Pơrjum nàng kờñ tơn jơh sền sơ wì ală cồng nha bè kơlôi sơnơng, tàm jàu ngui jak chài mờ măi mok tàm gah lơh sa suơn sre kông nghệ kao; kông nghệ siñ họk drơng broă lơh uă sơntìl phan tam, ròng phan, tam phan mờ ơn prap phan, lơh gơlik ală bơta phan tam (phan lơh sơnơm, tờm chi sa plai, kòi phe); bơsềt lơh sơnơm mờ bơsềt sa bơh ală càr tàm tiah Tây Nguyên dê; jơnau bơsram mờng chài lơh broă bè bơtàu tơnguh lơh sa suơn sre ngui măi mok pa, kông nghệ siñ họk bơh ƀòn dờng Hồ Chí Minh dê.

14 jơnau cih đơs cribơyai bơh ală kwang bàng jak chài, cau atbồ bal mờ uă jơnau đơs tă pơgồp tàm pơrjum pà gŏ, tiah Tây Nguyên geh bă tiah ơnàng dờng dơ̆ 3 gùt lơgar mờ geh uă bơta ƀuơn, bơta pràn nàng bơtàu tơnguh lơh sa suơn sre. Ngan là, mờ bơta trồ tiah ƀuơn ngan, ală càr tàm tiah Tây Nguyên neh bơtàu tơnguh pràn kơl dang ală bơta biăp, bùm, kơnuh plai đo, tờm chi sa plai, phan tam jŏ nam, tờm chi brê mờ phan lơh sơnơm geh uă bơta niam. Bơh hơ̆, tơnguh uă bơta kwơ lơh sa tàm bă ù lơh sa mờ rề ơnàng drà tăc bro phan bơna tàm lơgar mờ tăc mờ lơgar ndai bè kơphê, tiêu, plai màk, điều mờ mắc ca, kao su. Mơya, priă lơh geh bơh tăc phan mờ lơgar ndai, tăc bro phan lơh geh bơh lơh sa suơn sre bơh Tây Nguyên dê kung gam lơyah, ờ hềt ndrờm pal mờ bơta ƀuơn, bơta pràn geh lài dê.

Ồng Nguyễn Hữu Tháp, Phó Củ tịc Ủy ƀan Ñân zân càr Kon Tum đơs là, broă lơh broă bal mờ ƀòn dờng Hồ Chí Minh tàm broă kơlôi sơnơng jak chài, bơtàu tơnguh măi mok, sơlơ tơnguh tàm tơrbŏ bal rơ̆p pờ geh bơta kơ̆p kờñ bơtàu tơnguh dờng ngan, dong lơh geh ală anih lơh bal phan lơh geh bơh suơn sre ndrờm pal mờ bơta ƀuơn bơta pràn bơh Tây Nguyên dê. Ồng Nguyễn Hữu Tháp, đơs: “Ƀòn dờng Hồ Chí Minh là dùl tàm anih lơh tờm lơh sa- mpồl bơtiàn mơkung là dùl anih tờm jak chài măi mok mờ là dùl drà tăc bro phan niam ngan. Ală càr tàm tiah Tây Nguyên geh phan bơna geh kwơ uă ngan. Bol he lơh geh bơta lơh bal, tàm tơrbŏ bal lơh geh bơta bơtàu tơnguh”.

Bè bơta pràn lơh broă bal bơtàu tơnguh lơh sa suơn sre ngui măi mok pa đah ală càr tàm tiah Tây Nguyên mờ ƀòn dờng Hồ Chí Minh, kwang bàng đơs là pal geh gùng dà pơlam ngan ngồn, di pal ngan mờ gùng dà broă lơh, broă dong kờl krơi is nàng gơ hòi gơ jà cau lơh sa, mpồl lơh sa kă bro, cau jak chài tus bal bơcri priă, tam gơl pa măi mok. Ală gah broă digơlan pơgồp bal kơlôi sơnơng, lơh sir broă lơh, bơto bơtê, tề lam, geh: tơrgùm sền sơ wì, prap gàr khà gen ală sơntìl biăp bùm plai đo, plai chi, phan lơh sơnơm, bơsềt.... drơng broă lơh rơwah lơh geh sơntìl. Lơh broă bal mờ ƀòn dờng Hồ Chí Minh rơ̆p dong Tây Nguyên tam gơl pa măi mok ơn prap phan mờ lơh gơlik phan tơnơ̆ tơnhào; ngui kông nghệ thông tin, lơh is tàm broă lơh sa suơn sre; bơto bơtê tề lam tàm gah lơh sa suơn sre ngui kông nghệ kao....

Tiến sỹ ồng Hoàng Anh Tuấn, Phó Kwang atbồ Phòng Khoa học mờ Đào tạo, Mpồl atbồ tiah lơh sa suơn sre ngui măi mok pa ƀòn dờng Hồ Chí Minh pà gĭt, geh uă broă lơh nàng mpồl lơh broă in pơgồp bal kơlôi sơnơng, ngui măi mok tàm gah lơh sa suơn sre ai ală càr tàm tiah Tây Nguyên in. Tiến sỹ ồng Hoàng Anh Tuấn, đơs:“Jơh ală bơta lơi mờ Mpồl atbồ tiah lơh sa suơn sre neh geh, ală cồng nha neh lơh geh dilah gơ dờp mờ ală càr tàm tiah Tây Nguyên den Mpồl atbồ rcang dong kờl. Digơlan là mờ broă lơh là lơh jat bal ală kơnòl broă jak chài tàm ală tiah dê jat kes priă ală tiah dê. Pơgồp bal mờ ƀòn dờng Hồ Chí Minh halà ƀòn dờng Hồ Chí Minh rơ̆p lam lơh  ală tơngume di pal nàng lơh geh jơnau kờñ bơsong broă geh ngan tàm tiah Tây Nguyên dê. Dong kờl bơh ală broă lơh bơto bơtê tề lam tơnguh uă bơta pràn jak ngui phan bơna măi mok cơldŭ thí nghiệm, phan bơna tàm broă lơh kơlôi sơnơng jak chài”.

Nam 2024, ƀòn dờng Hồ Chí Minh mờ ală càr tàm tiah Tây Nguyên rơ̆p pơgồp bal bơyai lơh 3 broă lơh kâp kơnhoàl ù tiah, tàm hơ̆ geh: dơ̆ lơh chờ kơnuh sơnơm mờ bơto bô phan lơh sơnơm dunia tàm nhai 5 do, Drà rcang tơlik sơntìl mờ lơh sa suơn sre ngui măi mok pa ( tàm nhai 06 tus) mờ Tơngleh phan bơna OCOP, phan bơna pơn rơ kơnhoàl ù tiah mờ măi mok lơh broă sa- atbồ- lơh gơlik phan lơh geh bơh lơh sa suơn sre (tàm nhai 11). Pa do tàm pơrjum cribơyai, ring bal tơngume lam lơh lơh broă bal tàm gah lơh sa suơn sre nam 2024 đah ƀòn dờng Hồ Chí Minh mờ ală càr tàm tiah Tây Nguyên, ồng Đỗ Xuân Dũng, Phó Kwang atbồ Sở Nông nghiệp mờ Phát triển Nông thôn càr Dăk Lăk kung kơ̆p kờñ tàm tơrbŏ bal mờ ală phan bơna geh bơta niam uă, cèng wơl bơta kwơ ai làng bol mờ mpồl lơh sa kă bro in.