Hìu rông geh bơcri priă lơh 3 tơmàn đong, lơh ơnàng 156 thơ̆k vuông, ñhoa 21 thơ̆k 2, lơh jăt broă lơh hìu ờs mờng kòn cau Jrai dê. Broă lơh hìu do geh tơl ồs đèng, phan kơrian kơnàs, phan rơcang gàr mờ crùh ồs sa ndrờm bal, ai geh bơta dờng niam broă pơrjum mpồl bơtiàn, bơyai lơh chờ mờ prăp gàr bơta niam chài jơi bơtiàn.

Bal mờ dơ̆ do, ală mpồl lơh broă gam jào broă lơh “Sơrmañ àng ƀòn lơgar” tàm ală sàh Ia Nan, Ia Pnôn mờ Ia Krêl. Mờ khà priă dong kờl 1 tơmàn 600 tơlăk đong tàm dơ̆ 2 nam 2026, broă lơh do kờp dŭ geh crăp 533 ñjrong đèng măt tơngai tàm rơlao 18 kơi sồ gùng, tàm 12 ƀòn gơwèt ală càr Gia Lai, Quảng Ngãi mờ Quảng Trị. Ală broă lơh pơgồp bal tàm broă tơnguh rài kis, gàr niam lơngăp lơngai mờ tơnguh nùs nhơm tam klăc bal đềt mềr đah ling klàng mờ làng bol tàm tiah nhàr lơgar.