Tàm pơrjum cri bơyai, uă cau ala măt đơs sùm, bơtàu tơnguh broă lơh sa suơn sre tơlir ờ mìng là broă pal lơh tềng đăp mờ tam gơl nhơm trồ tiah, mờ gam là dơ̆ niam tơnguh uă bơta kwơ phan geh lơh bơh lơh sa suơn sre bal mờ sền gàr tiah ơm kis. Mờ càr geh rơlao 1 tơlăk 360 rơbô lồ ù bal mờ uă bơta ƀươn broă lơh sa suơn sre bè càr Dăk Lăk dê, tam phan tơlir, kloh, gơlòt pơdar sơlơ geh gơtha kwơ màng.

Tiến sìh ồng Trần Ngọc Thanh, Lam bồ Anih kơlôi sơnơng Broă lơh sa suơn sre Bơtàu tơnguh Ƀòn lơgar đơs là, broă tam phan tơlir, kloh mờ geh cồng nha ờ hềt geh lam lơh uă, dùl bơnah tài ală kơlôi sơnơng tŭ do kung gam geh nùs nhơm lơh uă, ờ tơl loh làng nàng làng bol lơh broă sa in đòm jăt mơ: “Ală kơlôi sơnơng bè broă lơh sa suơn sre hữu kơ, lơh sa suơn sre gơlòt pơdar bơh jŏ tus tŭ do mìng rơ̆p ơm tàm ală pơlam gùng bal lơm. Bơta làng bol lơh broă sa kờñ là broă lơh mùl màl nàng đòm jăt lơh tàm mpồl lơh broă bal mờ lơh sa mùl màl. Ù tiah den geh, mơya broă ngui phơng sih ờ hềt loh, gơlam tus sih phơng ờ di bơta, ờ di kàl, lơh gơbàn pơhì pơhà. Kờñ ngan ală gùng dà broă lơh gờñ tam gơl gơs broă lơh mùl màl, ƀuơn jăt ngui”.

Bơh tàm mùl màl lơh sa, ồng Trần Thanh Thoảng, dùl nă cau lơh broă sa suơn sre pà git, nàng mùl màl geh broă tam phan tơlir, kloh… anih lơh broă atbồ pal tơnguh broă sok sền bơta niam phan bơcri tàm broă lơh broă sa suơn sre, tàm hơ̆ uă ngan là phơng sih mờ sơnơm sền gàr phan tam: “Dà lơgar pa jăt sền nền nòn ală bơta phơng sih, sơnơm sền gàr phan tam mờ lơh glài nền nòn hìu tăc phan ờ ngan, ờ niam. Làng bol lơh broă sa tŭ blơi phan pal geh gàr bơta niam, nàng tŭ cèng tus tàm broă lơh sa geh cồng nha mùl màl ai phan tam in”.

Ring bal mờ jơnau đơs là, pal geh broă lơh broă bal nền nòn bơh anih lơh broă atbồ tàm broă sok sền phơng sih, sơnơm sền gàr phan tam, Lam bồ phó Kụk Tam phan mờ Sền gàr phan tam ồng Nguyễn Quốc Mạnh pà git, tŭ do Kụk do neh tam pà kấp 22 tàm khà 59 sră nggal ai càr in, tàm hơ̆ geh bal jơnau pal jăt bè lơh phơng sih mờ tăc mờ lơgar bơdìh. Ală càr pal gờñ kơlôi sơnơng mờ lơh jăt: “Tàm ală tŭ lơh ală sră nggal sră pơ àr gơnoar ătbồ gơrềng tus tam phan mờ sền gàr phan tam, di lah Sờh Broă lơh sa suơn sre mờ Tiah ơm kis càr Dăk Lăk tìp kal ke, pal yal mơ mờ Ƀộ bal mờ Kụk in nàng bol añ crăp rơcang ai cau git wă ngan tus dong kờl, bơsong niam jơh ală sră nggal neh tam pà kấp”.

Kung gơrềng tus broă lơh gơlik phan broă lơh sa sa suơn sre kơl jăp sơl, Anih duh broă jak chài măi mok mờ tiah ơm kis Quốk hội dê pơgồp bal mờ Ƀộ Broă lơh sa suơn sre mờ Tiah ơm kis bơyai lơh pơrjum bơyai “bơtàu tơnguh lơh sa suơn sre kơl jăp pơgồp bal mờ sền gàr tiah ơm kis”. Tàm pơrjum cribơyai, ală cau ala măt đơs: bơta tam gơl trồ tiah ngai sơlơ gơbàn ờ ƀươn sok, phan kwơ geh is dà lơgar mờ uă bơta phan kis gam gơmù uă ngan, ƀơ̆ ƀơl tiah ơm kis ƀòn lơgar mờ tiah lơh sa suơn sre gam gơguh là ală bơta lòng den tàng gah broă lơh sa suơn sre lơgar he dê pal tam gơl broă lơh bơtàu tơnguh bơh broă jòi lơh uă ngan rơlao jơh tus bơtàu tơnguh ndrờm bal mờ kơl jăp, bơh broă sền kwơ tàm khà lơh geh tus mờ broă sền kwơ bơta niam, geh cồng nha mờ đềt mềr mờ tiah ơm kis.

Bơtàu tơnguh lơh sa suơn sre kơl jăp ờ mìng là jơnau pal jăt bơh tàm mùl màl mờ gam là kơnòl bơh lơgar Việt Nam dê tàm broă lơh jăt jơnau hơ ală lơgar dê. Tàm Pơrjum bơyai, Phó Củ tịc Quốk hội ồng Lê Minh Hoan đơs tờm: Lơh sa suơn sre gơlòt bal ờ sơn đờm bơh bơta uă mơya bơh bơta tờm. Kờñ bơtàu tơnguh kơl jăp pal sơn đờm bơh ală bơta dềt ngan, ờ gơtùi kơ̆p lơh gơs adăt boh lam, kes priă geh tơl hơ̆ sồng sơn đờm mŭt lơh, pal sơn đờm mŭt lơh bơh tơl hìu làng bol lơh broă sa suơn sre lơh gơtùi broă dềt ngan, tơl nă kwang bàng bơto pơlam broă lơh sa sươn sre đơs mờ jơnau đơs ƀuơn wă ngan, tơl anih kơlôi sơnơng gùng dà broă lơh geh kwơ ngan ngồn rlau jơh. Mờr tus, Quốk hội pơn jăt tai ai lài tam gơl, bơtơl ală adăt geh gơrềng nàng tă bơsong bơta gơ kơryan gơkòl, dong kờl bơcri priă tơlir mờ tơnguh broă jăt sền lơh jăt, gàr niam broă lơh sa suơn sre lơgar Việt Nam ờ mìng lơh geh jơnau kờñ gơguh lơh sa mờ gam pơgồp bơnah tàm bơta lơh jăt nùs nhơm bơtàu tơnguh dà lơgar tus nam 2045.