Drà ràng tơlik phan OCOP tàm tiah đah tô măt tơngai lik geh lơh uă ngan mờ rơlao 250 hìu ràng tăc phan bơh ală bơta phan OCOP mờ phan geh lơh bơh broă lơh sa suơn sre, phan tàm dà càr Quảng Ninh bal mờ uă càr, ƀòn dờng tàm gùt lơgar. Lòt sùm gùt dar ală hìu ràng tăc phan, lŏ Mai Chi, pà git: “Pah dơ̆ ràng tơlik phan geh pờ den añ gŏ bơta niam, măt phan geh lơh ngai sơlơ niam, ală bơta phan ngai sơlơ geh uă, uă hìu ràng tăc phan bơkah niam rơlao”.

Geh bal nùs nhơm kơlôi bè lŏ Mai Chi dê sơl, bi Lê Thế Trung pà git: tŭ do tàm ală mpồl siêu thị sùm geh broă lơh, hìu ràng tăc phan, dra tăc phan OCOP, bơh phan biăp, kơnuh, plai chi kloh niam, phan sa tus mờ phan ngui ndrờm geh anih lơh gơs loh làng geh kŭp màh QR…, den tàng cau ngui sa iang nùs ngan rơwah: “Lài do, bơh phan sa geh kwơ tus mờ ală phan sa geh lơh mờ măi mok pa, hìu añ mờng blơi phan bơh lơgar bơdìh lơh. Tŭ do tàm drà kă bro geh phan OCOP phan lơh tàm lơgar tài priă tăc di pal, bơta bơkah ngai sơlơ gơguh niam mờ anih lơh gơs loh làng den tàng añ rơwah nàng blơi. Tàm hơ̆ uă ngan là ală phan geh kwơ iang nùs ngan blơi nàng drơng tàm broă ngui sa hìu nhă in”.

Bơh tŭ lam lơh jăt dơ̆ lam sồr cau Việt Nam ai lài ngui phan Việt Nam, tus tŭ do, phan OCOP neh lơh geh nùs nhơm cau ngui sa kờñ mờ broă lơh ngan tơnguh bơta bơkah niam. Phan OCOP neh geh măt tàm jơh ală mpồl siêu thị dờng dềt mờ ală hìu tăc phan ƀuơn. Bơtàu tơnguh phan OCOP ờ mìng tơnguh uă bơta bơkah, niam, lam gŏ ù tiah lơh mờ gam dong kờl tơl nă làng bol, hìu kă bro geh tai jơnau git wă, kơnòl gơwèt mờ tơl bơta phan ai tăc tàm drà kă bro. Bơh tŭ hơ̆ tam gơl bồ tơngoh lơh sa suơn sre tus mờ bồ tơngoh lơh gơs phan kă bro, tơrgùm bal mờ dunia. Mpồl lơh broă bal Măng Đen Forest, kơnhoàl Kon Plông, càr Kon Tum là dùl jơnau kờñ gơs pơniơu lài ngan là broă tơnguh bơta niam phan OCOP, lơh măt kă bro phan krơi is tiah do dê. Pah nam, mpồl lơh broă bal lơh geh rơlao 100 tấn kơphe arabiaca. 5 jơi phan kơphe lơh gơs ndai geh khà dờp OCOP bơh 3 tus 4 sơrmañ kung gam tăc niam ngan tàm drà kă bro tàm lơgar. Bi Lê Nhật Tiến, Phó lam bồ Mpồl lơh broă bal pà git: “Broă lơh phan OCOP niam ngan tàm bơta là dong kờl Mpồl lơh broă bal git gùng dà broă lơh phan bơh lài tus mờ broă tăc tàm drà kă bro nàng lơh bè lơi phan geh lơh niam, bơkah ngan. Bơdìh 25 lồ ù Mpồl lơh broă bal gam tam pa mờ sơnka sền gàr, den bol añ gam rề ơnàng tiah tam, tềng đăp măt là lơh broă bal tus tơl hìu hơ geh tăc phan ai làng bol lơh broă sa in”.

Mò Lê Thùy Kim Loan, Lam bồ dờng Kông ty Kổ phần Pyloherb, do là kông ty ngui 15 khà măt phan OCOP càr Kon Tum dê tàm gah phan lơh sơnơm pà git: “Phan OCOP là khà dờp bơh phan geh bơta krơi is bơh ù tiah là uă ngan. He lơh jăt jơnau dờp OCOP den he rơ̆p gŏ phan bơh he dê geh bơta krơi is bloh. Mìng is tem OCOP mờ geh ai ngui tàm càr  neh cèng geh bơta niam phan geh lơh krơi is bloh”.

Jăt Tiến sìh ồng Nguyễn Ngọc Tuyên, atbồ Anih lơh sa mờ atbồ Tây Nguyên đơs, tŭ geh sră dờp OCOP hơ̆ là neh lơh măt kă bro mờ cau ngui sa neh git tus. Den tàng, ală mpồl lơh sa kă bro pal tam gơl sùm bồ tơngoh lơh mờ tăc phan tàm rài măi mok pa: “Broă crăp sơrmañ ai phan OCOP in mìng là pang sră cih yal ờ gŏ di măt kă bro, mờ măt kă bro pal là nùs nhơm pin dờn bơh cau blơi phan dê. Tŭ geh sră cih yal den pal lòt bal mờ yal bơta bơkah nàng ai tơngŏ măt kă bro bơh he dê den tŭ hơ̆ phan hơ̆ sồng gơguh bơta kwơ. Bơdìh hơ̆ tai, ngui bơta chài măi mok pa nàng lơh niam tàm tơngai tŭ do”.

Cồng nha cèng geh bơh broă lơh OCOP neh dong kờl lơh gơguh bơta geh, bơta kwơ ală phan geh lơh bơh tiah dê, pơgồp bal tàm broă bơ̆t bơtàu wơl gah broă lơh sa suơn sre pơgồp bal mờ bơtàu tơnguh broă lơh sa suơn sre bal mờ lòt nhơl ƀòn lơgar. Nùs nhơm pin dờn bơh cau ngui sa gơwèt mờ phan OCOP lơgar Việt Nam pà gŏ ală phan lơgar Việt Nam ngai sơlơ geh drà kă bro tàm lơgar kờñ, pơgồp bal tàm broă lơh pràn lơh sa bơtàu tơnguh.