Ngai lồi poh, bi Rơ Mah H'Dịu – Ƀí thư Đoàn Ơruh pơnu sàh Ia Kriêng, kơnhoàl Đức Cơ, càr Gia Lai tơrgùm ơruh pơnu, kơnòm pa tàu mờ kơnòm dềt tàm hìu niam chài mpồl bơtiàn nàng geh ală cau chài, cau kra ƀòn bơto bơta chài tàñ phan mờ geh bơto dròng cing jañ mồng. Tơl mpồl gơ̆p bơyô kơnòm să ơm gùt dar ală cau chài, tơryang tơryồng sền gròi tơl broă blah gle, kồs che rơyah... Mpồl ndai den chờ hờp mờ tơl gùng dròng cing jañ mồng. Ùr Ƀí thư đoàn sàh Rơ Mah H’ Dịu pà gĭt broă lơh do gơwèt Rơndăp broă lơh “Ƀòn tàñ phan ờs mờng ơruh pơnu”: “Rơndăp broă lơh do, geh bơh bồ tơngoh mờ să tờm añ gŏ rơnàng kơnòm să, ơruh pơnu tàm ƀòn lơgar bol khi ờ gĭt tàñ sơ̆, tàñ lơ i rùp bơka niam; mìng gam wơl bàr pe nă cau kra dờng sơnam lơm. Den tàng, añ tus bal Rơndăp broă lơh mờ kơ̆p kờñ rơnàng kơnòm să, ơruh pơnu gŏ mờ lơh niam wơl broă tàñ phan bơh yau bơh ồng pàng dê lời wơl”.

Rơndăp broă lơh “Ƀòn tàñ phan ờs mờng ơruh pơnu” neh ai geh khà 1 dơ̆ pơrlòng Ƀồ tơngoh bơceh lơh sơnđờm mut lơh broă dơ̆ 6 nam 2022 càr Gia Lai mờ mut tàm mpồl 40 dar dŭt ndơl rơndăp broă lơh sơnđờm mut lơh broă ơruh pơnu ƀòn lơgar nam 2023 bơh Đoàn Ơruh pơnu Dà lơgar dê bơyai lơh. Rơndăp broă lơh neh gơ hòi gơ jà uă ngan ơruh pơnu jơi bơtiàn dồ ết nă cau tus bal mờ rlau 700 nă kơnòm bơsram tàm ù tiah do dê lơh jat bal. Bal mờ rơndăp broă lơh do, bi Rơ Mah H'Dịu - Ƀí thư Đoàn sàh Ia Kriêng gam lam lơh geh cồng nha broă lơh ƀòn ơruh pơnu “2 ờ, 2 geh”, tàm tiah nhàr lơgar:“Bơsram jat bồ tơngoh Wa Hồ dê bè sền gàr bơhiàn niam chài jơi bơtiàn, tàm ƀòn Hrang, Đoàn bol añ neh tơnggơs Mpồl tĕ đờng Tơrưng mờ jơnau kờñ lơh kah wơl bơta kờñ gơboh ƀòn lơgar, sền gàr bơhiàn niam chài kòn cau Jrai ai rơnàng kơnòm să dê. Bơh hơ̆, chul chồl rơnàng kơnòm să jòi gĭt mờ sền gàr đờng goòng jơi bơtiàn là đờng Tơrưng niam ngan bơh kòn cau Jrai dê. Bol añ bơyai lơh pơrjum chờ hờp, tàñ phan, tìp mat lơh kwèng đoàn viên ơruh pơnu đah ală ƀòn. Bol añ jà ală kra ƀòn, cau chài tìp mat tơm bơh bơr, đơs yal jơnau yal yau mờ teh đờng ai rơnàng kơnòm să in iăt bal”. 

Dilah bè tàm tiah nhàr lơgar, ùr Ƀí thư Đoàn sàh Rơ Mah H’ Dịu kờñ ngan mờ broă sền gàr, ngui niam bơta niam chài ờs mờng kòn cau Jrai dê, chờ hờp là dùl tàm 100 nă kwang bàng Đoàn jơh gùt lơgar dờp Khà jờng Lý Tự Trọng nam 2025, den tàm sàh Ia Ka, kơnhoàl Chư Păh, càr Gia Lai, klau pơgru Siu Sắt lơh jat jơnau gĭt wă dong làng bol tam kơphê kơ̆ kơl jăp jŏ jòng.

Broă lơh rcang lài kơryan pleh trồ prang soăt dà ai tờm kơphê in tàm kàl prang mờ broă lơh tam phan hữu kơ geh uă ngan cau lơh broă sa Tây Nguyên sền gròi. Jơnau bơsram do neh geh klau pơgru Siu Sắt (kòn cau Jrai) ơm tàm ƀòn Mrông Yố 1, sàh Ia Ka, kơnhoàl Chư Păh, càr Gia Lai pà gĭt tàm internet, gơ hòi gơ jà gĭt nđờ rơbô nă cau jăt sền. Klau pơgru Siu Sắt pà gĭt: “Lài do, añ bơsram gah Sư Phạm Địa lý tàm Hìu bơsram Đại họk Sư Phạm Quy Nhơn. Nam 2015 añ crơng gơs hìu bơnhă, hìu đah pơ ùr ơm tàm Ia Ly, añ gŏ bơta ƀuơn, bơta pràn bè ù tiah, nhơm trồ tiah tàm do ƀuơn ngan nàng tam uă tờm kơphê. Mơya làng bol kòn cau Jrai tàm do tam kơphê ờ hềt geh gùng lòt kơ̆ kơl jăp jŏ jòng. Añ kơlôi là añ là đoàn viên ơruh pơnu den pal kơlôi sơnơng, lơh bè lơi dong làng bol geh gùng lòt pa, bơtàu tơnguh kơ̆ kơl jăp jŏ jòng rlau tai”.

Tơnơ̆ 10 nam, klau pơgru Siu Sắt bal mờ pơ ùr là Rơ Châm Awưnh bơt bơtàu geh tiah tam kơphê hữu kơ mờ tơnggơs Kông ty TNHH lơh gơlik phan lơh geh bơh broă lơh sa suơn sre Jrai Ialy. Broă lơh tam phan, lơh gơlik kơphê bơh kông ty dê lơh geh jơnau sồr Organic mờ VietGAP,  lơh geh 3 phan bơna: Kơphê Robusta ƀòk bè ờs, Robusta gar bè ờs mờ Robusta bơkah pơn rơ mat kă bro “Jrai Ialy Coffee”, lơh geh sră dờp OCOP 3 sơrmañ. Kông ty neh lơh bal mờ 50 hìu bơnhă cau lơh broă sa nàng bơtàu tơnguh tiah tam kơphê hữu kơ mờ kờp jơh bă ù ơnàng 40 lồ. Bơh hơ̆, dong làng bol kòn cau Jrai tam gơl bồ tơngoh kơlôi sơnơng tam kơphê, wèt tus broă lơh tam kơphê hữu kơ. Đơs bè broă lơh do, klau pơgru Siu Sắt ờ hŭi jơnau bơto bơh Wa Hồ dê: “Kơnờm jơnau Wa Hồ dê bơto sồr, ồng pàng he geh dà kơl hề bơt bơtàu Dà lơgar, tam lơh tam dră mờ bol sò tơm den he là rơnàng oh kòn kòn sau pal bơt bơtàu Dà lơgar mờ ală broă lơh, cèng bơta gĭt wă neh bơsram ai ngui tàm bơta geh ngan rài kis dê. Bol he pơn đơl pràn lơh ngan tơrgùm wơl làng bol tàm ƀòn lơgar, bal mờ gơ̆p lơh sa, pal tam klăc dong kờl bal mờ gơ̆p bè jơnau Wa Hồ dê nting tơngkah “Tam klăc, tam klăc, tam klăc dờng- Cồng nha, cồng nha, Cồng nha dờng”.

Ală nam do, broă bơsram mờ lơh jat bồ tơngoh, nùs nhơm, rài kis mờ broă lơh Hồ Chí Minh dê geh ală kấp Ƀộ Đoàn càr Gia Lai sền gròi lam lơh bơh ală srơh, broă lơh kăc màng dê. Jơh gùt càr neh lam lơh rlau 10 rơbô 500 broă lơh bơt bơtàu, bơnah broă ơruh pơnu mờ kờp jơh bơta kwơ geh rlau 150 tơmàn đong. Bi Đỗ Đức Thanh – Phó Ƀí thư Duh broă sùm Tỉñ đoàn càr Gia Lai pà gĭt, bơh nam 2018 tus tŭ do, tàm mpồng yal tơngĭt jơnau điện tử bơh Tỉñ đoàn dê neh yal rlau 400 nă cau krơh niam pơn rơ jak, gơguh jak tàm tơl gah broă:“Bơsram mờ lơh jat jơnau sồr Wa Hồ dê den añ gŏ dùl broă lơh geh ngan rlau jơh là sền gĭt mờ rề ơnàng ală krơh niam pơn rơ guh jak. Bơh hơ̆, lơh geh dùl srơh nàng đoàn viên in bơsram, sồr ngan bal mờ gơ̆p lơh niam rlau tai. Bol añ rơp pơn jat tai tam gơl pa broă lơh mblàng yal, sền gròi tus broă lơh geh ală phan mblàng yal tàm internet. Tàm jơh gùt Đoàn den tơl nă kwang bàng đoàn là dùl krơh niam nàng ală đoàn viên ơruh pơnu in wèt tus bơsram mờ lơh jat bal. Broă  jờng rơ cau pơn rơ gơguh jak lơh jat jơnau sồr Wa Hồ dê là broă lơh nàng bol añ in pơn jat tai lơh geh nùs nhơm pa tàm dơ̆ hòi jà bơsram mờ lơh jat bồ tơngoh nùs nhơm, broă lơh mờ rài kis Hồ Chí Minh dê".