Tàm Anih tờm Sền gàr dong kờl Mpồl bơtiàn Tơrgùm bal càr Gia Lai, kàl rơlô bơkang nam do chờ hờp mờ geh kwơ ngan tŭ 37 nă oh ndrờm gơtùi bơsram dà Mỹ ờ sa priă geh ală bi lơh broă nùs nhơm dong kờl is tus bơto. Pah tŭ lồi poh, hìu pơrjum anih tờm dê kơno dờng tai săp ñŏ nhơl bal mờ ală jơnau đơs dà Mỹ. Oh Nguyễn Trọng Phú, dùl tàm ală kơnòm dềt gam geh ròng siam bơto bơtê tàm anih tờm do yal bè bơta chờ bơh să tờm dê tŭ geh bơsram dà Mỹ bal mờ ală bi lơh broă nùs nhơm dong kờl is di kàl rơlô bơkang do. “Oh geh ală bi bơto ală jơnau tờm ngan tàm dà Mỹ dê bè tơl tơngu me, oh gơlơh chờ hờp mờ gơboh kờñ ngan bơsram dà Mỹ mờ rơ̆p lơh ngan bơsram jăk”.

Kàl rơlô bơkang nam 2025 tàm càr Gai lai, ală gah lơh broă geh gơnoar kung sền gròi ngan tàm broă lam sồr geh bal phan bơna mờ nùs nhơm gơwèt mờ ală kơnòm bơsram rơƀah, kơnòm bơsram jơi bơtiàn ờ gal cau. Oh Rơ Châm Uyên, bơsram ơdŭ 7, Hìu bơsram kấp bàr sàh Ia Phí, kơnhoàl Chư Păh pà git: “Hìu nhă oh gơtìp kal ke, gơwèt hìu pa lik klàs rơƀah. Oh geh ală mlŏ, wa kwang bàng đơng lam pà priă bơsram, oh chờ hờp ngan. Nam bơsram pa do oh geh khà kơnòm bơsram jăk, oh rơ̆p lơh ngan bơsram mờ gơlòng sồr rơlao tai”.

Càr Gia Lai tŭ do geh mờr 5 rơbô nă kơnòm dềt geh rài kis gơtìp kal ke mờ rơlao 95 rơbô nă kơnòm dềt di gơlan gơtìp tàm bơta ndrờm bè do sơl. Mờ broă sền gròi bal, dùl nùs bal bơh gơnoar atbồ bal mờ mpồl bơtiàn, kơnòm dềt tàm càr do gam geh ai tơl bơta niam nàng bơtàu tơnguh tơl ală bơta. Mò Ksor Hiền, Phó Kwang Lam bồ Sờh Lơh sơnơm, Kwang Lam bồ Kes priă Sền gàr kơnòm dềt càr Gai Lai pà git: “Tàm nhai lơh broă tài kơnòm dềt, Sờh Lơh sơnơm pơn jăt tai hòi jà ală bơta pràn nàng lơh ală broă lơh dong kờl kơnòm dềt geh rài kis gơtìp kal ke tàm càr in bè pà phan, priă bơsram, rơndeh coh, phan bơsram, drơng gàr kơnòm dềt geh rài kis gơtìp kal ke tàm tiah ngài. Lơh jăt di tŭ broă sền gàr dong kờl mpồl bơtiàn ai kơnòm dềt geh rài kis gơtìp kal ke in. Pơgồp bal mờ ală sờh, gah lơh broă, mpồl lơh broă, ală tiah tơnguh broă lơh jăt ală gùng dà broă lơh, rơcang pleh mờ rềs àr, chơ̆t jê mờ sơgràm aniai kơnòm dềt nàng kơnòm dềt geh dùl kàl rơlô bơkang chờ hờp, lơngăp lơngai mờ geh kwơ”.

Tàm Hìu niam chài Ơruh pơnu, kơnòm pa tào mờ kơnòm dềt càr Dăk Lăk, ală broă lơh kàl rơlô bơkang nam 2025 neh geh lơh niam bơnĕ ngan. Tus bal broă lơh, ală kơnòm dềt geh tus bal mờ ală jơnau nhơl ờs mờng, anih bơceh lơh, hìu ràng tăc phan kơnòm dềt mờ dờp ờ uă phan pà. Bal mờ hơ̆, broă lơh “Wa Hồ mờ kơnòm dềt, kơnòm dềt mờ Wa Hồ, bơsram tàp jơnau git wă tàm broă rơcang pleh mờ bŭ dà ai kơnòm pa tào in… kung geh hìu niam chài bơyai lơh sơl, hòi jà git nđờ rơhiang nă kơnòm dềt tus bal. Lŏ Nguyễn Thị Thúy Hiền, Phó Kwang lam bồ drơng broă Hìu niam chài Ơruh pơnu, kơnòm pa tào mờ kơnòm dềt càr Dăk Lăk pà git, tàm dơ̆ do rơ̆p geh di pơgăp 30 bơta ơdŭ bơsram geh bơyai lơh bơh àng drim gờñ tus 9 jơ mang. “Nam do bơdìh mờ broă geh sùm ală môn sùm geh bè lài do bè gah niam chài, đơs crih tamya, tàp pràn să jan, jơnau git wă kis den bol añ gam sền kwơ tàm broă lơh ờ sa priă, ală ƀlàng nhơl bơceh lơh, tus bal lơh bè bơta ngăc ngar. Is ồn nam do bol añ kung sền kwơ tus mờ broă rơcang pleh bŭ dà mờ rềs àr chơ̆t jê ai ală kơnòm dềt in, lơh jăt mpồl ală broă lơh bal mờ broă lơh jòi sền nàng git bơta niam chài Tây Nguyên”.

Tàm ală hìu Anih tờm lơh lơma mờ pờ lơma càr Dăk Lăk, dơ̆ lơma kàl rơlô bơkang drơng ală kơnòm pa tào, kơnòm dềt in kung neh sơn đờm lơh. Bơh tŭ do tus ngai 24 nhai 8, tàm drim ngai dơ̆ Poh mờ ngai Rơlô pah poh, ală kơnòm pa tào mờ kơnòm dềt tus hìu lơh lơma rơ̆p geh sền ờ sa priă ală lơma geh nùs nhơm bơto bơtê uă, di pal mờ mpồl sơnam.

Mò Nguyễn Thị Hồng Thanh, Phó Kwang lam bồ Anih tờm pà git: Mờ 3 dơ̆ pờ pah ngai , bơta pràn drơng pơgăp 400 nă kơnòm dềt in, rơ̆p geh mờr 20 nơm lơma rùp Việt Nam geh kwơ, lơh gơkờñ ngan bè tơngu me jơnau kah yau, nùs nhơm hìu nhă, lơngăp lơngai gùng lòt, rơcang pleh tam lơh tàm hìu bơsram, rơcang pleh bŭ dà tàm kơnòm dềt. “Dơ̆ pờ lơma kàl rơlô bơkang là dùl tàm ală broă lơh sùm pah nam tàm mpồl Hìu lơh lơma càr Dăk Lăk dê nàng ai geh ƀlàng nhơl niam, geh kwơ ai ală kơnòm pa tào, kơnòm dềt in tơnơ̆ mờ dùl nam bơsram. Bơh broă lơh lơma bal mờ ală lơma geh rơwah di pal mờ mpồl sơnam, bơdìh mờ jơnau kờñ pơrài bồ tơngoh, bol añ pin dờn là ală kơnòm dềt rơ̆p geh tai dơ̆ niam nàng bơsram ală jơnau niam chài, kis niam rơlao mờ git prăp gàr ală bơta kwơ tàm rài kis dê”.

Bơdìh tiah tàm gùl ƀòn dờng, dơ̆ pờ lơma kàl rơlô bơkang gam geh bơyai lơh ntrờn tus tàm ală tiah ngài càr Dăk Lăk dê, bal mờ hơ̆ là ală broă bơto re dà ờ sa priă, sền sră ntrờn, ƀlàng nhơl ai kơnòm dềt in… ai geh bơta niam nàng ală oh in geh chờ hờp tàm kàl rơlô bơkang do.