Bi Rơ Châm Dun, 30 sơnam, kòn cau Jarai ơm tàm ƀòn Ngol Rông, sàh Ia Krêl, kơnhoàl Đức Cơ geh Kông ty 74, Ƀiñ đoàn 15 rơ wah mut lơh cau còr bơsơt kau su bơh bồ nam do. Bi pà git, mờ priă nhai 7 tơlak đong 1 nhai, bi neh geh rài kis niam rlau: “Lài mờ tŭ mut lơh cau lơh phan den hìu bơnhă añ kal ke ngan, tŭ do geh hìu ơm, geh broă lơh rau den kung kơp kờñ geh kơ̆ kơljap sùm, tơnơ̆ do oh kòn geh bơsram sră, añ ưn ngài ngan kông ty neh dong kờl añ”.

Nàng kờñ lam lơh niam kơnòl broă bơtàu tơnguh lơh sa gơ jat bal mờ gàr kơ̆ lơngai dà lơgar nam 2025 mờ ală nam pơn jat tai, Ƀiñ đoàn 15 geh jơnau kờñ rơ wah 1 rbô 489 nă cau lơh broă tàm ù tiah càr Gia Lai. Tàm kơnhoàl tiah nhàr lơgar Đức Cơ, geh Kông ty 74, Kông ty 75, gơ wèt Ƀiñ đoàn 15. Tàm ală nam do, neh bơto bơtê mờr 2 rbô dơ̆ cau chài còr bơ sơt kau su là cau jơi bơtiàn dồ êt nă cau ơm kis bơh jŏ tàm ƀòn lơgar. Đại tá Trịnh Hà Tâm – Kwang Lam bồ Kông ty 75 đơs bè broă bơto broă lơh ai làng bol tàm ƀòn lơgar in bè do: “Kông ty 75 neh rơ wah tơl cau lơh broă, 100% là cau lơh broă tàm ƀòn lơgar. Tŭ bơto bơtê dong kờl den he dong kờl jơh ală bơta bè phan bơna bè pà pềs nàng bơto khi bơsram mờ bơto khi bơta chài lơh tài sồr pal geh bơta chài uă ngan mờ nền nòn nga, bè hơ̆ den tàng mpồl dong kờl bơto bơtê mờ kwang bàng sùm bơto tơn lơh broă 3 bal mờ cau lơh broă”.

Đại tá Khuất Bá Cao, Ƀí thư Đảng ủy, Phó Anih lơh broă đơng lam Ƀiñ đoàn 15 đơs nền, Ƀiñ đoàn sùm ai lài rơ wah cau jơi bơtiàn dồ êt nă cau ơm kis bơh jŏ tàm ƀòn lơgar mut lơh cau lơh phan; do là jơnau lơh nền kuơmàng bơh Đảng ủy, Gah đơng lam Ƀiñ đoàn 15 dê. Bơh hơ̆, pơgồp bơnah bơtàu tơnguh lơh sa, tơnguh niam rài kis ai làng bol in, gàr kơ̆ lơngăp lơngai cíñ trị, rơndap tap sèng lơngap lơngai mpồl bơtiàn tiah nhàr lơgar. Đại tá Khuất Bá Cao đơs nền: “Mờr 8 rbô nă làng bol jơi bơtiàn dồ êt nă cau bơh Ƀiñ đoàn dê geh bol he sền gròi, bol hi neh sồr ală mpồl lơh broă bơh Ƀiñ đoàn dê sền gròi, tơnguh bơta niam kung bè lơh lài broă sơlơ rơ wah cau jơi bơtiàn dồ êt nă cau mut lơh cau lơh phan tàm ală mpồl nàng gàr kơ̆ bè priă lơh geh, gàr kơ̆ rài kis làng bol in mờ uă bơta priă jền, broă lơh nàng dong kờl làng bol bè phan bơna, bơta chài, sơntìl, priă jền. Kơ̆ dơn mblàng yal, hòi jà làng bol lơh broă lơh sa, lơh broă geh bơta chài”.

Tàm 40 nam do, tàm tiah đah tô Tây Nguyên, Ƀiñ đoàn 15 lam lơh dơ̆ lĕ bal kơnòl lơh sa mờ sền gàr dà lơgar. Tŭ do, Ƀiñ đoàn atbồ rlau 44 rbô 295 lồ kau su mờ mờr 400 lồ kòi, phan tam lơyah ngai bal mờ 6 hìu măi lơh bơsơt kau su mờ bơta pràn lơh gơlik 55 rbô tấn pah nam. Ƀiñ đoàn neh tă pơgồp rlau 2 rbô 800 tơmàn đong tàm kes priă dà lơgar, ai geh broă lơh sùm rlau 16 rbô nă cau lơh broă in, tàm hơ̆ rlau 60% là cau jơi bơtiàn dồ êt nă cau. Broă lơh tam klac bal hìu bơnhă đah cau lơh phan cau yoan mờ làng bol jơi bơtiàn dồ êt nă cau mờ rlau 4 rbô 200 yô hìu bơnhă, pơgồp bơnah sơlơ bơrkuăt kơ̆ bơta tam klac bal, tơnguh niam rài kis làng bol. Ồng Rơ Châm Chich ơm tàm ƀòn Beng, sàh tiah nhàr lơgar Ia Chía, kơnhoàl Ia Grai, càr Gia Lai pà git, kơnờm jơnau lơh nền bơh Ƀiñ đoàn 15 dê rơ wah cau lơh phan den tàng rài kis làng bol dê geh tơnguh loh làng ngan: “Ƀiñ đoàn 15 geh dùl tiah tam kau su, kơphe tàm tiah nhàr lơgar Ia Grai, Chư Prông, Đức Cơ, rài kis làng bol dê geh tơnguh loh làng ngan. Tàm sàh añ dê, cau lơh phan bơh kông ty 74, Ƀiñ đoàn 15 dê geh 7 mpồl lơh sa. Mìng is ƀòn añ dê geh 200 nă cau Jarai lơh cau lơh phan. Ngan là kông ty sền gròi ngan ală hìu bơnhă tam klac bal, pơlam tam mờ sơngka sền gàr suơn chi, tam kòi sre. Rài kis làng bol dê neh tam gơl jơh tơn”.

Ƀiñ đoàn 15 neh lơh niam broă lơh hòi jà làng bol, pơgồp bơnah lơh niam kơnòl lơh sa sền gàr dà lơgar, gàr niam lơngăp lơngai tàm tiah nhàr lơgar ală càr Gia Lai mờ Kon Tum. Ƀiñ đoàn neh ai geh broă lơh sùm 9 rbô nă cau lơh broă jơi bơtiàn dồ êt nă cau in, lam lơh rlau 4 rbô 200 yô hìu bơnhă cau lơh phan cau yoan mờ cau jơi bơtiàn dồ êt nă cau tam klac bal, dong kờl gơp bơtàu tơnguh lơh sa.

Broă sền gròi rài kis cau lơh phan in, ngan là cau lơh phan jơi bơtiàn dồ êt nă cau, ờ mìng ơm wơl tàm broă lơh dong kờl ai geh broă lơh mờ tơnguh priă lơh geh, mờ gam là gùng lòt jòng tàm tơrbŏ bal đah mpồl lơh sa kă bro, gơnoar atbồ mờ làng bol. Ală broă lơh ngan ngồn bơh Ƀiñ đoàn 15 dê tàm sùm uă nam do là cơng tàng ai nùs nhơm geh kơnòl, tài mpồl bơtiàn – tài bơta bơtàu tơnguh kơ̆ kơljap bơh tiah nhàr lơgar Tây Nguyên dê.