Tiah đah măt tơngai mŭt càr Quảng Ngãi tŭ do geh 280 bơta phan OCOP, tàm hơ̆ geh geh 20 phan 4 sơrmañ, gam tai là phan 3 sơrmañ. Uă phan OCOP pơgồp bal mờ chi lơh sơnơm, phan tĕ krơi is ngai sơlơ geh gal làng bol sền gròi. Geh pơnrơ ngan bè phan OCOP geh pơgồp bal mờ kơnuh sơnơm Ngọc Linh, tiêu… Mò Lê Thanh Thuý tàm sơnah ƀòn Kon Tum, càr Quảng Ngãi pà git, bơta bơkah phan OCOP geh lơh bơh kơnuh sơnơm Ngọc Linh tàm do geh bơta kwơ uă ngan, den tàng, cau ngui kờñ ngan: “Añ sền gròi tus mờ ală phan geh lơh bơh kơnuh sơnơm Ngọc Linh. Tŭ añ rơwah blơi ală bơta phan kơnuh sơnơm Ngọc Linh den añ rơ̆p rơwah ală tiah tăc geh pin dờn mờ tàm hơ̆ kwơ màng ngan là ală phan OCOP den di gơlan là tŭ he blơi, he ngui den rơ̆p iang nùs mờ kung rơ̆p gàr niam bơta pràn kơl dang să jan he dê rơlao”.

Ală phan OCOP krơi is tàm tiah Đah măt tơngai mŭt càr Quảng Ngãi tơrgùm tàm bơta pràn bè phan geh is, pơnrơ ngan bè kơnuh sơnơm Ngọc Linh, sâm dây, ală bơta phan geh lơh bơh chi lơh sơnơm. Mò Lương Thị Mỹ Huệ, Kwang lam bồ Kông ty TNHH Dược liệu Tây Nguyên tàm sàh Đăk Tô, càr Quảng Ngãi pà git, mpồl lơh sa kă bro gam ngui 9 bơta phan OCOP, tàm hơ̆ geh 5 bơta phan geh khà 4 sơrmañ. Mờ gùng dà broă lơh geh ală bơta phan bơh chi lơh sơnơm geh kwơ tàm tiah do dê, pơgồp bal tàm jơnau kờñ ngai sơlơ geh uă bơh cau năc dê, mpồl lơh sa kă bro neh sền kwơ tàm broă bơcri priă kơlôi sơnơng, ngui bơta chài măi mok tàm broă lơh. Mò Lương Thị Mỹ Huệ pà git: “Lài ngan là bol añ lơh mờ rề ơnàng tiah tam geh khà ală lơgar dê, wèt tus lơh nàng di pal mờ jơnau kờñ tăc mờ lơgar bơdìh. Dơ̆ bàr là lơh gơs anih prăp gàr mờ lơh gơs tơnơ̆ mờ tŭ tơnhào nàng gàr kơl jăp bơta niam, gàr kloh niam mờ tơnguh bơta kwơ ai phan geh lơh in. Dơ̆ pe là bol añ sền kwơ tàm broă bơcri priă tơnguh niam măi mok, phan lơh broă pa mờ lơh pràn broă kơlôi sơnơng nền nòn nàng lơh geh ală mpồl phan geh bơta niam uă rơlao, di pal mờ jơnau kờñ ngai sơlơ uă bơh cau ngui dê”.

Gùt càr Quảng Ngãi tŭ do geh 642 bơta phan OCOP gam geh tơngai, tàm hơ̆ geh 2 bơta phan OCOP 5 sơrmañ, 46 bơta phan 4 sơrmañ mờ 592 bơta phan 3 sơrmañ. Bơdìh mờ ală bơta phan ờs mờng bè tỏi Lý Sơn, quế Trà Bồng, tŭ tơrgùm bal càr Quảng Ngãi mờ càr Kon Tum den broă lơh sa suơn sre càr Quảng Ngãi dê geh bơta pràn uă ngan nàng bơtàu tơnguh lơh sa suơn sre.

Bè brê bơnơm, càr Quảng Ngãi geh rơlao 800 rơbô lồ brê, tàm hơ̆ geh 500 rơbô lồ brê hòn is mờ uă tiah niam nàng bơtàu tơnguh lơh sa suơn sre măi mok pa pơgồp bal mờ ală bơta phan krơi is bè kơnuh sơnơm Ngọc Linh, kơphe tiah mrềt, măk ka… Do là ală bơta geh, bơta pràn uă ngan càr Quảng Ngãi dê tàm broă tơrgùng bơtàu tơnguh lơh sa suơn sre ngui măi mok pa pơgồp bal mờ lơh gơs phan mờ tơnguh bơta kwơ phan geh lơh gơwèt mờ phan OCOP càr dê. Ồng Hồ Trọng Phương, Kwang lam bồ Sờh Broă lơh sa suơn sre mờ Tiah ơm kis càr Quảng Ngãi pà git: “Bol añ geh uă tiah niam bè Măng Đen, trồ tiah gơdờp ngan tàm broă bơtàu tơnguh lơh sa suơn sre ngui măi mok pa. Bol añ geh ală tiah tam Kơphe tiah mrềt, Măk ka, bơdìh hơ̆ tai geh uă bơta pràn nàng bơtàu tơnguh ală bơta phan OCOP. Nàng bơtàu tơnguh lơh sa suơn sre kơl jăp den bol añ gam sền wơl, sền tàm mùl màl ală bơta geh tàm broă lơh sa nàng dan mờ Anih duh broă Làng bol càr ai geh gùng dà broă lơh nàng bơtàu tơnguh lơh sa suơn sre kơl jăp, tàm hơ̆, bơtàu tơnguh phan OCOP là tơngu me bol añ dan mờ càr Quảng Ngãi tơrgùm bơcri priă lơh bè lơi nàng cau phan do bal mờ làng bol geh dờp bơta kwơ bơh ală bơta phan geh lơh bơh să tờm dê”.

Càr Quảng Ngãi tŭ do geh 853 bơta chi lơh sơnơm geh kwơ màng, tàm hơ̆ 30 bơta geh jơnau kờñ uă tàm drà kă bro mờ pơgăp 25 bơta neh geh tam, ngui uă mờ bơta kwơ lơh sa uă. Pal kah ngan là đẳng sâm, đương quy, ngũ vị tử, tàm hơ̆ uă ngan là kơnuh sơnơm Ngọc Linh, do là bơta krơi is ngan geh bơta kwơ uă ngan pơn drờm mờ ală bơta kơnuh sơnơm ndai.

Tơngai lơh broă bơh nam 2025 tus 2030, càr Quảng Ngãi gĭt nền ai lài bơtàu tơnguh broă lơh sa suơn sre hữu kơ gơ jăt bal mờ lơh măt kă bro phan bơkah ù tiah dê, ai chi lơh sơnơm lơh tờm. Tàm hơ̆ tờm ngan là kơnuh sơnơm Ngọc Linh mờ ală bơta chi lơh sơnơm kwơ màng ờ hoan ngan geh  ndai nàng tơnguh uă bơta kwơ lơh sa, đơs nền măt phan kă bro càr dê.

Jơnau kờñ là bơ̆t bơtàu càr Quảng Ngãi gơs dùl tàm ală tiah tờm chi lơh sơnơm gùt lơgar dê, pơgồp bal tàm broă ai phan lơh nàng gah lơh sơnơm tàm lơgar mờ tăc mờ lơgar bơdìh in. Do ờ mìng là gùng dà broă lơh di pal mờ bơta geh is mờ gam pờ geh dơ̆ niam bơtàu tơnguh lơh sa kơl jăp ai tiah Đah măt tơngai mŭt càr Quảng Ngãi dê, do là tiah geh uă ngan là làng bol jơi bơtiàn ờ gal cau ơm kis. Broă bơtàu tơnguh phan OCOP pơgồp bal mờ chi lơh sơnơm rơ̆p pờ geh dơ̆ niam bơtàu tơnguh lơh sa kơl jăp ai làng bol tàm tiah do in.