Ngai hìu nhă bi Klong Ha Juil, tàm thôn 6, sàh Lạc Dương, càr Lâm Đồng rê mŭt ơm tàm hìu pa, ală cau tàm ƀòn cau lơi kung chờ hờp lơm. Do là hìu dŭt ndơl tàm khà 9 hìu geh tơn jơh hìu sèt, ai tơngŏ broă lơh gùt thôn ờ gam hìu sèt, ồm ñhăt dà mìu tai. Rài kis lài do ờ tơl lài, siơ̆u siar tơnơ̆, bi ờ gơtùi prăp gàr tơl priă nàng lơh hìu. Kơnờm mờ broă dong kờl tơn jơh hìu sèt bơh Dà lơgar dê, hìu nhă tă tai di pơgăp 250 tơlăk đong, cau tàm jơi nòi dong kờl priă, cau tàm ƀòn lơgar dong kờl ngai lơh hìu, hìu geh lơh dờng ơnàng, kơl jăp dŭt ndơl kung lơh gơs. “Oh mi, mè bèp, ƀòn lơgar tàm ƀòn dong kờl, dong kờl tơl priă lơh gơs dùl nơm hìu pa, geh hìu ơm añ chờ hờp ngan, kơl jăp rài kis mờ drơng tàm broă lơh sa”.

Tàm thôn 6, sàh Lạc Dương, do là thôn geh mờr 100% làng bol jăt yàng, nùs nhơm tam klăc bal, tam pà bal neh gơs bơta niam tàm rài kis mpồl bơtiàn. Ờ mìng dong kờl bal tơn jơh hìu sèt, cau geh priă dong kờl priă, hìu ờ geh cau lơh broă geh cau tàm ƀòn lơgar dong kờl lơh, tam luh lơh broă bal. Kra ƀòn Lơ Mu Ha Djô, cau geh bơngă pin dờn tàm thôn 6, do là dùl tàm ală cau pơgồp bal tàm broă lơh geh nùs nhơm đềt mềr bè do. Bơh ală dơ̆ pơrjum ƀòn mờ ală dơ̆ tìp tus tơl hìu nhă, ồng lam làng bol tơriang lơh broă sa, tam gơl phan tam, dong kờl bal sơrlèt mờ kal ke, tơn jơh bơhiàn ờ niam mờ prăp gàr bơta lơngăp lơngai ƀòn lơgar. Gơwèt mờ ồng, kis “niam rài kis, sàng goh gùng yàng” pal sơn đờm bơh ală broă lơh mùl màl. “Kung mblàng yal nàng cau in git nàng lơh bè lơi dong kờl bal, dong kờl ală hìu gam gơtìp jơgloh rơƀah, nàng geh rài kis kơl jăp bal”.

Ờ mìng tàm Lạc Dương, tàm sàh Sơn Điền, geh uă kra ƀòn, Bí thư Chi bộ thôn kung tus bal hòi jà làng bol kis “niam rài kis, sàng goh gùng yàng”. Bè tàm thôn Ka Sá, mờ broă tề lam bơh kra ƀòn, chi bộ mờ mpồl lam bồ is thôn, làng bol neh tus bal tam gơl phan tam, phan ròng, tàm hơ̆ uă ngan là tam kơphe, rài kis làng bol ngai sơlơ gơguh. Gơwèt mờ kra ƀòn K’ Lãng, ồng tề lam làng bol tàm thôn Ka Sá ờ mìng bơh broă mblàng yal, mờ gam lam lài lơh, bơh hìu nhă tờm ồng dê. “Tàm do, mìng is làng bol tàm jơi nòi den he lòt tus tơl hìu, mờ broă lơh bal den kung gam mblàng yal bơh ală dơ̆ pơrjum ƀòn là broă lơh tờm… He pal lam lài. Lài jơh là cau tàm hìu nhă he, gàr bơta niam ờs mờng, niam chài jơi bơtiàn… pơn jăt tai là bơto oh kòn, kòn sao tơnơ̆ do nàng bañ sơrbì roh bơta niam chài krơi is”.

Sàh Sơn Điền geh rơlao 2 rơbô nă cau jăt yàng Bàp mờ yàng Tin lành. Nàng ngui niam gơnoar bơh kra ƀòn, cau geh bơngă pin dờn bal mờ cau kơ đơng yàng, gơnoar atbồ sàh sùm pơgồp bal nàng mblàng yal, hòi jà làng bol bơtàu tơnguh lơh sa, bơ̆t bơtàu ƀòn lơgar pa. Pa do, ală mpồl jăt yàng tàm sàh neh ring nùs bal mờ broă rơndăp lơh rài kis niam tàm broă gùng tam bao, broă ies, ñô chờ. Sàh kung sồr ală cau kơ đang yàng pơgồp bal broă mblàng yal, hòi jà cau jăt yàng tàm ală dơ̆ pơrjum gùng yàng pah poh.

Ồng Vũ Đức Nhuần, Chủ tịch Anih duh broă Làng bol sàh Sơn Điền đơs nền: “Bol añ gŏ là, nàng lơh geh cồng nha bè do den gơnoar bơh ală cau kơ đơng yàng, kra ƀòn là kwơ màng ngan. Bol añ sền tàm tơngai do, gơnoar bơh ală cau kơ đơng yàng, kra ƀòn là niam ngan… tàm tơngai tus, sàh kung pơn jăt tai ngui gơnoar do bơh ală cau kơ đơng yàng bal mờ kra ƀòn, nàng lơh bè lơi ai ală cau kơ đơng yàng bal mờ kra ƀòn gơs ală cau tờm, ală cau mblàng yal tàm mpồl bơtiàn, dong kờl làng bol ngai sơlơ lơh jăt niam gơnoar bơh să tờm dê mờ gơnoar broă là dùl nă làng bol niam sàh Sơn Điền dê”.

Gùt càr Lâm Đồng tŭ do geh mờr 900 nă cau geh bơngă pin dờn tàm tiah làng bol jơi bơtiàn ờ gal cau. Rềp làng bol, wă bơhiàn ờs mờng mờ geh mpồl bơtiàn pin dờn, ală kra ƀòn là cau tơrbŏ bal đah kấp ủy, gơnoar atbồ mờ làng bol, pơgồp bal tàm broă lam làng bol bơtàu tơnguh lơh sa, prăp gàr bơta niam chài, tơnguh nùs nhơm tam klăc bal.