Ơm tàm sơnam mờr 80 mơya cau ling yau ồng Lê Trương Thận, ơm tàm sàh Cư Êwi, kơnhoàl Cư Kuiñ kung gam pràn kơl dang, ngăc ngar, chài ngan ngui điện thoại ngăc ngar nàng pờ ală ding dà tuh dà tềm pềr ai suơn chi bơh he dê. Trồ mang ồng kung sòl đèng bơkiar ai bơkào sầu riêng in. Ƀùi drim den tơryang tơryồng ngan sơng ka sền gàr suơn pal jràng mờr ai tơnhào. Ồng Thận pà gĭt, ồng sơnđờm mut lơh broă tàm ƀòn lơgar pa Dăk Lăk mìng bơh 3 sào ù ro kơn rañ lơm. Mơya tŭ do, hìu bơnhă ồng neh geh broă lơh tam uă phan tam tàm 2 lồ, priă lơh geh pah nam rlau 1 tơmàn đong. Ồng Thận pà gĭt:“Añ là cau ling den pal đòm jat nùs nhơm Cau ling Wa Hồ dê, jơh nùs bơsong kal ke, tŭ Mpồl cau ling yau halà gah Dong kờl broă lơh sa geh pờ ơdŭ lơi là añ tus bal bơsram ơdŭ hơ̆, kờp bal mờ tam phan bal mờ ròng phan. Pơnđơl pràn lơh ngan tus tŭ do neh geh 2 lồ, ai ală bơta phan tam mut tam, uă ngan là bă ù tam sầu riêng, nam do ai tơnhào pơgăp 100 tờm, halà bè plai jràng kung geh pơgăp bơh 5 tus 6 tấn, plai gơ àl nam do rlau 50 tờm dềt sơnđờm gơ ai tơnhào nam sơnrờp”.

Tàm kơnhoàl Cư Kuiñ, càr Dăk Lăk ală Cau ling yau geh priă lơh geh priă tơmàn bè ồng Thận ờ di là ờ hoan geh ngan. Cau ling yau ồng Nguyễn Trung Thành, ơm tàm thôn 7, sàh Ea Ning, kung là dùl nă cau pơn rơ jak geh priă lơh geh rlau 1 tơmàn đong pah nam bơh broă lơh tam phan mờ ròng phan tàm pơdar:“Be añ ròng bơh 180 tus 220 nơm, gam wơl tam rlau 2 lồ kơphê, plai gơ àl, tiêu, sầu riêng, ròng phan jài ai è phan ròng nàng tuh ai ală phan tam jŏ nam mờ tờm chi sa plai in. Kung bơh cau ling Wa Hồ sơl den he gơ lơh gĭt rlau mờ cau ndai đau sơl, nha ngan glòm nha sèt. Pơgăp mờ do 2 nam añ kung geh dong kờl 2 mpồl hìu bơnhă cau ling yau ơm tàm thôn 7 do 60 tơlak đong ờ ai priă cồng, nàng khi in ròng phan jài mờ bơcri priă lơh sa jài”.

Bơdìh mờ ală cau dồ nă să dong kờl ai tơl rài kis geh ngan in, nàng lòt bal dong kờl cau ling yau hìu bơnhă rƀah mờ hìu bơnhă pa lik klàs rƀah in, bơh nam 2013 tus tŭ do, ală kấp mpồl cau ling yau tàm kơnhoàl Cư Kuiñ neh tă pơgồp rlau 800 tơlak đong nàng blơi rlau 40 nơm kơnrồ mờ lơh 8 nơm sră tềm pềr pà ai ală cau tàm mpồl kal ke in; lơh kes priă tàm dơlam is lơh geh 6 tơmàn đong ai 300 nă cau tàm mpồl in càn mờ ờ sa priă cồng uă. Kơnờm bơh hơ̆, tus tŭ do jơh gùt kơnhoàl mìng gam 20 hìu bơnhă cau ling yau gơwèt hìu bơnhă rƀah mờ hìu bơnhă pa lik klàs rƀah.  

Jat ồng Võ Công Tường, Phó Củ tịc Mpồl Cau ling yau kơnhoàl Cư Kuiñ, tàm khà mờr 2 rơbô 900 nă cau tàm mpồl cau ling yau tàm kơnhoàl Cư Kuiñ, geh tus rlau dùl gùl là hìu bơnhă pas mờ pas đau. Do gơ gơs là ală bơta tờm pơn rơ ngan, jơh nùs tàm bơtàu tơnguh lơh sa hìu bơnhă mờ tus bal ală broă lơh srơh tàm ƀòn lơgar dê, tă pơgồp dà kơl hề cau dê tàm broă bơt bơtàu ƀòn lơgar pa. Tàm ală nam do, kwang bàng cau tàm mpồl cau ling yau jơh gùt kơnhoàl neh pa is rlau 10 lồ ù mờ gĭt nđờ tơmàn đong priă mat nàng lơh gùng lòt rê, pơgồp bơnah bal mờ ƀòn lơgar lơh geh bơta ƀuơn ngan ai làng bol in lòt rê. Geh mpồl cau ling yau neh tă pơgồp gĭt nđờ rơhiang tơlak đong. Ồng Võ Công Tường, đơs:“Ală oh mi lơh krơh niam ngan, is ồn là tàm broă lơh bơt bơtàu ală broă lơh lơh sa, bơtàu tơnguh lơh sa. Bulah tàm rài kis lơi ală oh mi kung đòm jat niam nùs nhơm ờs mờng “Cau ling Wa Hồ dê”, lơh niam ală broă lơh lơh sa, lơh bơnàng jă nàng pơndờm pơnđiang, pơn jờng ală cau tàm mpồl ndai in sơlơ tơnguh tai lơh broă sa mờ bơtàu tơnguh lơh sa. Bulah ơm tàm gơnoar broă lơi kung lơh sir gơnoar broă, kơnòl broă bơh he dê”.

Lik bơh tiah ling klàng, ală cau ling yau tàm kơnhoàl Cư Kuiñ, càr Dăk Lăk kung gam gàr kơ̆ nùs nhơm “Cau ling Wa Hồ dê”- nùs nhơm kơ̆ dơn, geh kơnòl, geh bơta nđàc. Tàm ală bơta lơh sa, khi pơn jat tai là ală cau lam lài, lơh pas di pal, mơkung lơh gơrề uă nùs nhơm tam klăc, tàm dong tàm kờl bal tàm mpồl bơtiàn, kis wil tơl nùs nhơm bơta nđàc mờ cau ling bal dê.