Ờ dờp mờ bơta mờng chài ờs mờng “Bùm ù pa, gar kòi mờng ù”, tiah tam ơnàng 80 lồ tềng tiah hờ bơdìh ƀòn dờng Buôn Ma Thuột, càr Dăk Lăk bơh Kông ty Kổ phần Sweet Potatoes là bă ù neh klàr tài cau tờm ù ai ală mpồl lơh broă, cau dùl nă să in ơpah tam bùm lô tàm uă nam. Kàl sơnrờp kông ty tam jrang bùm lô tàm ù tiah do, uă cau rơcang kơlôi bùm lô ờ hòn tàm bă ù neh klàr, uă tu kòp. Mơya Kông ty Sweet Potatoes neh lơh geh cồng nha. Lài do, cau tam bùm lô tàm Tây Nguyên lơh geh 30 tấn tàm 1 lồ neh là uă ngan. Mơya suơn tam bùm lô gam tơnhào bơh kông ty do dê geh tus rơlao 50 tấn tàm 1 lồ.

Jăt ồng Bùi Quang Sáu, drơng broă lơh bơta chài tàm tiah tam bùm lô do yal, bơta krơi is lài ngan là kông ty neh lơh niam wơl ù mờ hữu kơ vi siñ; pơn jăt tai là ngui sơntìp ƀùm lô geh bơkiar bơh sơntìl tờm lài, sih phơng jăt tơl tơngai hòn gơs bơh bùm dê. Bơdìh mờ ală àr bùm ờ hềt tơnhào, nha gam tơlir niam mờ ờ geh 1 bơta lơi bơh tu kăp. Ồng Bùi Quang Sáu pà git, mờ broă lơh bơh kông ty dê, tàm 2 nam kông ty tam geh 3 kàl, kàl tơnơ̆ geh cồng nha tơnhào uă rơlao mờ kàl lài. Ồng Bùi Quang Sáu pà git: “Bol añ kơlôi sơnơng bơta niam tàm ù tam, bal mờ gơsơ̆t jơh ală bơta bơsềt kòp lơh aniai tàm ù hơ̆ sồng tam. Tơnơ̆ mờ broă neh lơh ù kloh niam tàm tơngai 2 nhai. Añ đơs ù hơ̆ geh tơl niam, bơsềt kòp ờ gam geh tai den hơ̆ sồng bol añ tam. Bơdìh mờ sơntìl niam, bơta lơh kloh niam ù, bơta niam tàm ù là kwơ màng ngan den tàng hơ̆ sồng geh tơnhào uă mờ cồng nha geh bè tŭ do”.

Ồng Mai Duy Khương, Kwang atbồ Bơtàu tơnguh drà kă bro bơh Kông ty Kổ phần Sweet Potatoes đơs nền: Tŭ do phan geh lơh bơh bùm lô tàm ală càr Tây Nguyên mìng gàr geh kơnuh ris tàm tiah bè ờs tơnơ̆ mờ tŭ neh tơnhào bơh 15 tus 20 ngai. Mơya bùm lô ris bơh kông ty do dê gơtùi gàr bè ờs kơnuh bùm tàm 3 nhai. Bơta do buơn ngan ai broă tăc mờ mờ gùng dà lềng tus mờ ală lơgar tàm câu Âu, Ả Rập. Ồng Mai Duy Khương pà git: “Bol añ lơh sră tăc mờ Kông ty Toyota lơgar Nhờk. bol añ lơh sră tăc jăt dùl khà phan geh lơh bal mờ dùl khà priă neh geh lài. Jơh ală sră tăc: khà bùm lô geh, giăt geh ai lài 12 nhai, lài mờ tŭ tam. Tŭ do bùm lô bol añ gam tam do là bùm lô geh sơntìl bơh lơgar Nhờk, sơntìl là Beniazuma. Geh tơl niam tăc mờ lơgar bơdìh bơh gùng lòt tàm dà lềng tus câu Âu. Drà kă bro bol añ dê kơ̆ kơl jăp ngan”.

Ồng Đào Y Dương, Kwang atbồ Bơtàu tơnguh rơndăp broă lơh bơh Kông ty Kổ phần Sweet Potatoes đơs là: Bơta ờ geh cồng nha tŭ do bơh uă cau tam bùm lô tàm Tây Nguyên kung bè uă tiah ndai tàm gùt lơgar là tài ală cau mìng tam ntrờn uă ir. Ờ hềt ngui broă lơh niam wơl ù di mờ broă lơh, mờ sơgràm uă ir sơnơm sền gàr phan tam den tàng lơh ală bơta phan geh kwơ tus mờ bùm lô gơtìp chơ̆t. Bơta do lơh gơtìp tus mờ cồng nha bal mờ bơta bơkah bơh bùm dê ndrờm ờ geh, ờ gơtùi di pal mờ jơnau kờñ ngai sơlơ kal ke bơh drà kă bro mờ lơgar ndai dê, mờ cau blơi tàm lơgar kung ờ khin blơi tàm khà jơnkah bơh sơnơm sền gàr phan tam dê. Bơh cồng nha lơh geh uă, bơta niam phan geh lơh, Kông ty Kổ phần Sweet Potatoes gam jòi tiah nàng rề ơnàng bă ù tam tus 500 lồ tàm nam 2024 do mờ geh tơnguh tus git nđờ rơbô lồ hơ̆ sồng di pal mờ jơnau kờñ bơh cau blơi tàm ală nam pơn jăt tai dê.

Ồng Đào Y Dương pà git, ù tam mờ trồ tiah tàm càr Dăk Lăk gơdờp ngan mờ sơntìl Beniazuma lơgar Nhờk dê, gơtùi geh cồng nha tus 90 tấn tàm 1 lồ. Bơta kơlôi rơcang bơh kông ty tŭ do dê là jòi geh bă ù rềp bal nàng ƀuơn mờ broă ai măi mok lơh broă. Ồng Đào Y Dương pà git: “Tàm broă lơh mờ tăc phan geh lơh den bol añ geh kơl jăp ngan. Lơh kung neh geh cồng nha. Kơ̆p kờñ gơnoar atbồ tàm do ai tơl bơta niam bol añ in geh dùl bă ù kơl jăp bơh 400 tus 500 lồ nàng kơl jăp tàm broă lơh sa”.