Tàm ƀòn dờng Gia Nghĩa, Ƀộ Kwang àng pơgồp bal mờ Anih duh broă làng bol càr Dăk Nông bal mờ ală mpồl dong kờl bơyai lơh Dơ̆ lam lơh lơh broă uă ai cau lơh broă lơh pa, tơn jơh hìu ing, hìu ồm sèt nhăt dà mìu; mờ kung dờp priă mờ jàu hìu lơh lài ai làng bol in. Bi H’Yơi, kòn cau M’nông ơm tàm ƀòn Ting Wel Đơm, sàh Dăk Nia, ƀòn dờng Gia Nghĩa chờ hờp ngan tŭ geh dờp hìu lơh lài dờng niam ngan pà git: “Jơh hìu bơnhă chờ hờp ngan tài geh mut ơm tàm hìu pa. Jơh hìu bơnhă geh 6 nă cau chờ hờp ngan, ờ gam pal rơngòt mìu nhăt, càl khồm mut tàm nhai mìu, trồ tơngai thul kơmbuh tàm kàl prang tai. Lài do ờ hềt geh hìu ơm pal ơm kơldìng hìu mè bèp, tŭ do neh geh hìu pa den ờ duh pal ơm kơldìng tai. Ưn ngài ngan Đảng, dà lơgar, gah kwang àng’.

Hìu lơh lài geh jàu ai hìu bơnhă bi H’Yơi in ơnàng mờr 50 thơk vuông, lơh kơlik mờ gak, rơkàng sơlo, bơnàng lă mờ gak bơkàu. Kờp jơh priă tă lơh là 120 tơlak đong, tàm hơ̆ 60 tơlak đong bơh priă hòi jà dong kờl bơh Ƀộ Kwang àng dê, 20 tơlak đong bơh kes priă càr dê, bơnah gam wơl là bơh ală cau geh nùs nhơm niam dong kờl mờ hìu bơnhă tă tàm pơndrờm.

Trung tướng ồng Phạm Thế Tùng – Thứ trưởng Ƀộ Kwang àng pà git, Ƀộ pơn jat tai hòi jà ală cau geh nùs nhơm niam at tê bal tơn jơh rlau 4 rbô 400 nơm hìu ing, hìu ồm sèt nhăt dà mìu tàm gùt lơgar mờ khà priă mờr 280 tơmàn đong. Mìng is gơ wèt mờ càr Dăk Nông, Ƀộ neh hòi jà tă pơgồp geh 30 tơmàn đong nàng dong lơh pa 500 nơm hìu ai hìu bơnhă rƀah, hìu bơnhă pa jơh rƀah mờ hìu bơnhă geh sră dong kờl bơh dà lơgar gơtìp kal ke bè hìu ơm in. Trung tướng ồng Phạm Thế Tùng pi dờn là, ală hìu kơ̆ kơljap do rơp dong làng bol gàr kơ̆ kơljap rài kis: “Añ jơh nùs ưn ngài bơta pơgồp bal bơh ală sờh, mpồl, gah broă lơh mờ ală cau dong kờl dê neh lòt bal mờ Ƀộ Kwang àng lam lơh broă lơh bềng bơta kuơ mờ bềng bơta niam chài kòn bơnus do. Añ pin dờn là, mờ hìu ơm pa kơ̆ kơljap, dờng niam, rài kis kơ̆ kơljap, hìu bơnhă rơp iang nùs lơh broă lơh sa, pơn jat tai brồ guh tàm rài kis; jơh nùs tus bal gàr lơngăp lơngai tàm ƀòn lơgar, bơt bơtàu tàm srơh bơtàu tơnguh lơh sa mpồl bơtiàn tàm càr”.

Jat broă rơndap lơh, càr Dăk Nông rơp tơn jơh 1 rbô 755 nơm hìu ồm sèt nhăt dà mìu, dong kờl hìu bơnhă rƀah, hìu bơnhă pa jơh rƀah, hìu bơnhă geh sră dong kờl bơh dà lơgar mờ làng bol jơi bơtiàn dồ êt nă cau tàm gùt càr. Kờp tus tŭ do, càr neh lơh gơs mờr 75% khà broă mờ kờp dŭ rơp lơh gơs broă tơn jơh hìu ing, hìu ồm sèt nhăt dà mìu lài mờ ngai 30/8 nam do.

Lơh jat srơh tơn jơh hìu ing, hìu ồm sèt nhăt dà mìu bơh Cíñ phủ lam lơh, tơngai lài, Ƀộ Kwang àng neh hòi jà tă pơgồp lơh rlau 28 rbô 600 nơm hìu mờ uă hìu bơsram, kờp jơh priă tă lơh rlau 1 rbô 400 tơmàn đong. Mìng is bơh bồ nam 2025 tus tŭ do, mpồl kwang àng neh tă pơgồp 362 tơmàn đong bơh priă nhai nàng lơh git nđờ rbô nơm hìu nùs nhơm jàu pà ai ală hìu bơnhă tàm càr Cao Bằng mờ càr Lào Cai in.

Kờp tus nggùl nhai 5, gùt càr Gia Lai neh lơh pa mờ lơh niam wơl mờr 7 rbô 500 nơm hìu ing, hìu ồm sèt nhăt dà mìu, lơh geh rlau 90% broă rơndap lơh. Jat tơrgùm kờp, tus tŭ do, tàm càr Gia Lai neh geh 7 mpồl kâp kơnhoàl lơh gơs broă jàu broă rơndap lơh geh: ƀòn dờng Pleiku, ƀòn drà dờng An Khê, ƀòn drà dờng Ayun Pa, ală kơnhoàl Đăk Pơ, Đức Cơ, Krông Pa mờ Phú Thiện. Uă tiah bulah ờ hềt lơh gơs mơya kung lơh geh khà hìu ing, hìu ồm sèt nhăt dà mìu geh tơn jơh uă bè kơnhoàl Mang Yang lơh gơs 707 nơm hìu (geh rlau 85%), Krông Pa 404 nơm hìu (geh 73,3%), Chư Pưh 437 nơm hìu (geh 46,5%),…

Ồng Nguyễn Quyết Thắng, Củ tịc Anih duh broă làng bol sàh Ia Peng, kơnhoàl Phú Thiện, càr Gia Lai pà git, mờ bơta krơi is tàm tiah làng bol jơi bơtiàn dồ êt nă cau, làng bol geh bơta kơp kờñ lơh hìu rơng bơh yau, gơnoar atbồ kung dong kờl nàng làng bol gơtùi geh hìu di mờ bơhiàn bơh yau: “Tàm tŭ tơngai lam lơh den bol hi kung jà ală hìu bơnhă làng bol tus nàng ring bal broă lơh pa, lơh niam wơl hìu den geh bàr pe hìu bơnhă làng bol jơi bơtiàn dồ êt nă cau den jat jơnau kờñ, bơta kơp kờñ làng bol dê den lơh niam wơl mờ lơh pa hìu rơng bơh yau. Bơh hơ̆ den bol hi kung ai tơlik lài broă rơndap lơh ai làng bol in lơh hìu rơng di bă ù ơnàng, lơh geh “3 kơldang mờ dờng niam”.

Uă hìu bơnhă làng bol neh tă tai priă nàng rề ơnàng rlau bă ù lơh hìu mờ lơh tai ƀlàng hìu, pơng gàr, broă lơh ndai. Kơnờm bơh hơ̆, tus tŭ do, broă lơh tơn jơh hìu ing, hìu ồm sèt nhăt dà mìu tàm càr Gia Lai neh dong rlau 4 rbô 500 hìu bơnhă rƀah, pa jơh rƀah gàr kơ̆ kơljap rài kis, mờ kung lơh gơlik bơta tam gơl loh làng bè muh mat ƀòn lơgar, sơlơ tơnguh bơta pin dờn bơh làng bol dê gơ wèt mờ ală jơnau lơh nền, broă lơh gàr lơngăp lơngai rài kis mpồl bơtiàn bơh Đảng, dà lơgar dê.

Broă lơh tơn jơh hìu ing, hìu ồm sèt nhăt dà mìu ờ mìng cèng wơl hìu ơm dờng niam, kơ̆ kơljap ai git nđờ jơt rbô hìu bơnhă làng bol rƀah in mờ gam là cơng tàng niam ngan ai nùs nhơm “tài làng bol drơng lơh” bơh mpồl kwang àng làng bol, bơta at tê bal bềng kơnòl bơh ală kâp, ală gah broă lơh mờ jơh gùt mpồl bơtiàn. Ală hìu pa ờ mìng dong làng bol gàr kơ̆ rài kis, iang nùs bơtàu tơnguh lơh sa mờ gam pơgồp bơnah lơh tam gơl muh mat ƀòn lơgar, sơlơ tơnguh bơta pin dờn bơh làng bol dê tàm broă lơh gàr lơngăp lơngai rài kis mpồl bơtiàn bơh Đảng, dà lơgar dê.