Tàm tơngai do uă bơta kòp bơtờp ngòt rơngơ̆t tàm mpồl phan poan jơng, iar ada ƀuơn ngan gơlik geh mờ bơtờp uă. Tàm bơta hơ̆, càr Dăk Lăk gam tơrgùm lơh pràn ală broă lơh rcang, kơryan kòp bơtờp nàng sền gàr lơngăp lơngai broă lơh sa ròng phan, bè ờs rài kis làng bol in. Jơnau yal bơh Ci kụk Phan ròng mờ Gah lơh sơnơm phan ròng càr Dăk Lăk pà gŏ, tŭ do bơta kòp tàm ù tiah càr gơlik geh kal ke. Tiah đah mat tơngai lik càr (càr Phú yên yau) pơn jat tai cih dờp ală tiah kòp jê ndul gơ jroh sur câu Phi, sồr gah lơh broă geh gơnoar mờ làng bol pal tơ̆p pơrgŭc sur bơtờp kòp nàng kơryan gơ bơtờp uă. Tàm 6 nhai bồ nam, tàm ù tiah càr neh gơlik geh 6 nă cau chơ̆t tài bơh gơtìp so sơnrang kăp, pà gŏ pơhìn bơtờp kòp sơnrang kung gam là bơta kơlôi rcang ngan.

Mò Đặng Thị Thủy, Phó Kwang lam bồ Sờh Broă lơh sa suơn sre mờ Tiah ơm kis càr Dăk Lăk pà gĭt: ndrờm mờ broă lơh pràn vĭt vaccine rcang lài, ƀồm sơnơm lơh kloh khuẩn, gah lơh broă geh gơnoar càr kung lơh kràñ broă sŏk sền jun pơndiang, lơh poăc, kă bro phan poan jơng, iar ada; mơkung bơto pơlam ală hìu bơnhă ròng phan lơh jat broă ròng phan lơngăp lơngai siñ họk, sàng goh wàng ròng, gĭt gŏ gờñ mờ bơsong jơh ală tiah kòp.