Drim òr (19/05), Tỉñ ủy càr Kon Tum bơyai lơh pơrjum tơn jơh 10 nam lơh jat Jơnau sồr sồ 05 bơh Ƀộ Cíñ trị khoă 12 dê “bè lơh pràn bơsram, lơh jat bồ tơngoh, nùs nhơm, rài kis mờ broă lơh Hồ Chí Minh dê". Bơh 10 nam lam lơh, càr neh lơh ngan ngồn tơngume mìng dùl tơngume rềp mờ bơta geh ngan, kơnòl broă tơl tơngai lơh broă dê.

Ală kấp, gah broă neh lơh 2 rơbô 760 broă lơh niam, broă lơh geh cồng nha, lơh gơrề làm uă jrô ơnàng broă bơsram mờ lơh jat krơh niam Wa Hồ dê tàm mpồl Đảng mờ mpồl bơtiàn làng bol ơm kis. Tàm pơrjum, Tỉñ ủy càr Kon Tum jờng rơ, jàu sră jờng rơ bơh Bí thư Tỉñ ủy mờ sră jờng rơ bơh Củ tịc Anih duh broă Làng bol càr ai 30 mpồl cau, 46 nă cau dồ nă să is geh cồng nha pơn rơ ngan in. Do là dơ̆ nàng jơh gùt càr pơn jat tai đơs nền gơnoar broă, gơtha geh ngan bơh broă bơsram mờ lơh jat jơnau sồr Wa Hồ dê tàm broă lơh bơt bơtàu Đảng mờ bơtàu tơnguh tiah do dê.

Kung tàm drim òr, Mpồl lơh kơnòl broă sùm Tỉñ Đoàn càr Lâm Đồng bơyai lơh Pơrjum tơn jơh 10 nam lơh jăt Jơnau sồr sồ 05 bơh Ƀộ Cíñ trị khoă XII dê, mờ jờng rơ Ơruh pơnu gơguh jăk lơh jăt jơnau bơto sồr Wa Hồ nam 2025. Ală nam do, gùt càr Lâm Đồng neh lơh geh cồng nha uă broă lơh ơruh pơnu ală kấp dê mờ kờp jơh rơlao 75 tơmàn đong; tàm hơ̆ geh 45 broă lơh kấp càr, 446 broă lơh kấp kơnhoàl mờ rơlao 8 rơbô 400 broă lơh, bơnah broă kấp sàh. Càr Lâm Đồng gam geh 160 broă lơh mpồl sền gàr tiah kis, hòi jà rơlao 4 rơbô nă đoàn viên, ơruh pơnu tus bal. tàm 10 nam, Tỉñ d0oàn neh jờng rơ 380 mpồl, cau dùl nă să pơnrơ jăk mờ tơmŭt rơlao 5 rơbô 800 nă đoàn viên jăk mŭt Đảng Kộng sản Việt Nam.

 Drim ngai 19/05, Anih duh broă Làng bol càr Dăk Nông bơyai lơh dơ̆ lam lơh “Sa tềp tam chi sùm sùm kah ưn ngài Wa Hồ” mờ lam lơh broă rơndăp lơh tam brê nam 2025. Tàm dơ̆ bơyai lơh, đơng lam bồ càr hòi jà jơh gùt anih lơh broă, mpồl lơh broă, ală tiah mờ làng bol jơh nùs lơh jat jơnau jà bơh Wa Hồ dê : “Tài bơh kwơ 10 nam tam chi, tài bơh kwơ rơhiang nam bơto bơtê cau”. Tơnơ̆ dơ̆ lam lơh, ală cau ala mat neh tam 1 rơbô 300 nơm tờm chi nho 3 nha tàm tiah rơndăp ù tiah tơrlir gơwèt Rơndăp broă lơh phan bơna măi mok Dăk Nút, ƀòn dờng Gia Nghĩa. Dùl tŭ bal, ală tiah tàm jơh gùt càr kung dồ ròt bal bơyai lơh lam lơh mờ ai cau lik lòt tam chi. Nam do, càr Dăk Nông ai jơnau kờñ bơtàu tơnguh rlau 1 rơbô 700 lồ brê.