Mpồl Niam chài – Mpồl bơtiàn gơ wèt Mpồl duh broă Làng bol càr Dăk Lăk neh lơh jăt sền swì jăt sền mờ ală sờh, gah geh gơrềng bè lam lơh broă bơh ală anih bơto bơtê dê tơnơ̆ rơndăp tăp sèng, lơh geh kơnòl broă nam bơsram 2026 – 2027 mờ ală nam pơn jăt tai in. Tơnơ̆ rơndăp tăp sèng, Dăk Lăk gơmù nggùl khà anih bơto bơtê dà lơgar dê lơh, gơmù gam 625. Broă lam lơh wơl ală klờng ơdŭ pơgồp bơnah tơrmù dipal anih tờm ătbồ, tơrgùm bơta pràn ai bơto mờ bơsram in. Bulah bè hơ̆, ală broă lơh do kung gơ tơlik ală bơta ờ hềt dipal tàm rơndăp mpồl cau lơh broă, ngan là tàm ală klờng dờng, geh uă phân hiệu ơm yah ngài gơ̆p.

Tŭ do jơh gùt càr Dăk Lăk geh mờr 33 rbô nă pơgru, tàm tŭ jăt bơta ai là kờñ pal geh rlau 35 rbô nă. Pal sền ngăc là bulah ờ tơl pơgru tàm uă kâp bơsram, môn bơsram, ƀòn lơgar kung gam geh sơl 686 nă pơgru jơngkah tàm bàr pe môn, mìng tàm ală môn Ngữ văn, Lịch sử, Địa lý. Tàm tŭ hơ̆, ală mồn Dà Anh, Tin họk, Mỹ thuật, Âm nhạc mờ Bơto bơtê tàp pràn să jan gam ờ hềt tơl pơgru. Jơnau tơl pràn tam pà pơgru đah ală mpồl pa lơh geh pơgăp nggùl khà jơnau kờñ, lơh bơta kơn jơ̆ rwah mờ kĭ sră pơrgon rwah pơgru kung gam uă sơl.

Bơdìh hơ̆ tai, ai khà cau lơh broă drơng broă tàm ală klờng tơnơ̆ tơmŭt bal kung ờ hềt dipal mờ mùl màl sơl. Geh klờng uă phân hiệu ơm yah ngài gơ̆p gĭt nđờ jơ̆t kơi sồ, mơya cau lơh broă lơh sơnơm hìu bơsram mìng geh dùl nă lơm. Sờh Broă dơlam is càr Dăk Lăk dan Ƀộ Bơto bơtê mờ Bơsram kờp sền wơl, tam gơl ai khà cau lơh broă jăt bơta ơnàng mờ krơi is lơh broă bơh ală anih bơto bơtê dê, pal lơh geh jơnau sồr sền gàr pràn kơldăng kơnòm bơsram in.

Dùl nơm gơkòl ndai là bơsong bơta dong kờl gơ wèt mờ kwang bàng ătbồ jơngkah tơnơ̆ rơndăp tăp sèng. Ală kwang bàng ătbồ lài do neh geh ai lơh broă pa, geh bal lơh pơgru, ờ gơ wèt khà sền swì tơrmù dipal. Bơta do lơh bàr pe nă cau geh bơta kơ̆p kờñ rlô broă mơya ờ hềt geh bơsong bơta dong kờl. Sờh Bơto bơtê mờ Bơsram càr Dăk Lăk dan Ƀộ Broă dơlam is gờñ tam gơl pơlam nàng tă bơsong kal ke ai ală ƀòn lơgar in, gàr niam gơnoar kwơ mờ kơ̆ kơl jăp nùs nhơm bồ tơngoh mpồl cau lơh broă dê tơnơ̆ rơndăp tăp sèng.