Tàm sàh Đức Trọng, phan bơna gùng lòt drơng broă lơh sa suơn sre là broă geh uă cau tĕ khà sền gròi. Bàr pe gơl gùng tàm ƀlàng sre tàm tiah Dà Làc, Đơn Dương, Đức Trọng neh geh tuh bê tông mơya gam dềt, hat, ờ geh bơta tàm tơrbŏ bal mờ gùng dờng tờm, lơh phan lơh gơs bơh suơn sre pal tàm ntrờn pơrdờn uă dơ̆, lơh gơguh tai priă tă mờ lơh gơ rềng tus bơta niam. Gơl gùng tàm ƀlàng sre thôn Knai neh geh tuh bê tông mơya gơl gùng tờm ĐH6 tàm uă nam do ờ hềt geh sơn đờm lơh sơl. Ală rơndap broă lơh gùng rơndeh lòt mhar Tân Phú - Bảo Lộc, Bảo Lộc - Liang Khàng gam gơtìp kal ke tàm broă ai ù nàng lơh rơndap broă lơh.

Cau tĕ khà Lê Hữu Quế, Bí thư Chi bộ thôn Phú Lộc, sàh Đức Trọng geh jơnau dan: “Sền gròi sồr lơh, lơh mhar tơngai hơ pơrgon ală rơndap broă lơh gùng lòt tơrbŏ ală tiah kuơmàng gam geh lam lơh tàm ù tiah càr dê; di tŭ tă bơsong bơta gơ kòl bè tơm wơl priă, ai ù nàng lơh rơndap broă lơh, kràñ cê lơh jat jat sră pơrgon gơ wèt mờ ală cau tờm lơh rơndap broă lơyài, pràn jak ờ niam”.

Cau tĕ khà kung dan ai lài priă bơcri nàng lơh niam gùng lòt tàm ală tiah mìng tam dùl bơta phan, rề ơnàng phan bơna bơt bơtàu logistics rềp Ƀlàng rơndeh par ală lơgar Liang Khàng, lơh gơlik bơta ƀuơn nàng jun phan lơh gơs bơh suơn sre tus ală drà dờng.

Tềng đap ală jơnau đơs, jơnau dan do, Đơng lam Đảng Dà lơgar, Kwang đơng lam Anih cah rơña làng bol dờng ngan rlau jơh dà lơgar ồng Nguyễn Văn Quảng sồr sơlơ jat sền ală broă lơh gùng lòt kuơmàng, ngan là ală rơndap broă lơh lơyài tơngai hơ pơrgon, mờ kung di tŭ tă bơsong bơta gơ kòl bè tơm wơl priă, ai ù nàng lơh rơndap broă lơh.

Ờ mìng gùng lòt, cau tĕ khà sàh Đức Trọng gam yal wơl ală broă gơ rềng tus sồ siă, dà ngui sa, ù tiah, hìu ơm mpồl bơtiàn; sồr tă sờr rơndap ù tiah jŏ jòng đah jum dà dờng Dà Nhim. Gơ rềng tus gơnoar atbồ ƀòn lơgar 2 kâp, cau tĕ khà dan bơ tơl cau lơh broă, priă tă lơh broă, sền swì broă dong kờl ai kwang bàng ală chi hội, mpồl bal tàm kâp hơ đơm in mờ broă rơndap lơh bơsong ală anih lơh broă gam jơngkah wơl tơnơ̆ rơndap tap sèng.

Tàm sơnah ƀòn Lâm Viên - Dà Làc, ală jơnau đơs, jơnau dan kung tơrgùm tàm ală broă gơ jat mờ rài kis bè gàr tơl sơnơm, phan lơh sơnơm gơ wèt tàm mat kham sơm kòp ờ sa priă; rơndap ai cau lơh broă Mặt trận dà lơgar mờ ală mpồl, mpồl cau in; lơh niam sồ siă, phan sang, sền gàr tiah ơm kis, bơtàu tơnguh lòt nhơl tơlir; tă bơsong kal ke tàm lam lơh sră nggal ù tiah. Dùl broă geh cau tĕ khà sền gròi uă ngan là bơta ờ tơl sră măi. Cau tĕ khà Nguyễn Thị Phương Diệu ơm tàm jơnum làng bol tiah drà Đa Thiện pà git, mè bèp pal photo bàr pe bơta sră măi ai oh kòn in bơsram, lơh gơlik tai priă pal tă mờ pơhìn gơ rềng tus bơta gơnoar atbồ: “Mè bèp kơnòm bơsram bòl ngan tàm broă jòi blơi sră măi kòn in. Bàr pe bơta sră măi den tŭ do kung gam ờ tơl, den tàng ală oh pal lòt photo is nàng drơng broă bơsram in. Bàr pe bơta sră măi geh dà màu den tàng pal lòt lip jat bơta geh màu den tàng hoàc ngan priă kung bè gơ rềng tus broă bơsram ală oh dê. Kung gơlik tai dùl jơnau pơhìn hơ̆ là lơh tìs gơnoar atbồ”.

Tàm ală dơ̆ tìp mat, Mpồl cau ala mat Quốc hội càr Lâm Đồng kung yal cau tĕ khà in cồng nha Dơ̆ pơrjum ờ ờs mờng dơ̆ 1, kờp dŭ lài tơngume dơ̆ pơrjum dơ̆ 2, Quốc khội khoă XVI mờ yal cồng nha bơsong ală jơnau đơs, jơnau dan cau tĕ khà dê bơh ală dơ̆ tìp mat lài. Cribơyai mờ cau tĕ khà sơnah ƀòn Lâm Viên - Dà Làc, ồng Nguyễn Văn Quảng - Đơng lam Đảng Dà lơgar, Kwang đơng lam Anih cah rơña làng bol dờng ngan rlau jơh dà lơgar đơs nền, ală jơnau đơs, jơnau dan rơp geh tơrgùm wơl, pơyua tus anih lơh broă geh gơnoar in sền swì, bơsong; ală broă gơ wèt kơnòl ƀòn lơgar dê kờñ pal geh tơrgùm bơsong mờ hơ cau tĕ khà in: “Mpồl cau ala mat Quốc hội dan cih dờp ală jơnau đơs bơh ală cau tĕ khà dê. Bol hi gŏ ală jơnau đơs do jơh nùs ngan, geh kơnòl ngan sơn đờm bơh kơnòl he dê mờ ƀòn lơgar, mờ dà lơgar. Gam bàr pe jơnau đơs cau tĕ khà sền gròi añ sồr đơng lam càr, ngan là đơng lam Anih duh broă pơn jat tai geh bơta đơng lam, sồr lơh nàng bơsong jơh mờ hơ wơl cau tĕ khà in mờ sră nggal dồ să wil tơl, nền nòn”.

Gơ wèt mờ ală jơnau đơs, jơnau dan gam wơl, ồng Nguyễn Văn Quảng cih dờp nàng mpồl cau ala mat Quốc hội càr Lâm Đồng tơrgùm wơl, pơyua tus anih lơh broă geh gơnoar sền swì, bơsong mờ drơng Dơ̆ pơrjum dơ̆ 2, Quốc hội khoă XVI in.