Mơguah akô̆ rơwang hrơi tơjuh, pô apăn bruă Anom wai lăng glai klô mrô 8, Kual Pơgang glai klô Nam Nung (tơring čar Dak Nông) pơphun hyu tir glai. Grŭp hyu tir hmâo 4 cô mơnuih, bruă mă pơkă hlâo rơbêh kơ 20km truh pơ̆ kơčŏng čư̆ Nam Jer Bri (dlông giăm truh 1.600m). Amăng anun rơdêh thut kơnong kơ dưi nao 6km, dô̆ glăi khom rơbat tơkai găn rơgao hơdôm blah glai klô jơlan nao rai tơnap tap kơdư dơnung. Hlâo kơ pơphun nao, Khua Anom ayong Nông Văn Sức lăi pơthâo bruă mă phun kơ ƀiă biă mă ñu 3 hrơi amăng glai klô. Pok măi mok “Smart mobile Nam Nung” amăng telephone, ñu pơmut anăn păn anun lĕ anih anom nao, mrô mơnuih hăng anăn rim mơnuih amăng grŭp. Ayong Nông Văn Sức brơi thâo, mă yua măi mok anai ngă tui giăm hmâo 1 thun hăng anai hăng brơi ƀuh ba glăi bôh tŭ yua sit nik.

 “Mă yua măi mok anai lĕ yua hrŏm kơ hơdôm bôh anom dô̆ gak amăng kual pơgang glai. Mă yua măi mok anai klă biă, lăng tui rah hăng ngă brơi bruă mă pơplih phrâo rah. Kâo kiăng čih glăi amăng hră hla pơ-ar, tơlơi čih mơ̆ djă pioh amăng măi hlao. Dưi wai lăng adơi ayong amăng anom ngă tui bruă mă mơ̆ng pô mơ̆n. Ƀu hmâo hyu tir mơ̆ lăi hyu tir, yua kơ hmao mrô djă pioh, rup amăng anun, kiăng sut lui, kiăng gĕp akon dưi mơn”.

 Ơi Phạm Thế Mãn, gơgrong gah Anom bruă kơsem min bôh thao phrâo hăng gum hrŏm jar kơmar – Kual Pơgang glai klô Nam Nung brơi thâo, “Smart mobile Nam Nung” lĕ anăn mă yua, yua kơ sa bôh anom kơsem min gah glai klô ƀơi Hà Nội pơjing phara ha jăn kơ anom. Anăn anai hluai tui pơsit anih anom tui êgrang ayuh anun dưi mă yua ƀơi abih bang anih anom, amăng ayuh hyiăng sat hai, lăp djơ̆ hăng bruă pơgang glai klô, pơgang lu mơta ra mơnong. Hơdôm mrô djă pioh, rup čih djă pioh lơm hyu tir kơ lu mơta ra mơnong, hlô mơnong, rok tok kyâo pơtâo yôm ƀudah mă kyâo ƀu djơ̆ phiăn, phă glai, rô̆ mă lŏn glai… hmao măi čih pioh glăi mă abih ƀơi măi phun amăng ƀirô lơm hmâo jua kĕ telephone. Hluai tui hơdôm mrô djă pioh, rup yua grŭp, khul hyu tir brơi thâo, khua git gai anom amra tañ ba tơbiă hơdôm jơlan gah pơsir lăp djơ̆ hăng tơlơi phrâo hmâo amăng bôh nik. Hrŏm hăng anun, hluai tui anăn anai dưi wai lăng bruă mă mơ̆ng rim mơnuih apăn bruă, mơnuih mă bruă. Ơi Phạm Thế Mãn lăi:

  “Gah anăn mă yua măi tui hơdră smart mobile lĕ ƀơi anai ta dưi pel ĕp lĕ adơi ayong gơñu hyu tir pơgang glai nao dơlăm dơ̆ hơpă, dưi nao pơ̆ anih anom hơpă hăng rơnoh ñu hyu pel ĕp mơ̆ng adơi ayong rơđah rơđông hloh. Hăng lơm hyu pel ĕp amra dưi thâo hơdôm drơi hlô mơnong, rok tok kyâo pơtâo yôm amra djă pioh amăng măi pô”.

  Ơi Phạm Trọng Thuỷ, Kơ-iăng Khua Kual Pơgang glai klô Nam Nung brơi thâo, hăng kual lŏn prong giăm truh 22.000 ektar, raih prong amăng anih anom 3 bôh tơring glông Krông Nô, Dak Glong hăng Dak Song, kual pơgang glai hmâo rơbêh kơ 120 mơta djuai hlô mơnong, rok tok kyâo pơtâo yôm hmâo anăn amăng hơdrôm hră mriah Việt Nam hăng rŏng lŏn tơnah. Bruă pơgang glai klô tơnap tap biă, pơgang lu mơta ra mơnong jai hrơi jai lu lơm anun khul mơnuih mă bruă ƀu lu, khom ngă brơi anom hmâo hơdôm tơlơi pơplih phrâo. Kual pơgang glai klô Nam Nung hmâo mă yua laih hơdră phrâo dăng kông, măi mok por ƀu hmâo mơnuih mơgăt, mă yua amăng telephone hơdečh hmar… kiăng pơđĭ tui bôh tơhnal bruă pơgang glai klô. Ơi Phạm Trọng Thuỷ pơtŏng sit, hăng tơlơi gum djru yôm mơ̆ng măi mok, hơdôm bruă ngă sat truh kual pơgang glai klô amra tañ thâo hăng pơgăn.

  “Kual pơgang glai klô Nam Nung hmâo mă yua laih bôh thâo phrâo măi mok amăng bruă wai lăng, pơgang glai klô kah hăng mă yua măi smart, dua lĕ mă yua măi mok por ƀu hmâo mơnuih mơgăt pioh kơ bruă lăng tui, tŭ mă tơlơi pơplih mơ̆ng glai klô, 3 lĕ mă yua măi lăi pơtă apui ƀong. Mơ̆ng anun, ngă gal brơi hloh kơ khul wai lăng, pơgang glai klô, hrơi mông hyu tir, pơgang, anih anom lăng tui prong hloh. Plai ƀiă ngă bơdjơ̆ nao djop djuai hlô mơnong, rok tok kyâo pơtâo yôm, pơgăn hơdôm bruă ngă săt truh kông ngăn glai klô”.

Mă yua măi mok pioh pơgang glai klô, hơdră ngă ba glăi bôh tơhnal prong dưi hmâo Kơ-iăng Khua dêh čar ta ơi Trần Lưu Quang djă pioh, bơni lơm hyu čuă lăng ƀơi sa dua kual pơgang glai klô ƀơi Dap Kơdư lơm blan 5 phrâo rơgao. Amăng mông jơnum đơ đam dêh čar kơ bruă wai lăng, pơgang glai klô pơphun ƀơi tơring čar Kon Tum, Kơ-iăng Khua dêh čar ta ơi Trần Lưu Quang lăi rơđah, anai lĕ hơdră pioh bruă glai kyâo đơ đam dêh čar hrăm tui.

 “Mă yua măi mok, flycam gum hrŏm pơgang glai klô, flycam por thâo krăn amuñ amĕ. Dua dong anun klă: rim mơnuih apăn bruă wai lăng, mơnuih hyu tir pơgang glai klô dưm nao sa črăn amăng telephone djă hyu, rim mơnuih khom nao djop 120km sa blan, hlơi hyu tir akă djop lĕ, pô anun ƀu ngă giong bruă jao, ƀu tơnap ôh, sa črăn anet nao hrŏm hăng telephone rim mơnuih, pơ ala kơ khom pơmut dong mơnuih mă bruă, ƀing ta pơplih tơlơi pơmin amra lăp djơ̆ hloh”.

 Amăng hơdôm hrơi glai klô hmâo arăng ngă sat jai hrơi jai hơgom, khul pơgang glai klô ƀu lu lĕ, bruă mă yua măi mok phrâo nit sik jing jơdră ngă tui yơh ƀơi anăp tơlơi kiăng pơplih mrô mơ̆ng Lŏn ia./.