
Jơnau yal tàm pơrjum, nam 2024, dơ̆ sơnrờp tăc kơphe lơgar Việt Nam dê mờ lơgar bơdìh sơrlèt mờ rơlao 5 tơmàn dolar Mỹ, pơn jăt tai ai tơngŏ bơngă là cau ai kơphe uă dơ̆ bàr tàm dunia, mìng tơnơ̆ lơgar Brazil. Tàm hơ̆ càr Dăk Lăk – Tiah tờm tam kơphe lơgar Việt Nam dê pơgồp bal geh 18% khà kơphe tăc mờ lơgar bơdìh; măt kă bro mờ anih sơn-io ù tiah “Kơphe Buôn Ma Thuột” pơnrơ ngan neh gŏ măt tàm rơlao 100 lơgar mờ kơnhoàl ù tiah tàm dunia.

Jăt mò Vanusia Nogueira, Kwang Lam bồ dờng Mpồl Kơphe Dunia đơs, mờ bơhiàn tam kơphe rơlao 100 nam mờ mhar geh lơh jăt mờ cồng nha măi mok pa tàm broă lơh, bal mờ phan bơna niam, gah phan geh bơta pờ uă, bơta pơgồp bal mpồl, broă lơh mờng chài mờ bơta git gơ̆p drà kă bro… là ală bơta pràn ai càr Dăk Lăk in gơtùi bơtàu tơnguh geh cồng nha broă lơh kơphe Robusta bơkah. Mơya nàng bơtàu tơnguh gah phan kơphe kơl jăp, càr Dăk Lăk đơs is mờ lơgar Việt Nam đơs bal pal sền gròi rơlao tai tus mờ bơta geh kwơ, tiah kis, ngui măi mok pa tàm broă lơh. Mò Vanusia Nogueira pà git: “Ờ di he mìng kơlôi tus priă tăc mờ he kung pal kơlôi tus mờ phan lơh broă, priă tăc kơphe gơguh uă di gơlan làng bol lơh broă sa suơn sre ờ hềt geh priă cồng tài phan lơh broă gơguh kas ir. Dơ̆ bàr là bơta bè ù, uă ngan lơgar gam gơtìp mờ bơta ờ tơl ù tam kơphe. Bơdìh hơ̆ tai, he kung pal kơlôi tus bơta chài kung bè măi mok tam gơl pa bơceh lơh nàng cèng geh cồng nha niam ngan”.

Ồng Lê Đình Tư, Kwang Lam bồ Suơn dờng Aeroco Coffee, ƀòn dờng Buôn Ma Thuột, càr Dăk Lăk yal, ală nam pa do, càr do neh pơgồp bal mờ lơh geh dùl bơta niam kơphebơkah. Mơya broă tus bal drà kă bro nàng kơphe geh bơta kwơ ndrờm bal den gam geh ală bơta ờ pràn. Ồng Lê Đình Tư kơ̆p kờñ: “Bol añ neh tus bal broă lơh kơphe bơkah càr dê, tus tŭ do kơphe bol añ neh geh tàm ờ uă drà kă bro kal ke ngan dờp. Tŭ do bol añ kờñ geh dong kờl yal kơphe bơkah bơh Buôn Ma Thuột đơs is mờ lơgar Việt Nam đơs bal. Hơ̆ là dùl tàm ală bơta tờm nàng ală cau jăk, ală hìu coh, cau hùc dà kơphe kờñ kơphe bơkah geh blơi, bơh tŭ hơ̆ he rơ̆p yal geh ală bơta phan bơkah ngan bơh kơphe lơgar Việt Nam dê tus tàm dunia”.
Đơs bè broă yal măt kă bro kơphe, ală cau ala măt đơs là, ală bơta krơi is mờ ai tơngŏ niam càr dê lơh gơnoar kwơ màng ngan. Càr Dăk Lăk neh mờ gam lơh ngan bơ̆t bơtàu rùp rài “Buôn Ma Thuột tiah tus bơh kơphe dunia dê”. Mơya tơl tiah, mpồl lơh broă tàm hơ̆ gơtùi yal kơphe bơh să tờm dê tus tàm drà kă bro ală lơgar mờ bơh bơta pràn să tờm bal mờ bơta niam krơi is.

Ồng Vũ Bá Phú, Lam bồ Kụk hòi jà kă bro phan gơwèt Ƀộ Lơh sa mờ măi mok mờ Kă bro phan đơs là, bơdìh broă lơh ngan bơh Cíñ phủ dê, ală ƀộ, gah lơh broă bè hòi jà yal măt kă bro dà lơgar, den ală tiah pal lơh geh is bơta niam krơi is nàng tơnguh uă bơngă kơphe bơh să tờm dê: “Ală tiah jòi geh bơta krơi is bơh să tờm dê tàm phan kơphe. Broă lơh geh ală bơta bơkah krơi is, bơta bơkah is mờ bơta tơngŏ niam krơi is tàm nùs nhơm cau hùc rơ̆p gơs bơta pràn nàng yal kơphe lơgar Việt Nam tus tàm dunia”.
Tàm pơrjum, ală mpồl lơh broă, mpồl lơh sa kă bro, hìu lơh mờ kă bro càr Dăk Lăk neh kĭ bal 18 pang sră kah bal mờ ală mpồl lơh broă tus bơh ală lơgar, mpồl lơh sa kă bro lơgar bơdìh bè broă tăc kơphe neh geh lơh nền nòn tus lơgar bơdìh. Mờ lơh geh gah tam pà pơgồp bal kơphe, phan geh lơh bơh broă lơh sa suơn sre tàm drà kă bro lơgar Lo; Lơh broă bal nàng bơ̆t bơtàu càr Dăk Lăk gơs tiah lơh geh kơphe kơl jăp, lơh uă, lơh jăt Jơnau geh ai bè lơh kơphe ờ lơh gơtìp roh brê mờ gơmù brê bơh câu Âu (EUDR) sồr mờ ală bơta kờñ drà kă bro dê nàng lơh gơguh rài kis broă lơh broă sa ai làng bol lơh broă sa suơn sre in.
Viết bình luận