Tàm sàh tiah nhàr lơgar Buôn Đôn, Pôs ling sền gàr tiah nhàr lơgar Bo Heng pơgồp bal mờ Cơldŭ Cảnh sát Cơ động càr dăk Lăk, Mpồl lơh broă niam ƀòn dờng Hồ Chí Minh mờ Anih tờm lòt nhơl rơbàng yồng Buôn Đôn bơyai lơh broă lơh “Trung thu kờñ gơboh” tàm Buôn Trí.

Ală oh dềt geh tus bal tamya lân, nhơl ală bơta nhơl ñŏ bơh yau, tìp mat đơs crih tamya mờ dờp 695 bơnah phan pà. Mpồl bơyai lơh kung jàu 150 bơnah phan pà ai ală hìu bơnhă geh rài kis kal ke in. Tàm sàh tiah nhàr lơgar Ia Rvê, Pôs ling sền gàr tiah nhàr lơgar Ia Rvê neh jàu rlau 1 rbô 300 bơnah phan pà ai kơnòm bơsram bơh mầm non tus kâp 2 in mờ kơnòm dềt tàm ƀòn lơgar in. Tàm tiah nhàr lơgar dà lềng sơnah ƀòn Xuân Đài, Pôs ling sền gàr tiah nhàr lơgar Xuân Đài pơgồp bal mờ Mpồl tam klac cau ùr sơnah ƀòn jàu 200 bơnah phan Trung thu. Ală phan pà dong kơnòm dềt tiah nhàr lơgar geh tai bơta chờ hờp tàm dơ̆ sa tềp Trung thu, ai tơnggŏ bơta lòt bal bơh kwang bàng, cau ling Mpồl ling sền gàr tiah nhàr lơgar dê bal mờ kâp ủy, gơnoar atbồ, ală mpồl bal mờ cau geh nùs nhơm niam gơ wèt mờ ală hìu bơnhă kal ke.