“Việt Nam neh rơcang lài mờ jơh nùs ngan rơcang ală bơta pal geh nàng lơh jat Jơnau sồr bè broă atbồ bơta blơi mờ tac hờ lơgar ndai ală phan ờ lơh roh brê mờ gơmù bơta niam brê bơh Mpồl tam klac câu Âu dê (hòi lơyah là Jơnau sồr rơcang lài kơryan mus kơl brê)”. Do là jơnau đơs bơh cau ala mat Mpồl cau ala mat Mpồl tam klac câu Âu dê tàm lơgar Việt Nam tàm dơ̆ pơrjum “Cribơyai bơta chài bè Jơnau sồr rơcang lài kơryan mus kơl brê mờ ală mpồl lơh gơlik phan ờ lơh roh brê, gơmù bơta niam brê tàm lơgar Việt Nam” geh lơh ngai 12/7 tàm càr Dăk Lăk. Pơrjum bơh Ƀộ Broă lơh sa suơn sre mờ Bơtàu tơnguh ƀòn lơgar pơgồp bal mờ Mpồl cau ala mat Mpồl tam klac câu Âu tàm lơgar Việt Nam bơyai lơh. Do là dùl tàm ală broă lơh ai tơnggŏ bơta lơh ngan bơh lơgar Việt Nam dê tàm broă wèt tus lơh sa, ngui sa tơlir kơ̆ kơljap jŏ jòng sùm.

Tàm pơrjum, ala mat Mpồl cau ala mat Mpồl tam klac câu Âu tàm lơgar Việt Nam, ală mpồl lơh broă bal ală lơgar, ală mpồl lơh broă gơ wèt Ƀộ, Gah broă lơh dà lơgar, kwang đơng lam bồ 5 càr Tây Nguyên (geh: Dăk Lăk, Lâm Đồng, Gia Lai, Dăk Nông, Kon Tum) bal mờ cau ala mat ală mpồl lơh phan, ală mpồl lơh sa kă bro kơphe, kau su, dơm chi mờ phan lơh bơh dơm chi neh cribơyai jơnau tơnggit bè broă lam lơh, ală broă lơh mờ phan bơna dong kờl lơh jat ngan ngồn jơnau sồr rơcang lài kơryan mus kơl brê mờ ală ròt mpồl lơh phan ờ lơh gơbàn bơta mus kơl brê, gơmù bơta niam brê tàm lơgar Việt Nam.