Mùl màl, geh: Anih gròi sền Bình Đê tàm gùng dà lơgar 1 (sơnah ƀòn Hoài Nhơn Bắc); anih sền gròi Song An tàm gùng dà lơgar 19 (sàh Cửu An); anih sền gròi Ia Khươl tàm gùng dà lơgar 14 (sàh Ia Khươl) mờ anih sền gròi kòp bơtờp tàm phan ròng Ia Le tàm gùng dà lơgar 14 (sàh Ia Le), gàr sùm lơh broă nền nòn ngai mang. Tàm tơl anih sền gròi, mpồl lơh broă geh gơnoar geh ai lơh broă tàm pơdar, mờ bơta tus bal tờm ngan bơh gah ròng phan – lơh sơnơm phan ròng mờ Kảñ sát gùng lòt dê.

Mpồl atbồ drà kă bro rơp geh ai tus dilah geh jơnau sồr mùl màl. Anih sền gròi geh kơnòl lam lơh sền sơ wì, gròi sền nền nòn broă jun pơndiang phan ròng mờ phan lơh gơs bơh phan ròng lik mờ mut tàm càr. Tơl broă lơh tìs rơp gơtìp lơh glài kràñ jat jơnau cih bơh adat boh lam dê. Bơdìh hơ̆ tai, broă ƀồm sơnơm lơh kloh khuẩn ai ală rơndeh rơndồ jun pơndiang lòt gan anih sền gròi in geh lơh sùm nàng kờñ kơryan jơnau gơ drơm kòp, tơrmù lơyah ngan rlau jơh jơnau pơhìn bơtờp kòp.