Jăt mờ hơ̆, rơndăp broă lơh jòng 144 kơi sồ, gơguh 8 kơi sồ pơn drờm mờ broă rơndăp lơh bơcri priă lài ngan tài ù tiah gơtìp uă ngan kal ke tềng tiah koèl kơh Violăk mờ koèl kơh Măng Đen. Tiah sơnrờp Kơi sồ 0 mờ 000 tàm tìp mờ gùng rơndeh lòt mhar Đah tô – Đah jum hờ đah măt tơngai lik gơwèt kơnhoàl Đức Phổ, càr Quảng Ngãi mờ tiah lồi dŭt gùng tìp bal mờ gơl gùng rơndeh lòt mhar Đah tô – Đah jum hờ đah măt tơngai mŭk gơwèt ù tiah ƀòn dờng Kon Tum, càr Kon Tum.

Gơl gùng rơndeh lòt mhar do geh bơcri priă lơh 4 gah rơndeh lòt, bơta jờl geh lơh 100 kơi sồ tàm 1 jơ. Kờp jơh priă bơcri lơh ing tàm rơndăp broă lơh gùng do di pơgăp 44 tơmàn 300 tơlăk đong. Tàm hơ̆, ală tiah dờp kơnòl ai priă ai broă tơm ntrờn ù tiah; kes priă Dà lơgar ai bơnah broă lơh crăp bal mờ ală khà priă gam tai. Ƀộ Bơ̆t bơtàu kung kờp dŭ lơh broă rơndăp lơh jăt rơndăp broă lơh bơh lồi nam do, mŭt lơh tàm lồi nam 2026, lơh gơs tàm nhai 12 nam 2029.