Rơndap broă lơh gùng kềng lơh sa tiah đah mat tơngai lik ƀòn dờng Pleiku jòng 15 kơi sồ, priă bơcri rlau 1 rbô 300 tơmàn đong, dong tơrbŏ ƀòn dờng mờ ală kơnhoàl Đak Đoa, Chư Păh, lòt gan ală anih lòt nhơl tiơng pơn rơ càr dê. Mat hòi “Gùng kềng lơh sa” ai gŏ Gia Lai ơn uă bơta kơp kơnờm tàm rơndap broă lơh do, mơya tŭ do, rơndap broă lơh gam là bơta pơn rơ ngan bơh bơta lam lơh lơyài tŭ tơngai hơ pơrgon dê.

Bulah sơn đờm lam lơh bơh lồi nam 2022, geh kơp kơnờm ai lòt rê tàm nggùl nam 2025, mơya tus tŭ do, khà broă crăp lơh tàm tiah lơh rơndap broă mìng rơp geh 46%, ai priă bơcri geh mờr 740 tơmàn đong. Jat ồng Phạm Xuân Điệp – Kwang lam bồ Mpồl atbồ rơndap broă lơh bơcri priă bơt bơtàu càr Gia Lai đơs, mpồl gam lơh ngan nàng bơsong bơta do: “Bơh jơnau sồr lơh bơh Cíñ phủ mờ Anih duh broă làng bol càr dê, jat broă rơndap lơh nam do dê den pal ai priă bơcri bơh 95%. Bơh jơnau kờñ bè hơ̆, mpồl atbồ kung geh ală jơnau sồr lơh ngan ngồn gơ wèt mờ tơl rơndap broă lơh ngan ngồn, ngan là gơ wèt mờ ală broă lơh dờng nàng kờñ gàr lơh gơtùi jơnau kờñ ai priă bơcri tàm nam. Sền bal den ală kal ke, kòl yan tàm ală broă lơh kung neh geh tă bơsong”.

Tàm kơnhoàl Chư Păh, tơngai ai priă bơcri dà lơgar sơlơ lơyài rlau tai. Tàm kờp jơh 117 tơmàn đong bơh nam 2025 dê, kơnhoàl pa rơp ai rlau 3 tơmàn đong lơm gời, mìng geh rlau 2% broă rơndap lơh. Ală rơndap broă lơh bơt bơtàu kuơmàng tàm Chư Păh, uă ngan gơ wèt mpồl tàm pơ dờn wơl; ală rơndap broă lơh pa kung gam kơp lơh sir sră pơ àr.

Ồng Đặng Thái Huy – Kwang lam bồ Mpồl atbồ rơndap broă lơh bơcri priă bơt bơtàu kơnhoàl Chư Păh pà git, dùl bơnah kal ke là tài gơ rềng bơh broă lơh tàm tơmut bal bơh ală anih lơh broă, mpồl lơh broă tàm kơnhoàl dê: “Kung tài pa do geh broă tơmut bal jat sră nggal sồr lơh bơh càr dê là ơm ing bàr pe broă lơh mờ geh gơ rềng tus kâp sàh den mpồl atbồ kung lơyài ai priă bơcri. Mờr tus tàm nhai 5, nhai 6 tus do den mpồl atbồ rơp lơh nền khà broă bơh ală mpồl tờm lơh rơndap broă dê nàng tơnguh khà broă mờ khà ai priă bơcri bơh kơnhoàl dê”.

Càr Gia Lai geh jàu broă rơndap lơh bơcri bơtàu tơnguh rlau 4 rbô 500 tơmàn đong, geh priă bơcri nam 2025 dê mờ priă tàm pơ dờn wơl bơh nam 2024. Tàm hơ̆, kes priă càr dê là rlau 2 rbô 600 tơmàn đong, gam wơl là kes priă dà lơgar dê mờr 1 rbô 900 tơmàn đong. Bulah bè hơ̆, tus tŭ do kung gam 12 kơnhoàl, ƀòn drà dờng ờ hềt tam pà broă rơndap lơh bơcri priă dà lơgar geh jàu, lơh khà ai priă bơcri mìng geh rlau 10%, dùl khà lơyah rlau pơn drờm mờ jơnau sồr geh ai tơlik.

Tềng đap bơta geh ngan do, càr Gia Lai gam lam lơh dơ̆ lĕ bal uă broă lơh kràñ cê. Tàm hơ̆ lơh 4 mpồl lơh broă kuơmàng bơh ală Phó Củ tịc càr kong kơnòl. Ală mpồl do tơrgùm sồr lam lơh broă lơh ai ù lơh rơndap broă, tam gơl jơnau cih tơm wơl mờ ngac ngar tàm broă rơndap ai priă bơcri. Mờ bơta lơh ngan uă mờ bơta lơh broă bal ring bal bơh càr tus kâp hơ đơm, càr Gia Lai gam rơ hời tă bơsong ală kòl yan tàm broă ai priă bơcri dà lơgar. Ồng Rah Lan Chung – Củ tịc Anh duh broă làng bol càr Gia Lai đơs nền: “Dà lơgar gam geh ală gùng dà lam lơh geh cồng nha ală rơndap broă lơh bơcri priă dà lơgar. Càr neh rơcang lài broă rơndap lơh mờ geh broă rơndap lơh lam lơh jơnau rơcang lài do. Kờp sền, sền sơ wì mờ hòi jà ală bơta priă jền ờ mìng ngui niam ală bơnah priă bơcri mờ gam tă bơsong ală kòl yan. Lơh bè lơi jơh ală bơta pràn geh ngan bơh càr dê geh ngui tàm khà jơnhua ngan rlau jơh nàng hòi jà ală bơta priă jền tă pơgồp bal mờ gơnoar atbồ càr nàng lơh jat ală jơnau lơh nền bè bơtàu tơnguh lơh sa, do là dùl tàm ală broă kuơmàng ngan”.