Ngai 28/08, tàm càr Dăk Lăk, Anih tờm pơlam lơh broă sa suơn sre Dà lơgar pơgồp bal mờ Sờh Broă lơh sa suơn sre mờ Tiah ơm kis càr bơyai lơh tìp mat cribơyai bè “Broă lơh bơtàu tơnguh ală lơh bal tam mờ tăc bro plai màk kơ̆ kơl jăp jŏ jòng”. Jơh gùt lơgar tŭ do geh rlau 10 rơbô lồ plai màk, cồng nha lơh geh bơh 190 rơbô tấn tus 220 rơbô tấn dùl nam, tơrgùm uă tàm tiah Tây Nguyên. Pơgăp 80% khà lơh geh geh tàm lơh gơlik phan, tăc mờ lơgar ndai mờ priă lơh geh rlau 170 tơlak dolar Mỹ dùl nam. Mơya, gah phan do gam kong mờ uă bơta lòng bè sơntìl ờ hềt dơ̆ lĕ bal, bơta chài tam ờ tơl bơta ring bal, lơh gơlik jrô ờ hoan pràn mờ ală lơh bal lơh gơlik phan ờ hềt kơ̆ kơl jăp jŏ jòng.

Phó Kwang lam bồ Anih tờm pơlam broă lơh sa suơn sre Dà lơgar ồng Hoàng Văn Hồng đơs: Plai màk geh bơta ƀuơn bơta pràn gơ gơs gah phan tơmàn dolar, is ồn tàm ală drà bè EU, Mỹ, Austrailia, Hàn Quốc. Nàng gĭt loh tŭ tơngai niam, lơh gơlik phan gàr niam bơta niam bơkah ring bal mờ geh kơnòl loh làng tàm tơl gah, bơh hơ̆ lơh broă geh cồng nha ală bơta kwơ mờ rề ơnàng drà tăc phan mờ lơgar  ndai.