Mờr 60 nam tơnơ̆ mờ ngai phi să, cau ling chơ̆t màng Ka Tơ Tiên, deh nam 1949, là Tiểu đội phó Huyện đội Anh Dũng, kung gam ơm wơl tàm brê bơnơm, tŭ do gơwèt sàh Anh Dũng, càr Khánh Hoà. Tơngai neh lơh roh ală tềl lài do, mìng gam tàm jơnau kah wơl, bŭ lah ờ loh làng, kung ndrờm geh sền kwơ, đal git, tài đah ngkời hơ̆ là dùl nă cau ling gam kơ̆p ngai kờñ rê.

Bơh tàm pang sră, jơnau yal bơh cau neh gŏ tus mờ jơnau kah wơl bơh cau pròc mhàm, ală mpồl lơh broă geh gơnoar gam lơh ngan tơrbŏ bal, pơn drờm bal, lòt sền tơl tiah. Ồng Ka Tơ Toàn, oh klao cau ling chơ̆t màng, lam bồ, dong kờl đal git tiah tơ̆p. tơnơ̆ mờ uă ngai lòt jòi sền, jòi rồ ƀồm mền, ngai 05 nhai 8 lài do, ƀồc ntìng cau ling chơ̆t màng Ka Tơ Tiên neh geh jòi gŏ. Mờr 60 nam kơ̆p gơn, cau ling lài do neh rê mờ ală cau tàm mpồl ling bal, mờ hìu nhă bal mờ ƀòn lơgar. Ồng Ka Tơ Toàn ngoh rơngăc đơs: “Cèng bi rê tơ̆p tàm Ƀlàng tơ̆p ƀồc cau ling chơ̆t màng den niam ngan rơlao mờ ơm is hờ bơdìh brê bơnơm, tàm bơdìh brê bơnơm hơ̆ moăt ngan. Lài mờ hơ̆, ờ geh cau lơi chu ñàng bi in. Mìng geh chu ñàng dùl dơ̆, tàm hìu kung ờ git bi gam tàm tiah lơi sơl”.

Jơnau yal bơh cau ling chơ̆t màng Ka Tơ Tiên dê kung pà gŏ dùl bơta mùl màl: tàm ală ƀòn tiah bơnơm càr Khánh Hoà dê, jơnau kah wơl bè ală cau neh phi să kung gam prăp gàr sùm, mơya jăt tơngai, ală cau git jơnau ngai sơlơ ờ gal tai, tàm tŭ sră nggal ờ di cau lơi kung geh tơl. Tàm sàh Anh Dũng, ù tiah dờng ơnàng, ƀòn làng bol ơm kis ờ gal, uă tiah ơm ngài tàm brê bơnơm. Gơwèt mờ làng bol kòn cau Rơglai, tơnơ̆ mờ ñô pơthi, broă còp ies ƀồc, chu ñàng ờ gam geh lơh sùm tai. Ală cau geh tơ̆p tàm rài tam lơh, di lah jơnau yal ờ geh prăp gàr nền nòn, mờ sơrlèt mờ git nđờ jơ̆t nam sơlơ kal ke nàng đal git.

Den tàng, tàm broă lơh dờng 500 ngai mang, kấp ủy, gơnoar atbồ sàh bal mờ mpồl ling tus tơl thôn, tơl hìu làng bol; tìp ală cau dờng sơnam, cau geh bơngă pin dờn bal mờ ală cau neh geh tŭ git bè ală dơ̆ tam lơh rài lài do. Ồng Pa Xây Mơ, Bí thư Chi bộ thôn Ú, sàh Anh Dũng pà git, tơl jơnau yal geh dờp, tàm pơn drờm mờ pang sră nàng đal git tàm mùl màl. “Bơhiàn kòn cau Rơglai tàm do dê, tơnơ̆ mờ tŭ geh cau chơ̆t, 1 nam lơh yàng bơthi ƀồc là jơh. Ờ tus chu ñàng pah ngai ha là tàm ală ngai Chờ dờng, ngai Satềp. Tŭ lơh jăt broă lơh dờng 500 ngai mang, làng bol ring bal ngan, kờñ bal tài pah nam, kòn sao geh tus còp, chu ñàng kah kơlôi tus mờ broă lơh dờng màng bơh ală wa dê neh phi să”.

Bơh tàm broă sền wơl, sàh Anh Dũng, càr Khánh Hoà sơn đờm ai tơngŏ geh 39 ƀồc cau ling chơ̆t màng neh geh tŭ tơ̆p tàm sàh do. Tàm hơ̆ 11 ƀồc neh geh rồ tơrgùm. Bơh ală jơnau yal tàm ƀòn lơgar, mpồl jòi rồ pơn jăt tai rề ơnàng tus tàm ală tiah neh geh tŭ là pôs đồng kăc màng, tiah geh tam lơh.

Tàm bơnơm Hòn Chảo, sàh Vạn Ninh, bơta jòi rồ ƀồc cau ling chơ̆t màng gam glar bòl rơlao tŭ mpồl lơh broă pal tus tàm tiah ñhoa rơlao 840 thơ̆k pơn drờm mờ măt dà lềng. Gùng guh kơh, uă pơnai lŭ dờng, ù tiah kơh uă. Phan sa, dà hùc mờ phan drơng tàm broă jòi rồ ndrờm pal àñ mờ să. Trung tá Nguyễn Hải Sơn, lơh broă tàm mpồl jòi rồ, tơrgùm ƀồc ntìng cau ling chơ̆t màng càr Khánh Hoà pà git, tơnơ̆ mờ ală ngai ơm tàm brê bơnơm, mpồl jòi rồ neh jòi rồ geh 4 ƀồc ntìng cau ling chơ̆t màng. “Kwang bàng, cau ling lơh ngan hào kơh, tiă croh dà, lòt gan uă ngan kơh ñhoa, mŭt tàm ală trồm lŭ ngòt rơngơ̆t ngan. Bŭ lah gam tìp uă kal ke, mơya tài kơnòm mờ broă pơlam bơh ală oh mi, cau ling tàm mpồl, mpồl neh mù tus geh cồng nha. Cèng bal 4 ƀồc ntìng cau ling chơ̆t màng phi să tàm bơnơm Hòn Chảo, tiah pôs đồng kăc màng càr Khánh Hoà cèng rê niam”.

Tàm càr Khánh Hoà, mpồl broă lơh tàm “broă lơh dờng 500 ngai mang” gam uă. Rơlao 400 tiah mờ mờr 2 rơbô 400 jơnau yal gơrềng tus cau ling chơ̆t màng, ƀồc cau ling chơ̆t màng gam pơn jăt tai geh tus nàng đal git. Bơta tờm là ală tiah geh tam lơh, tiah pôs đồng kăc màng, tiah brê bơnơm mờ tiah geh jơnau yal bè ƀồc tơ̆p bal. Mờ ù tiah kơh bơnơm, kàl mìu gam lơh gơtìp kal ke tai bè broă lơh. Gùng brê ntiar, bơta di gơlan tơrlah ù gơguh uă, broă lòt mờ jòi gơtìp kal ke ngan rơlao. Càr Khánh Hoà gam tơ8rgùm mpồl cau, lơh ngan tŭ geh trồ tiah nian nàng tus tàm ală tiah neh geh jơnau yal.

Bal mờ broă jòi rồ, broă đal git măt ală cau ling chơ̆t màng ờ hềt loh măt sơnđan kung geh lơh mhar. Đại tá Trương Thành Việt, Chính ủy Mpồl Đơng lam Ling klàng càr Khánh Hoà pà git, càr neh lơh gơs broă rồ, tơrgùm, sền mờ ai mẫu tàm rơlao 2 rơbô 100 bơtô ƀồc ờ hềt git đal măt tàm 7 ƀlàng tơ̆p ƀồc, gờñ rơlao mờ broă rơndăp lơh geh ai. “Lơh jăt broă lơh dờng 500 ngai mang, Mpồl Đơng lam Ling klàng càr lơh broă mờ kơnòl uă ngan, nàng cau ling tơl pràn lơh gơs kơnòl broă lài mờ kàl mìu. Bol añ lơh broă mờ kấp ủy, gơnoar atbồ tàm ală tiah, hòi jà ling klàng, đoàn viên, cau ùr tus bal dong kờl, drơng tàm broă lơh mpồl jòi rồ in nàng lơh gơs kơnòl gờñ ngan”.

Mờr 60 nam neh rơlao, ală bă brê tàm ală tiah cau ling chơ̆t màng neh geh tŭ tam lơh mờ phi să neh uă dơ̆ tam gơl. Mơya jơnau kah wơl bơh ală cau sền gŏ, pang sră gam wơl mờ tơl tiah tềl tàm ù tiah mùl màl kung gam geh tơrbŏ wơl. Mờ tơl ƀồc ntìng cau ling chơ̆t màng geh jòi gŏ, dùl nă cau ling geh rê wơl, mờ dùl hìu nhă geh tai anih nàng kah kơlôi cau pròc mhàm tơnơ̆ mờ ală nam nhai jŏ jòng kơ̆p gơn.