Drim ngai 21/10, tàm Ƀlàng rơndeh par ală lơgar Cần Thơ, tiah ling klàng, Gah đơng lam Ling tiah 9 pơgồp bal mờ Mpồl ling rơcang gàr kơl wàng trồ - Ling rơndeh par mờ ală càr, ƀòn dờng tàm tiah ring dà dờng Cửu Long yŭ tơyùm bơyai lơh jun pơndiang, jàu mẫu ƀồc ntìng cau chơt màng drơng jat sền ADN nàng đal git muh mat ƀồc ntìng cau chơt màng mờ rơndeh par jun pơndiang phan CASA - C295 Lữ đoàn 918, gơ wèt Mpồl ling rơcang gàr kơl wàng trồ - Ling rơndeh par. Gùng jun pơndiang 8 rbô 453 mẫu ƀồc ntìng cau chơt màng mờ rơndeh par jun pơndiang phan ling klàng dơ̆ do kung tơn jơh broă ai mẫu bơh Broă lơh dờng 500 ngai mang dê. Do là rbàng tơrbŏ gùng rơndeh par dờng màng ngan, tơrbŏ rài yau khin cha jak chài mờ tŭ do bơh bơta kah ưn ngài dê.

Tơl mẫu ƀồc ntìng cau chơt màng geh glòm mờ bồng bi dà lơgar pơrhê là dùl sơm pòl ồs kơp kơnờm, là jơnau hòi ngoh rơngac ngan bơh rài yau dê. Do ờ mìng là gùng jak chài mờ măi mok dê, mờ là dơ̆ par bơh nùs nhơm cau ling bal, nùs nhơm làng bol dê, cèng bal bơta pin dờn duh hồl, kơp gơn, rơpua ală bơta jê sồt jŏ jòng git nđờ nam nhai kơp gơn.