Ồng Huỳnh Đảm, lài do là Củ tịc Anih duh broă Mặt trận dà lơgar Việt Nam di nùs ngan rlau jơh là Tam lơh phan lin dờng kàl prang nam pa 1975, sơnđờm geh bơh bơta đơng lam bơh Đảng, bơh Wa Hồ, sơnđờm geh bơh bơta pràn bơh Mpồl ling klàng Làng bol Việt Nam khin cha jak chài dê, bơh bơta pràn tam klăc dờng jơh gùt jơi bơtiàn. Tŭ hơ̆, jơh gùt jơi bơtiàn tam klăc bal, đah Tô- đah Jum dà lơgar tam klăc bal, tiah tam lơh hòi den tiah dong kờl pal hơ, tiah dong kờl hòi den tiah tam lơh crăp rcang tam pà bal kal ke. Ngan là bơta hơ̆ neh gơ gơs dùl bơta pràn bơh jơh gùt jơi bơtiàn dê mờ loh làng ngan rlau jơh là bơta pràn bơh bơta tam klăc bal ling klàng mờ làng bol. Jat ồng Huỳnh Đảm, nùs nhơm tam klăc bal ling klàng làng bol do neh geh lơh nền dùl bă ngăc ngar niam jak, dờng màng tàm dơ̆ tam lơh Hồ Chí Minh: “Tŭ ală mpồl ling tam lơh tờm “sơr băc mhar” lòt ling, sơgràm phà tàm ală tiah tờm ngan bơh Sài Gon- Gia Định dê den tàm tŭ hơ̆ làng bol tàm Sài Gòn- Gia Định kung ntào dră dồ nùs bal tam lơh ai geh tơl tiah drà, sơnah ƀòn, ntào dră ai geh tơl tiah. Bồng bi, bơkào, sèng jơnau cih tai ờ mìng là wă rò ling mpồl tam lơh pha lin rê wơl lơm mờ gam sền gàr lơngăp lơngai rơndăp tăp sèng, sền gàr cồng nha lơh geh bơh broă lơh kăc màng bơh tàm ală jiơ phuk sơnrờp mờ bol he neh lơh geh phan lin dờng”.

Trung tướng, Phó Pơgru dờng - Tiến sìh ồng Trần Vi Dân, Lam bồ Kụk Jak chài, broă lơh kwơ màng mờ Kah yau Kwang àng, Ƀộ Kwang àng pà gĭt, broă bơt bơtàu mờ gàr kơ̆ nùs nhơm làng bol, bơt bơtàu nùs nhơm rcang lài bơh làng bol dê sùm geh Đảng he dê is ồn sền gròi ngan. Đảng he neh sồr nàng bơt bơtàu, bơtơl tai nùs nhơm tam lơh jơh gùt làng bol mờ bơta ngan ngồn “Ờ geh bơta lơi kwơ rlau mờ lơngăp lơngai is, mờ  khat gơboh”. Nùs nhơm mờ bơta ngan ngồn hơ̆ tàm nùs nhơm làng bol, gơ gơs bơta pràn nùs nhơm, lơh bơta pràn tơrgùm bal pràn ngan nàng jai pha bơta pràn jàñ bơsak bơh bol sò tơm sơgràm phà dê.

Jat tàm ală bơta gàr kơ̆ geh nùs nhơm làng bol dê, tơrgùm geh nùs nhơm làng bol, Đảng he dê neh sền gròi bơt bơtàu nàng đơng lam, sồr lơh, bơyai lơh gơs nùs nhơm rcang lài bơh làng bol dê kơ̆ kơl jăp, tàm hơ̆ geh gơnoar is ồn kwơ màng bơh mpồl ling phàu crong làng bol mờ tàm tiah đah Jum Dà lơgar là ling tơngklàs mờ mpồl ling sền gàr lơngăp lơngai tiah đah Jum Dà lơgar, Trung tướng ồng Trần Vi Dân đơs sùm, jơnau bơsram bè “gàr kơ̆ nùs nhơm làng bol mờ bơt bơtàu nùs nhơm rcang lài bơh làng bol dê gam bè ờs bơta kwơ” tàm tơngai kăc màng tŭ do dê:“Bol añ gŏ là jơnau bơsram bè gàr kơ̆ nùs nhơm làng bol mờ bơt bơtàu nùs nhơm rcang lài bơh làng bol dê gam bè ờs bơta kwơ. Mờ gơ pơn jat tai pờ geh ai bol he in ală broă geh ai tơlik tàm broă pơndờm pơnđiang, pơn jờng nàng làng bol in dồ nùs bal, pin dờn tàm gùng dà broă lơh bơh Đảng, adat boh lam bơh Dà lơgar dê. Mờ lam lơh tơrgùm bal, pơlam gùng dà đơng lam, sồr lơh mờ geh ală broă lơh di pal nàng bơt bơtàu nùs nhơm làng bol kơ̆ kơl jăp nàng bol he in bơt bơtàu mờ sền gàr Dà lơgar tàm rài pa, rài bơtàu tơnguh brồ să bơh jơi bơtiàn Việt Nam dê”.

Thượng tướng ồng Trịnh Văn Quyết, Ƀí thư Đảng Dà lơgar, Kwang bàng Lơh kơnòl broă sùm Quân ủy Dà lơgar, Kong kơnòl broă Tổng kụk Cíñ trị Ling klàng làng bol Việt Nam, tàm jơnau đơs tơrgùm bal jơnau tă pơgồp bal tàm dơ̆ Cribơyai “Tam lơh pha lin dờng Kàl prang nam pa 1975 mờ rài bơtàu tơnguh pa bơh jơi bơtiàn Việt Nam dê” geh bơyai lơh tàm drim ngai 19/04 pa do đơs nền: Tam lơh pha lin bơh dơ̆ Ntào tam lơh dờng mờ ntào tam lơh Kàl prang nam pa 1975 là dùl tàm ală pang kah yau dờng màng mờ pơn rơ ngan rlau jơh tàm rài kah yau bơt bơtàu Dà lơgar mờ sền gàr Dà lơgar bơh jơi bơtiàn Việt Nam dê. Hơ̆ là pha lin bơh bơta khin cha nùs nhơm mờ bồ tơngoh kơlôi sơnơng Việt Nam dê, là bơta tơrgùm bal bơh bơhiàn kờñ gơboh Dà lơgar pơgồp bal mờ nùs nhơm tơrgùm dùl Dà lơgar mờ bơta kơ̆p kờñ ring lơngai, bơta tơrgum bal bơh bơta pràn tam klăc jơh gùt jơi bơtiàn mờ bơta pràn rài pa mờ tam klăc ală lơgar dê.

Tam lơh pha lin dờng Kàl prang nam pa 1975 gam là pha lin pơn rơ ngan bơh srơh tơngklàs jơi bơtiàn rài 20 dê, pơgồp bơnah kwơ màng tàm dơ̆ tam lơh bơh kòn bơnus dê gơguh jak tài jơnau kờñ lơngăp lơngai is, ring lơngai, làng bol lơh tờm mờ gơguh jak mpồl bơtiàn; pơn jờng, pơndờm pơnđiang ală jơi bơtiàn gơtìp rồn bơklơn lơh pràn tam lơh, pờ geh dơ̆ sơn rờp ai bơta nrah nring bơh nùs nhơm bol sò tơm thàm pà pa tàm dunia. Thượng tướng ồng Trịnh Văn Quyết đơs sùm:“Lơh jat jơnau hòi jà bơh Đảng mờ Củ tịc Hồ Chí Minh dê, jơh gùt jơi bơtiàn Việt Nam lơh geh dùl mpồl kơ̆ kơl jăp, tơrgùm bal jơh bal bè bơta gĭt wă, nùs nhơm bồ tơngoh mờ broă lơh; tam klăc bal tàm Đảng, tam klăc bal jơh gùt làng bol, jơh gùt ling klàng, tam klăc bal đah Tô – đah Jum Dà lơgar, tam klăc bal ală mpồl kờñ gơboh Dà lơgar mờ gơguh jak, tam klăc bal ală lơgar dê... Kơnờm bơh hơ̆, jơh gùt Đảng, jơh gùt ling klàng mờ jơh gùt làng bol he dê tàm 2 tiah đah Jum mờ đah Tô Dà lơgar neh hời rơ hời sơr lèt gan kal ke, crăp rcang tam lơh mờ chơ̆t phi să, dơ̆ dùl dơ̆ lơh ờ geh cồng nha ală broă lơh, kai kơr mơ̆i tam lơh bơh bol sò tơm thàm phà lơgar Mỹ mờ gơnoar atbồ dĭ gơna dê”.

Tam lơh pha lin dờng Kàl prang nam pa 1975 sùm sùm là dùl tềl lời wơl àng gơ crà tàm kah yau tam lơh bơt bơtàu Dà lơgar mờ sền gàr Dà lơgar bơh jơi bơtiàn Việt Nam đơs bal, kah yau tam lơh kăc màng Việt Nam đơs is. Ală bơta kwơ kah yau, ală jơnau bơsram bơh Tam lơh Pha lin dờng Kàl prang nam pa 1975 neh, gam mờ rơ̆p sùm geh ală rơnàng rềp bal tàm pơrdờn pơn jat tai đòm jat, lơh bơta rcang lài kơ̆ kơl jăp nàng jơi gùt jơi bơtiàn in mut tàm rài pa.