Lài hơ̆, tàm thôn 5, sàh Lộc Quảng yau, tŭ do là sàh Bảo Lâm 1, càr Lâm Đồng geh bơta mpồl sur dùl hìu bơnhă dê gơtìp chơt mờ ală tềl tơnggŏ duh să, ờ bài sa, ờ ngac ngar. Anih lơh broă geh gơnoar sàh neh mhar xét nghiệm, cồng nha ai gŏ mpồl sur do bơtờp mờ virus kòp jê ndul gơ jroh sur câu Phi den tàng neh bơyai lơh tơp pơrguc jat jơnau sồr rơcang lài kơryan kòp bơtờp. Càr Lâm Đồng tŭ do geh kờp jơh rlau 1 tơlak 300 rbô nơm sur.

Nàng gàr niam broă lơh rơcang lài kơryan kòp jê ndul gơ jroh sur câu Phi, Anih duh broă Làng bol càr Lâm Đồng sồr ală sờh, gah broă lơh geh gơ rềng mờ Anih duh broă Làng bol ală sàh, sơnah ƀòn, tiah is ồn tàm càr crăp rơcang sồr lơh, lam lơh kràñ cê, ring bal, geh cồng nha ală broă lơh rơcang lài kơryan kòp bơ tờp; hòi jà tơl bơta priă jền nàng bơsong jơh ală tiah geh kòp, ờ lời kờp bơtờp tus uă tiah. Sră nggal bơh Anih duh broă Làng bol càr dê đơs loh: Củ tịc Anih duh broă làng bol ală sàh, sơnah ƀòn, tiah is ồn kong kơnòl tềng đap adat boh lam dilah sền ờ sơp, ờ geh kơnòl tàm broă đơng lam, sồr lơh lời gơlik geh kòp jê ndul gơ jroh sur câu Phi tàm uă tiah, lơh gơbàn hoàc huơr dờng.