Nam do là nam dơ̆ 2 bi A Linh, hìu tàm ƀòn Đăk Ka, sàh Tu Mơ Rông, kơnhoàl Tu Mơ Rông, cau lơh broă bơh Mpồl Ătbồ Brê rơcăng gàr bồ tô dà Tu Mơ Rông wă rò nam pa tơngăc nam yau mờ Sa tềp tàm brê. Yal bè jơnau gơtus wơl là cau lơh broă drơng gàr bơta tơlir bơh brê dê cau lơi kung nrơ̆t ndơl bè jơnau bi A Linh dê.

Pơgăp mờ do rlau 4 nam tài jơnau kờñ jòi priă jền ngui sa tàm rài kis gơchồl bi A Linh neh mus kơl brê lơh mìr nàng hơ̆ sồng pal kong mờ bơta lơh glài kŭp jàm 2 nam. Lồi nam 2021 rê wơl hờ ƀòn, kơnờm jơh nùs lơh broă lơh sa, lòt lài tàm mblàng yal lam sồr làng bol bañ mus kơlbrê ai ù lơh mìr mờ tam wơl brê, A Linh geh Mpồl Ătbô Brê rơcăng gàr bồ tô dà Tu Mơ Rông dòn kơnờm dờp ai mŭt lơh broă. A Linh pà gĭt, să tờm gơlơh bè gơkòl dồs mờ brê den tàng sơlơ jơh nùs ngan sền gàr brê niam rlau tai: “Lài do he neh rlau lơh tìs mìng sơnơng geh là mus kơl brê den hơ̆ sồng geh ù lơh sa hơ̆ sồng geh kòp, geh bùm blàng nàng sa. Bơtuah đau mờ wă wờng gờñ, tŭ do añ mblàng yal làng bol tàm ƀòn in sền gàr bal brê. Gàr geh brê, tam tai geh brê cèng wơl uă bơta kwơ, ù tiah ờ gơtìp klàr ờ gơtìp dà cò pơrdô, sền gàr geh dà căt, tam geh tờm chi lơh sơnơm tềng hơđơm mƀur chi brê hơ̆ sồng còr cài nho. Brê sơlơ jŏ sơlơ kwơ sơlơ lơh geh uă cồng nha uă ngan bơh brê”.

Tàm kơnhoàl Tu Mơ Rông, càr Kon Tum jơnau pal lòt jàm bè tìs lơh aniai brê hơ̆ sồng gơgơs cau sền gàr brê là ờ huan ngan geh mờ is ồn ngan. Bè hơ̆ mơya tam gơl tàm bơta gĭt wă bơh cau Sơdàng dê bơh mus kơl brê nàng lơh mìr lơh sươn gơ tus wơl tam brê, sền gàr mờ bơtàu tơngguh brê gam geh uă ngan wơl. Puan nam do, kơnhoàl Tu Mơ Rông neh tam pa geh rlau 2 rbô lồ brê mờ rlau 1 tơlak 200 rbô tờm chi tam rah rài. Bơta kwơmàng là uă bă brê làng bol kòn cau Sơdàng tă is priă tam tàm ală bă mìr tam phan jŏ nam gơtìp klàr ờ nđiơm gơs tai. Ồng Dương Đăng Khoa, Củ tịc Anih duh broă Làng bol sàh Đăk Hà, pà gĭt, bơta tờm là bơh bơta bơto pơlam bơh gơnoar ătbồ sàh dê, làng bol tŭ tam gơl wơl tus tam brê kung gam lơh geh priă jền sơl ai hìu bơnhă in: “Uă ngan bă brê tam ndrờm là ù tam phan làng bol dê den tàng bè hơ̆ làng bol tam tàm bơrlŭ bal. Mùl màl mờ đơs den broă tam bơrlŭ bal mờ ală bơta chi tam ndai kung gơrềng sơl tus broă kis dờng bơh chi brê dê. Bulah bè hơ̆, hơ̆ kung là dùl tàm ală broă lơh nàng gàr niam rài kis làng bol dê. Pơnyơu bè uă hìu tam prìt sơkò do mờ bàr pe nă den pal tam bơrlŭ bal mờ bùm blàng nàng ai phan lơyah ngai ròng phan jŏ ngai nàng gàr niam rài kis bơh chờm ai làng bol in”.

Bal mờ tam brê gòm tơlir ù lời gời, bơnơm ờ geh chi che, cau Sơdàng tàm Kon Tum gam jơh nùs ngan tàm broă lơh niam bơta ƀươn bơh brê geh is dê nàng tam tờm chi lơh sơnơm bơtàu tơngguh lơh sa hìu bơnhă. Rlau 4 nam do, bơh broă tam tờm kơnuh sơnơm Ngọc Linh tềng hơđơm mƀur chi brê geh is mờr 2 rbô hìu làng bol kòn cau Sơdàng tàm kơnhoàl Tu Mơ Rông neh tơn jơh geh rƀah, dong gĭt nđờ rhiang hìu gơgơs pas sơm ngan mờ is ồn geh hìu lơh geh priă jên gĭt nđờ jơ̆t tơmàn đong pah nam. Bi A Tụ, hìu tàm ƀòn Pu Tá, sàh Măng Ri geh sươn kơnuh sơnơm Ngọc Linh bal mờ 800 tờm bơh 1 tus 5 sơnam pin dờn pà gĭt, sền gàr geh brê geh is mờ tam geh kơnuh sơnơm Ngọc Linh là ờ gŏ kơlôi rƀah: “Tờm kơnuh sơnơm Ngọc Linh gơ ai priă jền bơh hìu bơnhă he dê gơguh tai. Hìu bơnhă añ tŭ do neh lik klàs rƀah kơ̆ kơl jăp hơ̆ sồng ờ gam kơ̆p kơldìng wơl tàm Dà lơgar tai. He càn is priă anih priă jền dê tam tai kơnuh sơnơm tềng hơđơm mƀur chi brê. Geh tờm kơnuh sơnơm jŏ nam, geh tờm kơnuh sơnơm êt sơnam tŭ lơi kung geh lơh priă jền oh kòn geh lòt bơsram wil tơl. He neh blơi geh rơndeh măy gơn kơnờm tơnơ̆ do geh blơi rơndeh ô tô”.

Puan nam do, càr Kon Tum neh tam pa geh mờr 18 rbô lồ brê, sơrlèt mờr 3 rbô lồ mờ Jơnau lơh nền tàm pơrjum bơh Pơrjum dờng Đảng ƀộ càr dơ̆ XVI, tơngai lơh broă bơh nam 2020- 2025 dê neh sồr. Bal mờ hơ̆, ală tiah tàm càr gam tam geh rlau 3 tơlak 600 rbô tờm chi rah rài. Broă lơh broă brê bơnơm gam lơh geh broă lơh broă sa ai rlau 24 rbô nă cau lơh broă bơh càr dê in, tàm hơ̆ uă ngan là cau lơh broă làng bol jơi bơtiàn êt nă cau. Tàm nùs nhơm bồ nam pa, kàl prang tus, ồng Nguyễn Quốc Tuấn, Phó Lam bồ Ci Kụk Sền gàr brê càr Kon Tum pà gĭt, mpồng dà tơlir brê dê gam pơn jăt tai pờ tơlik dồ rài tơnơ̆ do àng sơrdah rlau tai mờ làng bol tŭ mờ Adăt Ù tiah nam 2024 rề ơnàng bơta ai gơnoar broă tam tờm chi lơh sơnơm tàm bă brê kwơmàng: “Tàm bơta 248 Adăt Ù tiah tam gơl ai gơnoar geh tam tờm chi lơh sơnơm tềng hơđơm mƀur chi brê tàm brê kwơmàng, rơcăng gàr bồ tô dà mờ lơh sa. Tàm nam 2024 neh geh Jơnau lơh nền bơh Cíñ phủ dê sồ 91 bơyo pơlam tam gơl wơl Jơnau lơh nền bơh Cíñ phủ dê sồ 156 bè bơto pơlam lơh jăt Adăt Broă brê bơnơm tàm hơ̆ geh bơto pơlam broă tam chi lơh sơnơm tềng hơđơm mƀur chi brê. Lơh jăt geh tơngume do làng bol rơ̆p bơtàu tơngguh geh lơh sa mơkung sền gàr brê geh tai priă jền sùm, kơ̆ kơl jăp, jŏ jòng”.

Kơnờm tam gơl geh bơta gĭt wă bè brê bơh làng bol dê, 04 nam do khà dơ̆ lơh tìs adăt broă brê bơnơm tàm càr Kon Tum gơmù pràn. 550 rbô lồ brê geh is bal mờ mờr 64 rbô lồ brê tam bơh càr dê geh ătbồ sền gàr niam. Bal mờ hơ̆, càr kung neh tơngguh geh bă chi lơh sơnơm mờ uă ngan là tam tềng hơđơm mƀur chi brê gơguh tus rlau 10 rbô 800 lồ, tàm hơ̆ is ồn tờm kơnuh sơnơm Ngọc Linh rlau 2 rbô 900 lồ. Mờ jơh nùs lơh ngan bơtàu tơngguh broă brê bơnơm jăt gùng dà kơ̆ kơl jăp, broă gàr geh dà tơlir bơh brê dê gam dong làng bol Sơdàng đơs is mờ làng bol càr Kon Tum đơs bal geh bơta nàng bơtàu tơngguh lơh sa brê cèng wơl priă lơh geh kơ̆ kơl jăp mờ rài kis hờm ram.