Jăt bơh hơ̆, broă lam lơh jăt geh jăt tàm ală Jơnau lơh nền cíñ phủ dê sồ 178 mờ 67 Cíñ phủ dê, bal mờ ală sră nggal bơto pơlam Ƀộ Broă dơlam is dê mờ Anih duh broă Làng bol càr dê. Anih duh broă Làng bol càr Dăk Lăk sồr ală anih lơh broă, mpồl lơh broă lơh pràn mblàng yal, yal tơnggĭt wil tơl ală tơngume tus ală mpồl kwang bàng, kông cưk, viên cưk mờ cau lơh broă in, nàng kờñ lơh bè lơi broă lơh jăt di jơnau sồr. Tàm ală tŭ rơndăp tăp sèng mpồl lơh broă, dilah geh kwang bàng dan rê rlô lơh broă, halà dan ơm lơh broă is, ală anih lơh broă pal kờp sền nền nòn nàng gĭt nền di cau, ờ bơsong ai rlô gơ wèt mờ ală cau geh bơta pràn jak ngan ngồn, lơh geh jơnau sồr broă lơh dê. Sră nggal dan bơsong bơta dong kờl pal wil tơl jơnau yal sền swì jăt broă jàu loh làng, di mờ ală broă rơndăp lơh mờ sră nggal sồr lơh càr dê.

Tus tơngai do, Dăk Lăk geh pơgăp 1 rbô 86 nă kwang bàng, kông cưk, viên cưk mờ cau lơh broă dan rê rlô lơh broă gờñ halà ơm lơh broă. Tàm hơ̆ 806 nă cau rê rlô lơh broă lài mờ sơnam mờ 280 nă cau ơm lơh broă. Tàm khà do, geh 28 nă kwang bàng bơh kâp kơnhoàl rlau hơđang, 198 nă kông cưk, 131 nă viên cưk, 714 nă kwang bàng, kông cưk kâp sàh mờ 22 nă cau lơh broă jăt broă lơh sră hơ lơh broă.