăng tơring čar Dak Lak brơi thâo, đơ đam tơring čar ră anai dô̆ hmâo 210 bôh tơdrông toa răm rai, khom pơkra phrâo pơ ala nao, abih bang prăk mă yua năng ai ñu 400 klai prăk.

“Prăk kiăng yua pơkra tơdrông toa lu biă, lơm anun ngăn rơnoh tuh pơplai mơ̆ng tơring čar ƀu hmâo lu ôh, ƀing gơmơi hmâo ba tơbiă rơkâo prăk djru mơ̆ng dêh čar tuh pơplai kơ tơring čar Dak Lak tañ tuh pơplai pơkra hơdôm bôh tơdrông toa răm rai dô̆ glăi. Mơ̆ng anun djru bruă nao rai dŭ pơgiăng gơnam kơ neh wa”.

Găn nao rai ƀơi hơdôm bôh tơdrông toa hơđăp răm rai, tơdrông jăng jai hmâo lu tơlơi truh amra ƀu thâo ôh, samơ̆ yua kơ tơlơi hơdip mơda neh wa ƀơi kual asuek Dak Lak ăt khom găn nao rai mơn rim hrơi./.