Jăt mờ hơ̆, tơngai bơh nam 2023 tus 2025, gùt càr lơh ngan geh tai 186 thôn, ƀòn geh khà ƀòn lơgar pa. tàm kơnhoàl tiah nhàr lơgar Chư Prông, tàm 6 nam do neh hòi jà tă geh rơlao 600 tơmàn đong bơh ală broă lơh, rơndăp broă lơh nàng pơgồp bal drơng bơ̆t bơtàu Ƀòn lơgar pa. Ƀòn O Ngol, sàh Ia Vê là dùl tàm ală ƀòn lam lài, neh lơh geh khà ƀòn lơgar pa kấp kơnhoàl.

Ồng Siu Huỳnh, Ƀí thư Ci ƀộ mờ kung là Kwang atbồ ƀòn O Ngol pà git, ƀòn geh mờr 120 hìu, mờ 500 nă làng bol ndrờm là kòn cau Jrai dê lơm. Kơnờm lơh jăt broă ƀòn lơgar pa den tàng rài kis làng bol neh tam gơl uă mờ kờñ pal gàr kơl jăp sùm ală jơnau neh lơh geh. “Ƀòn bol añ lơh jăt broă bơ̆t bơtàu ƀòn lơgar pa, geh jăt khà broă ƀòn lơgar pa kấp kơnhoàl bloh. Mờ gơnoar Ƀí thư Ci ƀộ mờ kung là Kwang atbồ ƀòn, añ lam làng bol lơh ngan gàr sùm cồng nha niam bơnĕ ƀòn neh lơh geh. Pơnyờ să ngan geh kơnhoàl rơwah lơh lài bè “ƀòn lơgar pa pơnrơ jăk”, jơh ală làng bol pal lơh ngan, dùl nùs bal lơh gùng lòt, lơh pơngàr, lơh suơn hìu nhă tơlir niam, gùng ƀòn kloh niam. Tàm hơ̆ uă ngan là ƀòn bol añ neh geh ồs đèng àng sòl tàm gùng mờ 34 pang pil măt tơngai. Bol añ chờ hờp ngan tài làng bol, ală bơyô bơh tiah ndai tus còp, cau lơi kung jờng ƀòn bol añ trồ mang àng niam broă lòt rê lơngăp lơngai”.