Bi Nguyễn Thế Tuấn ơm tàm ƀòn dờng Buôn Ma Thuột, càr Dăk Lăk neh geh 10 nam lơh broă jun rò năc lòt nhơl bơh càr Dăk Lăk lòt tus ală càr tiah tàm gùl lơgar bè Đà Nẵng, Phú Yên, Khánh Hoà, Bình Định... Bi Tuấn đơs, bơh Buôn Ma Thuột lòt tus Phú Yên lòt gan Gùng dờng Dà lơgar 29, neh là gùng lòt mhar ngan rlau jơh rau, tài bơh gùng dờng Dà lơgar dê bulah bơta dềt, hăt mơya ờ geh koèl kơh gơrwềng. Ai tŭ do, gơl gùng neh ờ diơng, lòt rê đah Dăk Lăk mờ Phú Yên tơnơ̆ tŭ tơmŭt bal, rơ̆p là broă kal ke ờ dồ ết ờ: “Lài do, lòt bơh ƀòn dờng Buôn Ma Thuột tus Phú Yên mìng roh pơgăp 3 jiơ nggùl lơm, mơya ngan ngồn tŭ do lòt den pal roh 5 jiơ hơ̆ sồng tus. Tài bơh gùng ờ niam, kờñ lòt mhar kung ờ gơtùi sơl. Do là gùng lòt mìng dùl lơm bơh ƀòn dờng Buôn Ma Thuột lòt tus Tuy Hoà mờ sơlơ̆u wơl. Tơmŭt bal nàng bơtàu tơnguh mờ gùng lòt rê bè hơ̆ den kal ke ngan yơ. Dilah kờñ  lòt rê niam, bơtàu tơnguh tơnơ̆ tŭ tơmŭt bal den sồr pal lơh kơnhăp, pờ ơnàng wơl gùng lòt rê”.

Mò Nguyễn Thị Thanh Thu là dùl tàm pơgăp 1 rơbô nă kwang bàng, kông cứk gam lơh broă tàm càr Phú Yên digơlan pal ntrờn lòt tus ƀòn dờng Buôn Ma Thuột lơh broă tơnơ̆ tŭ tơmut bal. Mò Thu pà gĭt, tàm dơ̆ lòt tus càr Dăk Lăk pơrjum bơyai broă lơh tơmŭt bal, mpồl neh pal đì rơndeh rơlĕ ngan tài bơh gùng hăt mờ dềt, ờ diơng, pal pleh uă rơndeh dờng pơndiang tào, rơndeh ƀen pơn diang phan bơna bơt bơtàu mờ jơh bal mờ rơndeh coh bơh kơnòm bơsram dê lòt rê tàm gùng tai:“Geh uă ngan gơl gùng ờ niam, tŭ rê den jê rah jê ram jơh tàm să jan, bòl jơh ngai tơn. Mờr tus 2 càr tơmŭt bal ngan ngồn mut lơh broă, kwang bàng càr Phú Yên guh tus càr Dăk Lăk lơh broă rơ̆p kal ke ngan ai broă lòt rê in. Pah poh digơlan mìng rê tàm hìu dùl dơ̆ lơm, tŭ lòt tàm drim ngai dơ̆ 2 mờ mho ngai dơ̆ 6 rê. Mơya gùng lòt rê bè do den pal lòt bơh mho ngai rơlô hơ̆ sồng drim ngai dơ̆ 2 di tŭ mut lơh broă tơn”.

Gùng dờng Dà lơgar 29 là dùl tàm ală gơl gùng lòt rê kwơ màng tàm tơrbŏ tàm tiah jat kềng gah dà lềng đah Jum tiah tàm gùl lơgar mờ Tây Nguyên; tơn jòng tus tiah nhàr lơgar Dăk Lăk mờ Campuchia mờ kờp jơh bơta jòng pơgăp 293 kơi sồ, mờ tơl jơnau sồr gùng kấp 4 tiah kơh bơnơm, 2 bơnàng gùng rơndeh lòt, măt gùng ơnàng 5,4 thơk mờ 7,5 thơk bơnàng gùng bơcri priă lơh bơh uă nam lài, Gùng dờng Dà lơgar neh ngan ngồn ờ di tŭ bơtàu tơnguh.

 Ồng Trương Công Thái, Phó Củ tịc Anih duh broă Làng bol càr Dăk Lăk, pà gĭt, gùng dà broă lơh gam geh sồr đơs là bơcri priă lơh niam wơl, pờ ơnàng ală gơl gùng bơh Kơi sồ 31+300 (gùng tàm tìp Gùng dờng Dà lơgar 1, ƀòn drà dờng Đông Hòa, càr Phú Yên) tus tiah tàm tìp Gùng dờng Dà lơgar 14 (Kơi sồ 178+062, ƀòn dờng  Buôn Hồ, càr Dăk Lăk), mờ kờp jơh bơta jòng pơgăp 147 kơi sồ. Gơl gùng kờp dŭ geh lơh niam wơl tus gùng dờng kấp 3, mờ bơta lòt mhar mòn lơh bơh 60 tus 80 kơi sồ dùl jiơ, geh 4 bơnàng rơndeh, gùng ơnàng 20,5 thơk, khà priă bơcri lơh rlau 10 rơbô tơmàn đong: “Tềng đăp mat là pal lơh niam wơl, lơh kơnhăp nàng drơng broă lòt rê ƀuơn ƀoài tàm bơta kwang bàng, kông cứk tus lơh broă kờp dŭ sơnđờm mut lơh bơh ngai 1/09 do. 2 càr Phú Yên mờ Dăk Lăk neh lơh sră mờ sră nggal pơyoa Ƀộ Bơt bơtàu, Priă jền in kơlôi sơnơng ai priă jền dong kờl ai tiah do in nàng lơh niam wơl, lơh kơnhăp gơl gùng dờng do tàm tơngai gờñ ngan rlau jơh”.

Ồng Tạ Anh Tuấn– Củ tịc Anih duh broă Làng bol càr Phú Yên đơs là, tŭ Gùng dờng Dà lơgar 29 geh lơh niam wơl, lơh kơnhăp rơ̆p lơh geh ală bơta ƀuơn ngan ai tơl nă cau mờ rơndeh rơndồ in lòt rê, kă bro phan bơna, pơgồp bơnah sơlơ tơnguh tai lơh sa- mpồl bơtiàn tơnơ̆ tŭ tơmut bal. Mơya, bè jŏ jòng, càr Dăk Lăk pa ngan ngồn pal lơh gùng rơndeh lòt mhar lơh geh gùng lòt rê tờm đah Mat tơngai lik – đah mat tơngai Mut tus dà lềng, bơtàu tơnguh jat gùng dà pơlam bơh Dà lơgar dê. Broă do kung neh geh Duh broă sùm Tỉñ ủy 2 càr ring bal mờ digơlan geh lam lơh bơcri priă jat 2 broă lơh lơh bal Dà lơgar mờ làng bol (PPP) tàm tơngai bơh nam 2025-2030 do tơn ala tài jat rơndăp ù tiah bơh Cíñ phủ dê tơngai tơnơ̆ nam 2030. Ồng Tạ Anh Tuấn đơs nùs nhơm he dê:“Mờ jơnau kờñ tŭ do gơlik geh tŭ tơmŭt bal 2 càr, kung bè pơlam gùng dà bơtàu tơnguh wèt tus dà lềng, den broă lơh gùng rơndeh lòt mhar kung gơ jal ngan sơl. 2 càr Phú Yên mờ Dăk Lăk halà tơnơ̆ do là càr pa Dăk Lăk rơ̆p yal, tong mờ Cíñ phủ, Quôk hội in lơh mhar broă lơh jat lơh mơ tơn tàm tơngai bơh nam 2025 – 2030.”

Lơh niam wơl Gùng dờng Dà lơgar 29 mờ lơh gùng rơndeh lòt mhar tàm tơrbŏ  “Brê bơnơm mờ dà lềng” lơh geh gùng lòt tờm ai càr Dăk Lăk pa in, ờ mìng là jơnau sồr jal mhar lơm, mờ gam là bơta gơn kơnờm kwơ màng ai bơtàu tơnguh tơnơ̆ tŭ tơmut bal in. Dùl phan bơna bơt bơtàu gùng lòt rê pa ngan, dơ̆ lĕ bal rơ̆p rề ơnàng lơh bal kơnhoàl ù tiah, sơlơ tơnguh tai lơh sa- mpồl bơtiàn bơtàu tơnguh kơ̆ kơl jăp jŏ jòng rlau tai ai càr Dăk Lăk pa in tơnơ̆ tŭ tơmŭt bal kung bè tiah đah Jum tàm gùl Dà lơgar mờ Tây Nguyên.