Tàm dơ̆ mìu dà tih dà lìu lồi nhai 11 pa do, tiah tam uă biap bơh càr Lâm Đồng dê gơtìp hoàc huơr kơn jơ̆ kơn jut ngan. Bal mờ git nđờ rbô lồ biap, kơnuh, plai chi gam pik tơnhàu gơtìp gơ lề, ờ niam jơh là ală hìu jàl, hìu krơh, ù tiah gơtìp dà tih cò pơrdô lơh broă bơtàu tơnguh wơl lơh sa bơh cau tam biap dê neh kal ke sơlơ kal ke rlau tai. 

Lề jơh là bàr akhar đơs di ngan rlau jơh ai tiah tam uă biap, kơnuh, plai chi kềng gah dà dờng Dà Nhim jŏ jòng gan ală sàh D’Ran, Ka Đô, Đơn Dương, Quảng Lập bơh càr Lâm Đồng dê. Bal mờ uă ù ală bơta biap gam tơnhàu, hoàc huơr kơn jơ̆ kơn jut rlau mờ cau tam biap ngui măi mok pa tàm tiah do là ală hìu jàl, hìu krơh mờ priă bơcri lơh ai 1 sàu in gơguh tus git nđờ rhiang tơlak đong. Tềng đap hoàc huơr bơh cau tam biap dê, gah broă lơh sa suơn sre mờ gơnoar atbồ ală sàh tiah tam uă biap bơh càr Lâm Đồng dê kung neh lam lơh broă lơh dong kờl bơto pơlam broă lơh sa suơn sre, ai càn priă lơh broă sa suơn sre nàng dong làng bol pơnđơl brồ guh, bơtàu tơnguh wơl lơh sa.