Kờp tus jơh qúy 1 nam 2025, jơh gùt càr Dăk Nông geh 70 rơbô 671 hìu bơnhă gam càn priă tàm Anih priă jền Dong kờl, mờ kờp jơh priă jơngkah dồs mờr 4 rơbô 800 tơmàn đong. Tàm hơ̆, rlau 24 rơbô hìu bơnhă là làng bol jơi bơtiàn dồ ết nă cau, mờ priă jơng kah dồs rlau 1 rơbô 655 tơmàn đong. Jơh ală hìu bơnhă ndrờm ngui geh cồng nha. Hìu bơnhă ồng K’Biêng ơm tàm ƀòn Phai Kol Pruđăng, sàh Dăk Nia, ƀòn dờng Gia Nghĩa, geh 2 lồ ù. Hìu bơnhă geh càn 90 tơlak đong bơh Anih priă jền dong kờl nàng bơcri priă tam kơphê mờ tiêu lơh geh cồng nha uă. Ồng K’ Biêng đơs: “Nam do tơnhào bơh kơphê geh pơgăp bơh 2 tấn ngùl tus 3 tấn mờ geh bal tiêu tai. Tăc kung geh priă jền bơh 200 tus 250 tơlak đong dồ nam sơl. Jơh ală ndrờm kơnờm càn priă bơcri lơh sa bơh Anih priă jền dong kờl dê uă nam lài. Pa do añ gam càn tai 12 tơlak đong nàng tờ tơrlung dà, blơi sơntèk dơng dà, kơnờm bơh hơ̆ geh sùm dà sàng goh ngui pah ngai, pràn kơl dang să jan jơh hìu bơnhă dê geh gàr niam”.

Tus tŭ do, kờp jơh priă tàm Anih priă jền Dong kờl mpồl bơtiàn càr Gia Lai geh 7 rơbô 631 tơmàn đong, gơguh 153 tơmàn đong pơn drờm mò7 bồ nam, tàm hơ̆ priă bơh kes priă càr geh 598 tơmàn đong. Mpồl kwang bàng lơh broă neh lơh broă bal nền nòn mờ kwang bàng ală mpồl lơh broă cíñ trị mpồl bơtiàn, mờ mpồl tềm pềr mờ ai càn priă ƀòn lơgar dê. Kơnờm mờ hơ̆, jơh ală hìu càn priă ndrờm ngui priă di jơnau kờñ. Ồng Ksor Biếc, kis tàm ƀòn Rơng, sàh Pờ Tó, kơnhoàl Ia Pa pà git:“Lài do añ càn priă bơh anih priă jền nàng blơi kơnrồ ròng, añ càn 30 tơlăk đong, tơnơ̆ mờ hơ̆ blơi 3 nơm kơnrồ. Tơnơ̆ 5 nam den añ tăc kơnrồ ai priă tơm anih priă jền in, mờ añ neh tơn jơh. Tŭ do den tơrgùm bơtàu tơnguh lơh sa hìu nhă”.