Dăk Lăk là dùl tàm ală càr geh bơta li la siñ họk uă tàm gùt lơgar, geh 2, 3 jơi phan kis kuơmàng ờ huan geh uă, pơhìn ờ gam tai, geh mat tàm Sră pơrhê Việt Nam mờ dunia dê. Tàm broă lơh ngan sền gàr ală jơi phan brê, bơh nam 2019 tus tŭ do, càr Dăk Lăk neh dờp, tơngklàs rê hờ brê bơnơm uă jơi phan kis. Tàm hơ̆, geh 62 jơi phan brê pơhìn ờ gam tai, ờ huan geh uă bơh làng bol jàu dờp is. Bal mờ hơ̆, ală anih lơh broă geh gơnoar neh lam lơh uă broă lơh mblàng yal, sền sơ wì, lơh glài nàng kơryan ală broă lơh tìs, lam lơh uă broă lơh nàng rơcang sơndră ting mòc, tac bro tìs mờ adat boh lam ală jơi phan brê mờ ală phan lơh gơs bơh phan brê tàm càr.

Tàm dơ̆ cribơyai, uă kwang bàng đơs là, broă lơh tac bro, pơndiang phan brê tŭ do kung gam gơlik geh kal ke, kai lam lơh ngai sơlơ tràl sơbil, lac lèu, lơh gơlik bơta lòng dờng ngan tus jơnau kờñ sền gàr mờ tơnguh bơta li la bơh phan brê dê. Nàng sơrlèt gan bơta lòng do, kờñ ngan geh bơta pơgồp bal bơh ală mpồl lơh sa kă bro dê, bơta pơgồp bal jơh nùs mờ ală kâp, ală gah broă lơh, làng bol dê tàm broă sơlơ gròi sền ală broă lơh tac bro phan brê, lam lơh ală broă lơh bơto bơtê, tam gơl jơnau git wă bơh tơl rơnàng làng bol dê bè sền gàr phan brê.

Tàm dơ̆ cribơyai, mpồl bơyai lơh neh yal tơnggit Ràng tơlik rùp sềr ală jơi phan brê mờ tơngume “Gàr wơl tơnơ̆ do in – Save wildlife save our life”. Ală mpồl lơh sa kă bro kĭ hơ pơrgon lơh jat jơnau bơceh lơh “Ƀòn dờng Buôn Ma Thuột đơs ờ mờ tac bro phan brê”. Ci kụk Kiểm lâm càr mờ ală mpồl lơh sa kă bro bơyai lơh lòt sền Tiah sền gàr rơ was, brê dà lơgar Yok Đôn.