Mìng is tàm nam 2025, càr lơh ngan ai geh 2 rơbô 500 nă cau lơh broă lòt lơh broă hờ lơgar bơdìh, tơnguh uă rơlao 2 dơ̆ pơn drờm mờ nam lài. Nàng lơh geh jơnau geh ai do, càr Dăk Lăk neh sồr Anih tờm Broă lơh drơng ala broă lơh pơgồp bal mờ ală mpồl lơh sa kă bro geh gơnoar ai cau lơh broă lòt lơh broă hờ lơgar bơdìh, bơyai lơh mblàng yal, pơlam tàm ală thôn, ƀòn bal mờ mpồl ƀòn tàm càr. Mờ càr kung lơh jăt broă kĭ hơ bal broă pơgồp mờ Mpồl đơng lam Ling klàng càr nàng bơyai lơh pơlam ai ală cau mờr jơh tơngai lòt ling in.

Ồng Nguyễn Quang Thuân, Phó Kwang Lam bồ Sờh Broă dơlam is càr Dăk Lăk pà git, càr neh lơh geh cồng nha ală broă dong kờl cau lơh broă bơsram broă lơh mờ lòt lơh broă hờ lơgar bơdìh; tàm hơ̆ is ồn là cau làng bol jơi bơtiàn ờ gal cau geh dong kờl bơh 12 tus 16 tơlăk đong tơl nă cau lơh broă nàng bơsram broă lơh, bơsram dà đơs mờ lơh sră visa: “Do là bơta tờm pràn ngan nàng dong kờl ai tơl bơta geh broă lơh ai ală kơnòm in, tàm hơ̆ is ồn là cau làng bol jơi bơtiàn ờ gal cau. Broă do bol añ kung sồr ală Anih bơto broă lơh, anih bơto sùm tàm càr nàng geh broă pơgồp ndrờm bal. Tŭ do Sờh kung gam pơn jăt tai lơh broă mờ ală anih lơh broă tờm nàng geh broă dong kờl di pal tàm broă bơto broă lơh ai ơruh pơnu jơi bơtiàn ờ gal cau in kung bè ai broă lơh ală cau do in”.