Đảng ƀộ sàh tiah nhàr lơgar Rờ Kơi, kơnhoàl Sa Thầy geh 13 ci ƀộ mờ 176 nă đảng viên, tàm hơ̆ geh 6 Ci ƀộ thôn jơi bơtiàn dồ êt nă cau. Pah nam, bơh bơto pơlam bơh Tỉñ ủy càr Kon Tum mờ Huyện ủy kơnhoàl Sa Thầy dê, Đảng ủy sàh lam lơh jăt di tŭ ală tơngume mìng dùl tơngume bơsram mờ lơh jăt krơh Wa Hồ dê tus tơl ci ƀộ, thôn, ƀòn in. Ồng A Êl, kra ƀòn thôn Gia Xiêng, pà gĭt: ờ mìng 14 nă đảng viên tàm ci ƀộ lơm geh jơnau hơ bơsram mờ lơh jăt Wa Hồ mờ geh bal làng bol tàm thôn kung lơh jăt is sơl ală jơnau bơto sồr bơh Ồng dê tàm tơl broă lơh loh làng. Jăt ồng A Êl, broă bơsram mờ lơh jăt Wa Hồ dong đảng viên sơlơ krơh tai, kơnòl rlau tai mờ làng bol tơryăng tơryồng lơh broă lơh gơlik phan lơh jăt di jơnau sồr, kơrnoăt boh lam Đảng, Dà lơgar dê: “Đảng viên tàm ci ƀộ sùm lơh krơh, lòt lài tàm tơl broă nàng làng bol ƀòn lơgar in đòm jăt. Ală broă lơh tơrlòng lài bơtàu tơngguh lơh sa hìu bơnhă bơh đảng viên tàm thôn dê geh cồng nha ngan, đảng viên dong làng bol chi sơntìl, kòn sơntìl nàng bơtàu tơngguh lơh sa. Làng bol tàm thôn kung tơryăng tơryồng lơh sa, lơh jăt is gùng dà Đảng dê, kơrnoăt boh lam Dà lơgar dê. Bơsram Wa Hồ làng bol bơsram bơh broă dềt rơhền ngan bè ơm kis sàu sa sàng goh tus broă dờng bè tam klăc mpồl bơtiàn”.

Nàng lơh gơrề pràn kơldang broă bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh, 10 nam do, Tỉñ ủy càr Kon Tum neh lơh jăt loh làng, bơ̆t bơtàu mìng dùl tơngume dipal mờ bơta mùl màl mờ kơnòl broă cíñ trị càr dê ai tơl nam in, tơl tŭ tơngai in  nàng lơh jăt ring bal mờ geh cồng nha uă. Bơh nam 2023 tus tŭ do là “Bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê bè jơh nùs jơh tồr, pơgồp bơnah bơ̆t bơtàu càr Kon Tum bơtàu tơngguh mhar mờ kơnhăp”. Đại tá ồng Lê Minh Chính, Đơng lam cíñ trị Gah đơng lam Mpồl ling Sền gàr tiah nhàr lơgar càr Kon Tum, pà gĭt mùl màl mpồl lơh broă he dê bè do: “Bol hi pơgồp bal ală dơ̆ hòi jà, ală jơnau lơh nền tàm pơrjum mìng dùl tơngume bè Jơnau lơh nền tàm pơrjum sồ 847 Anih duh broă Đơng lam Đảng Dà lơgar dê bè lơh jăt nùs nhơm Cau ling Wa hồ dê, kràñ cê kơ̆ dơn dră wơl nùs nhơm nă să is tàm bơta pa. Dơ̆ hòi jà lơh jăt bơhiàn ờs mờng bơh yau, tă pơgồp dà kơlhề pràn jak, dipal mờ măt sơnđan Cau ling Wa Hồ dê tàm bơta pa. Tàm ală tŭ lam lơh jăt tơnguh tai broă lơh lòt sền, jăt sền ală mpồl đảng, đảng viên mơkung gơ jăt bal mờ broă lơh jăt kơnòl broă tơrgùm tàm ală broă tam gơl pràn jăt Jơnau lơh nền tàm pơrjum Đảng ƀộ neh sồr lơh”.

Lơh jăt dơ̆ lam sồr “Bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê, tus tŭ do, càr Kon Tum neh lơh geh 2 rbô 760 broă lơh tơrlòng lài jak, broă lơh geh cồng nha. Pơnrơ ngan bè ală broă lơh tơrlòng lài: Bơyai lơh pơrjum bồ tơngoh gơ jăt bal mờ bơsram mờ lơh jăt Wa Hồ; bơsram Wa Hồ bè nùs nhơm tàm dong, tàm kờñ, dong kờl gơ̆p bơtàu tơngguh lơh sa- mpồl bơtiàn, tơn jơh jơgloh tơrmù rƀah, bơ̆t bơtàu rài kis pa, sền gàr tiah ơm kis; bơ̆t bơtàu mờ bơtàu tơngguh uă rài kis niam chài…Mò Bùi Thị Vui, Phó Lam bồ Mpồl Mblàng yal bơto bơtê mờ Hòi jà làng bol Tỉñ ủy càr Kon Tum, đơs nền: “Broă lam lơh jăt Jơnau sồr sồ 05 neh dờp geh bơta lơh jăt bal mờ tus bal jơh nùs, niam ngan bơh kwang bàng, đảng viên, làng bol tàm càr dê. Bơh hơ̆ lơh geh bơta tam gơl loh làng bơh gĭt wă tus lơh broă bơh ală kâp ủy, gơnoar ătbồ, anih lơh broă, ƀòn lơgar, mpồl lơh broă dê. Nùs nhơm lơh broă bơh mpồl kwang bàng, kông cưk dê ngai sơlơ jak chài, geh cồng nha, rềp làng bol, đềt mềr mờ làng bol”.

Bơh broă bơsram mờ lơh jăt Wa Hồ, 10 nam do tàm ù tiah càr Kon Tum neh geh uă mpồl cau, cau dồ nă să is pơnrơ ngan tàm tơl broă geh jờng rơ, pà khà jờng. Jơh gùt càr geh 17 mpồl cau, cau dồ nă să is geh Thủ tướng Cíñ phủ pà Sră jờng rơ; 9 mpồl cau, cau dồ nă să is geh Mpồl Mblàng yal bơto bơtê Dà lơgar pà Sră jờng rơ…Broă lam lơh jăt geh cồng nha Jơnau sồr bơh Ƀộ Cíñ trị khoă XII dê bè “Lơh pràn bơsram mờ lơh jăt bồ tơngoh, nùs nhơm mờ rài kis Hồ Chí Minh dê” kung là jơnau kwơmàng nàng càr Kon Tum đòm jăt bồ tơngoh, nùs nhơm mờ rài kis Ồng dê săc rwah geh ală broă tờm, tam gơl pràn tàm ală broă lơh jăt geh cồng nha jơnau kờñ, kơnòl broă bơtàu tơngguh tàm 10 nam do.